L'atun 2022 ha il parlament federal concludì l'uschenumnà «Solarexpress» (implants solars autalpins). Quest concept duai permetter da promover implants fotovoltaics gronds sin ils auts da las Alps. Las premissas èn ina procedura da permissiun accelerada e cundiziuns main severas per la planisaziun. Il mussavia dal chantun mussa, co che las projectadras ed ils projectaders ston observar las prescripziuns federalas sco er co che talas ston vegnir realisadas sin plaun chantunal e communal.

Cun las midadas da la Lescha d'energia facilitescha il parlament federal da permetter implants fotovoltaics gronds fin la fin da l'onn 2025 e fixescha – per questa promoziun – ina indemnisaziun unica da fin 60 pertschient dals custs d'investiziun. Uschia vegnan stgaffidas las premissas per realisar svelt implants fotovoltaics sin surfatschas libras, che han ina gronda producziun d'enviern.

Mussavia davart la procedura
Per realisar il «Solarexpress» en il chantun Grischun ha ina gruppa da lavur interdepartamentala elavurà in mussavia davart la procedura da permissiun (cf. communicaziun a las medias dals 23-01-2023). En quest mussavia vegnan respundidas dumondas da cumpetenza e da procedura sco er talas areguard ils documents da project che ston vegnir mess a disposiziun. In'emprima versiun dal mussavia stat ussa ina giada a disposiziun per tudestg sin las paginas d'internet da l'Uffizi d'energia e da traffic e da l'Uffizi per il svilup dal territori. Las translaziuns en las ulteriuras linguas chantunalas èn en elavuraziun e vegnan messas a disposiziun uschè svelt sco pussaivel. Il mussavia vegn cumplettà ed actualisà cuntinuadamain cun ulteriurs aspects detagliads che n'èn actualmain anc betg definids.

In'adattaziun da l'Ordinaziun chantunala davart la planisaziun dal territori en vista a la realisaziun dal «Solarexpress» è en preparaziun. Previsiblamain entra ella en vigur durant il terz quartal da l'onn 2023.

Agiunta:

Mussavia «Solarexpress»

Infurmaziuns:

• Aspects energetics: Thomas Schmid, manader da l'Uffizi d'energia e da traffic, tel. +41 81 257 36 21 (cuntanschibel da las 11.00 fin las 13.00), e‑mail Thomas.Schmid@aev.gr.ch
• Aspects da la procedura da permissiun: Linus Wild, substitut dal manader da l'Uffizi per il svilup dal territori, tel. +41 81 257 23 07 (cuntanschibel da las 14.00 fin las 16.00), e‑mail Linus.Wild@are.gr.ch