Sin invitaziun da la Regenza grischuna ha la Regenza dal chantun Argovia visità ier ed oz il chantun Grischun.
A chaschun da sia visita en il chantun Grischun è la Regenza da l'Argovia vegnida manada dal president da la Regenza, il landamma Markus Dieth. El è vegnì accumpagnà dal vice-president Dieter Egli, dal cusseglier guvernativ Stephan Attiger, dal cusseglier guvernativ Alex Hürzeler, dal cusseglier guvernativ Jean-Pierre Gallati e da la chanceliera da stadi Joana Filippi sco er dal pledader da la Regenza Peter Buri.
La Regenza ha retschavì ier ses giasts en l'edifizi administrativ Sinergia a Cuira. Là èn las duas delegaziuns sa participadas ad ina visita guidada cuminaivla tras l'edifizi administrativ per iniziar lur inscunter. Suenter èn ellas viagiadas a Tavau Monstein ed han visità la BierVision Monstein SA, ina da las bierarias situadas il pli bel en Europa. Suenter han ellas pernottà sin la Schatzalp.
Sin il program dad oz è stada ina visita da l'Institut da perscrutaziun AO che ha ina posiziun dominanta sin l'entir mund en il sectur da la perscrutaziun preclinica per la chirurgia d'accidents e per l'ortopedia. Il program è ì a fin cun in referat da prof. dr. Rico Franc Valär davart l'impurtanza dal rumantsch e dal talian en il chantun Grischun, suandà d'in gentar.
La visita da la Regenza dal chantun Argovia ha servì en emprima lingia a tgirar las relaziuns amicablas ed a barattar experientschas sin ils champs da la cultura, da l'economia e da la politica.
Fotografia agiuntada:
La Regenza da l'Argovia e la Regenza dal chantun Grischun avant il center administrativ Sinergia a Cuira
President da la Regenza Jon Domenic Parolini cun landamma Markus Dieth
Infurmaziuns:
President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
Responsabladad: Regenza