La Regenza ha prendì enconuschientscha da la petiziun «La segirezza da la via chantunala da la Val Calanca». La petiziun ch'è vegnida suttascritta da tut en tut 1719 persunas, è vegnida inoltrada a la Regenza ils 31d'october 2023. Ella pretenda che la segirezza da la via chantunala da la Val Calanca vegnia meglierada.

Enconuschientscha da la petiziun

La Regenza ha approvà la revisiun parziala da l'Ordinaziun tar la Lescha da sanadad. En il chantun Grischun pon ussa er las apotecras ed ils apotechers vaccinar cunter rosabella (herpes zoster). Da questa nova purschida da vaccinaziun duain profitar cunzunt persunas saunas e mobilas.

Dapi l'atun 2021 è il vaccin Shingrix admess per vaccinaziuns cunter herpes zoster. L'Uffizi federal da sanadad publica e la Cumissiun federala per vaccinaziuns recumondan il vaccin a persunas saunas a partir da 65 onns sco er a persunas a partir da 50 onns cun ina leva defizienza da l'immunitad respectivamain a persunas a partir da 18 onns cun ina greva defizienza da l'immunitad. Dapi il favrer 2022 surpiglia l'assicuranza obligatorica da malsauns ils custs per Shingrix. La vaccinaziun cun Shingrix è fitg segira e bain cumportabla, uschia che persunas saunas pon vegnir vaccinadas senza problems en apotecas. Per las ulteriuras pazientas ed ils ulteriurs pazients e per l'injecziun da vaccins vivs cunter herpes zoster duain vinavant esser cumpetents las medias ed ils medis da chasa, perquai ch'ellas ed els enconuschan eventualas malsognas da basa che na s'accordan betg cun la vaccinaziun e perquai ch'i dovra ina savida medicala spezialisada per cussegliar questas persunas.

Herpes zoster è la consequenza d'ina infecziun cun il virus varizella-zoster. L'emprima infecziun sa mussa sco virola selvadia. Suenter resta il virus varizella-zoster l'entira vita en il corp, per il solit senza ch'ins percorscha insatge. Ina reactivaziun dal virus en furma d'ina erupziun da rosabella datti cunzunt en la vegliadetgna pli avanzada ed en cas d'ina defizienza da l'immunitad. Ella po dentant rumper ora en mintga vegliadetgna. D'ina vart dal corp sa mussa lura in eczem strivlà cun vaschiettas ed i po dar differentas cumplicaziuns.

La Regenza ha approvà il project «Protecziun cunter crudadas da crappa Tuf T2» da l'Uffizi da construcziun bassa. Ils custs per las mesiras previsas importan tut en tut 195 000 francs.

La via dal Lucmagn traversa la chavorgia dal Rain da Medel al sid da la vischnanca da Mustér ed è là l'unica colliaziun stradala cun la Val Medel e cun il pass dal Lucmagn. En la chavorgia dal Rain da Medel mainan ils trajects da via che sa chattan sut tschiel avert, per gronda part per lung da paraids-crap taissas. Quellas èn suttamessas a process d'erosiun ed en numerus lieus datti regularmain crudadas da material che arriva fin giu sin la via.

Tranter ils dus tunnels Caschlatsch e Tuf sa chatta il lieu T2 che n'è fin ussa anc betg segirà. Da questa paraid-crap è sa distatgà ils ultims decennis pliras giadas material ch'è mintgamai arrivà fin giu sin la via. Sco protecziun cunter crudadas da crappa èsi tranter auter previs d'allontanar var 300 meters cubic crappa al pe dal grip e da construir ina palissada d'atschal d'ina autezza dad 1,5 meters, che dispona da la vart sura d'elements per franar il material. La realisaziun da quest project permetta da reducir considerablamain las ristgas existentas e d'augmentar la segirezza sin la via dal Lucmagn.

La Regenza ha approvà la revisiun parziala da la planisaziun locala che la vischnanca da S-chanf aveva concludì ils 26 d'avrigl 2023. Tras la revisiun vegnan stgaffidas las premissas da la planisaziun d'utilisaziun per engrondir il campadi Chapella. Ultra da quai vegnan fatgas adattaziuns tecnicas da la zona da protecziun da la cuntrada sco er da las zonas da privel en il sectur dal campadi Chapella.

© 2020 Andrea Badrutt, Cuira

Per las lavurs da la meglieraziun generala da Trin è vegnida concedida ina contribuziun chantunala da maximalmain 6,69 milliuns francs. Questa contribuziun dal chantun premetta ina contribuziun finanziala da la Confederaziun, che sustegna il project cun var 7,52 milliuns francs. Il territori dal project cumpiglia ina surfatscha da 406 hectaras.

© Grünenfelder und Partner SA, Domat