Danovamain realisescha il chantun Grischun in program chantunal da vaccinaziun cunter ils papillomavirus umans (HPV). HPV vegnan transmess tras l'act sexual e chaschunan variclas en las genitalias. En il decurs dals onns pon las pels mucosas infectadas degenerar e chaschunar emprims stadis da cancer u cancer. Ina vaccinaziun cunter HPV porscha ina protecziun efficazia e segira cunter infecziuns cun HPV e reducescha la ristga da survegnir cancer chaschunà da HPV. En il rom dal program da vaccinaziun cunter HPV pon tut ils giuvenils e tut las persunas giuvnas creschidas dad 11 fin 26 onns en il Grischun sa laschar vaccinar gratuitamain cunter HPV.
La vaccinaziun che stat actualmain a disposiziun protegia cunter nov tips da papillomavirus umans. La vaccinaziun vegn recumandada a mattas e mats dad 11 onns e pli vegls sco er a dunnas giuvnas ed umens giuvens fin 26 onns. La vaccinaziun duai vegnir fatga avant l'emprim act sexual. En il cas ideal vegn la vaccinaziun fatga avant il 15avel anniversari, perquai che lura dovri mo duas empè da trais dosas dal vaccin. L'Uffizi da sanadad recumonda als giuvenils da discutar il tema da la vaccinaziun cunter HPV cun las persunas responsablas per l'educaziun e cun ina persuna medicinala spezialisada. La vaccinaziun è gratuita e sa basa sin ina decisiun persunala.
Ina da las pli frequentas infecziuns transmissiblas sexualmain
Ils papillomavirus umans (HPV) èn fitg derasads e fitg contagius. Ils virus vegnan transmess dad uman ad uman tras l'act sexual u tras il contact genital, er sch'i vegn duvrà in condom, perquai ch'els èn en l'entira pel mucosa. Tuttina duain vegnir duvrads condoms, per sa proteger cunter auters scherms infectus transmissibels sexualmain, sco per exempel hepatitis B, HIV, clamidias u herpes.
Tar dunnas pon ils papillomavirus umans chaschunar cancer al culiez da l'uterus ed en la vagina. Tar umens e dunnas pon HPV chaschunar cancer a l'anus u en il sectur da la gula. Singuls tips da HPV pon chaschunar variclas genitalas visiblas u zuppadas. L'infecziun cun HPV è ina da las pli frequentas infecziuns transmissiblas sexualmain e pertutga umens e dunnas.
Dapli infurmaziuns davart la vaccinaziun cunter HPV ed annunzia:
Infurmaziuns:
Marina Jamnicki, media chantunala, Uffizi da sanadad, tel. +41 81 257 26 46 (cuntanschibla da las 13.00 fin las 16.00), e‑mail Marina.Jamnicki@san.gr.ch
Responsabladad: Uffizi da sanadad