L'atun 2022 ha il Cussegl federal decidì, che implants fotovoltaics possian vegnir realisads en territoris autalpins e ch'i stettian a disposiziun contribuziuns da promoziun per quest intent. Ina gruppa da lavur interdepartamentala è ussa londervi da realisar las prescripziuns da la Confederaziun per il chantun Grischun.

Per garantir a curta vista in provediment d'electricitad durant l'enviern ha la Confederaziun concludì l'atun 2022 – cun la revisiun da la Lescha d'energia – sco mesira urgenta, che tscherts implants fotovoltaics gronds possian vegnir realisads e ch'i duajan star a disposiziun contribuziuns da promoziun durant in temp limità.

L'adattaziun da l'ordinaziun lascha anc avert dumondas
AIl cumenzament da december 2022 ha il Cussegl federal dà en consultaziun las adattaziuns respectivas da l'ordinaziun. Questas propostas da realisaziun na scleran dentant betg tut las dumondas avertas.

En il chantun Grischun sa fatschenta perquai ina gruppa da lavur interdepartamentala dapi mez december cun respunder las dumondas anc avertas. Ultra da quai vegn ella ad elavurar in mussavia davart ils aspects tecnics ed a prender eventualas mesiras giuridicas. La finamira èsi, ch'il chantun termineschia sias lavurs il segund quartal dal 2023 en coordinaziun cun l'ordinaziun da la Confederaziun. Il relasch da questa ordinaziun è anc pendent.

Infurmaziuns:

• Aspects da la tecnica d'energia: Thomas Schmid, manader da l'Uffizi d'energia e da traffic, tel. +41 81 257 36 21 (cuntanschibel da las 15.00 fin las 17.00), e‑mail Thomas.Schmid@aev.gr.ch
• Aspects da la procedura da permissiun: Richard Atzmüller, manader da l'Uffizi per il svilup dal territori, tel. +41 81 257 23 21 (cuntanschibel da las 10.00 fin las 12.00), e‑mail Richard.Atzmueller@are.gr.ch

Responsabladad: Uffizi d'energia e da traffic / Uffizi per il svilup dal territori