La Regenza ha approvà la revisiun parziala da la planisaziun locala che la vischnanca da Val Müstair aveva concludì ils 25 da matg 2022. Uschia ha ella stgaffì las premissas da la planisaziun d'utilisaziun per construir in indriz d'ennavar sin la pista che maina dal territori da skis Minschuns giu la val.

Il territori da skis Minschuns è ina da las attracziuns principalas da la purschida da sport d'enviern da la Val Müstair. Pervia da la situaziun da naiv insuffizienta na po la pista che maina giu la val savens betg vegnir duvrada. L'ennavada previsa duai meglierar la qualitad da la pista e procurar per la garanzia da naiv. La pista existenta ha ina lunghezza da circa 3,5 kilometers e maina da la staziun da muntogna Alp da Munt giu en il territori Prà Chalchera a Tschierv. La surfatscha che duai vegnir ennavada da nov importa var 6,9 hectaras.

© Swissimage

La Regenza ha approvà l'affiliaziun da la gestiun dal register funsil da la vischnanca da Samignun al Circul da register funsil Engiadina Bassa/Val Müstair per il 1. da schaner 2024.

Fin ussa ha la vischnanca da Samignun manà il register funsil cun in agen uffizi entaifer l'organisaziun communala (Circul da register funsil Samignun). Ils 18 da zercladur 2023 ha la vischnanca concludì da s'affiliar cun il Circul da register funsil Engiadina Bassa/Val Müstair per la gestiun dal register funsil. Ils 12 d'avust 2022 aveva il Circul da register funsil Engiadina Bassa/Val Müstair, che consista da las vischnancas da Scuol, Val Müstair, Valsot e Zernez, acceptà questa participaziun respectivamain l'integraziun da la vischnanca da Samignun.

L'areal da la Halla da la citad da Cuira duai vegnir surbajegià da nov. Il cumenzament da la stad 2022 ha la publicitad pudì prender invista dal project directiv che la citad da Cuira e la vischnanca burgaisa da Cuira han laschà elavurar. En il territori Welschdörfli, che cumpiglia er l'areal da la Halla da la citad e la plazza da parcar, èn gia enconuschents numerus lieus da chats archeologics. Cuntrari als territoris cunfinants n'èn vegnidas fatgas fin ussa naginas retschertgas archeologicas pli detagliadas sin la parcella da l'actuala Halla da la citad.

Il Servetsch archeologic dal Grischun ha perquai elavurà in concept per in'uschenumnada exchavaziun da salvament sin la parcella da la Halla da la citad. La Regenza ha prendì enconuschientscha dals custs ch'èn previs per quest intent. Per las lavurs al lieu e per l'elavuraziun posteriura appartegnenta (archivaziun correcta da las datas, inventarisaziun e restauraziun d'eventuals chats pitschens) èn vegnids calculads var 2 milliuns francs per ina durada da 4 onns. Ils custs che resultan previsiblamain ils onns 2024 fin 2027, vegnan budgetads en il rom da las directivas respectivas dal preventiv ed integrads en il plan da finanzas.

Sondagis en la halla da la citad 2015

La Regenza ha garantì a la vischnanca da Cuira ina contribuziun chantunala da maximalmain 252 000 francs per segirar e per conservar ils mirs da la ruina dal chastè Lichtenstein a Haldenstein.

La ruina dal chastè da Lichtenstein è ina da las pli marcantas ruinas en il chantun. Pervia da sia posiziun exponida cun in bel panorama sin la val è la ruina bain visibla ed ha uschia er ina impurtanza turistica. La ruina, che vegn er numnada «Katzenburg», cumpiglia ils rests d'ina tur ed – en la medema lingia – in palas (edifizi cun sala) ed in mir da tschinta. En la curt sa chatta ina cisterna. Tenor l'istoricher d'art Poeschel aveva la tur trais plauns ed il palas quatter plauns. L'access manava oriundamain sur ina passarella che pendeva libramain sur il precipizi da la paraid ost. Il chastè, ch'era la sedia dals signurs da Lichtenstein, è attestà per il 12. tschientaner. A la fin dal 13. tschientaner, suenter che schlattaina da Lichtenstein era morta ora, èn ils signurs da Haldenstein daventads novs possessurs dal chastè. L'onn 1474 è el anc registrà sco ruina. Enturn l'onn 1570 era el apparentamain gia ì en decadenza. Maletgs dals onns 1780, 1837 e 1916 laschan supponer, ch'il stabiliment oriundamain impressiunant sto esser ì en decadenza in pau a la giada.

© Archiv da la Tgira da monuments dal Grischun

La Regenza ha garantì a la vischnanca da Schiers ina contribuziun chantunala da 248 000 francs als custs per renovar la via champestra nr. 5a, Chobel – punt dal Spondatobel.

Questa contribuziun chantunala è vegnida deliberada sin basa d'ina contribuziun federala da maximalmain 437 080 francs. Ils custs subvenziunabels per renovar questa via champestra agricula importan maximalmain var 1,29 milliuns francs.

La Regenza ha approvà il project «Via forestala Fürgglichopf» da la vischnanca da Landquart ed ha deliberà ina contribuziun chantunala da maximalmain 120 700 francs per quest intent.

Ils guauds al sidvest da Mastrils en il territori Fürgglichopf – Prafisaschga èn per part determinads sco guauds da protecziun. Els protegian il vitg, las vias chantunalas e communalas da colliaziun sco er ils bains agriculs cunter lavinas, bovas ed aua gronda. Ultra da quai adempleschan quests guauds er ina funcziun impurtanta per la producziun da laina e per la protecziun da la natira. Per garantir duraivlamain questas funcziuns forestalas ston ils guauds vegnir tgirads e cultivads correspundentamain. En il medem territori sa chattan er pastgiras e prads che vegnan utilisads da l'agricultura. Actualmain han ils guauds ed ils territoris agriculs però in access insuffizient. Per part è l'access en in nausch stadi e na correspunda betg pli a las pretensiuns actualas areguard la ladezza, la capacitad da chargia e la segirezza da charrar.

Il project prevesa da renovar ina veglia via da guaud existenta sin ina lunghezza da 175 meters e da prolungar il vial per 60 meters. La via vegn schlargiada ad ina ladezza da 3,3 meters e survegn ina cuvrida da glera. Ils custs totals èn calculads cun 170 000 francs. La realisaziun dal project «Via forestala Fürgglichopf» dura 2 onns.