La Regenza beneventa l'aboliziun da la pensiun per vita duranta da las anteriuras commembras e dals anteriurs commembers da la Regenza. Empè da quella duai vegnir introducida ina prestaziun da durada limitada. Quai èn ils puncts centrals da la missiva tar l'iniziativa chantunala dal pievel «Finì cun il paracrudada dad aur per commembras e commembers da la Regenza – Na a la pensiun per vita duranta».
L'iniziativa «Finì cun il paracrudada dad aur per commembras e commembers da la Regenza – Na a la pensiun per vita duranta» è reussida il mars 2024 ed è valaivla (cf. communicaziun da la Regenza dals 11 d'avrigl 2024). Tenor l'iniziativa duai la pensiun per vita duranta vegnir abolida senza cumpensaziun. Quai duai valair er per las commembras ed ils commembers da la Regenza en uffizi.
La Regenza propona al Cussegl grond da declerar l'iniziativa per valaivla.
La Regenza refusa l'iniziativa
D'abolir la pensiun per vita duranta senza cumpensaziun fiss problematic. Ina tala aboliziun ignorass la severa limitaziun dal temp d'uffizi en il chantun Grischun, restrenschess l'independenza da las commembras e dals commembers da la Regenza e reduciss l'attractivitad da quest uffizi. Per quests motivs propona la Regenza al Cussegl grond da refusar l'iniziativa.
La Regenza suttametta ina cuntraproposta
La Regenza renconuscha, ch'i dovra ina regulaziun moderna per il temp suenter l'extrada da l'uffizi guvernativ. Perquai suttametta ella al Cussegl grond ina cuntraproposta tar l'iniziativa.
Sco l'iniziativa prevesa er la cuntraproposta d'abolir la pensiun per vita duranta. Sco cumpensaziun duai dentant vegnir introducida ina prestaziun da durada limitada. Tut tenor, sch'ina commembra u in commember ha cumplenì 57 onns u betg, cura ch'ella u el sorta da la Regenza, duai la prestaziun vegnir pajada durant 3 onns u fin al pensiunament. Cun la cuntraproposta vegn realisada l'incumbensa dal Cussegl grond da la sessiun da favrer 2023. Quella vul introducir ina limitaziun temporara che finescha il pli tard cun il pensiunament.
Regulaziun moderna cun gronds respargns
La cuntraproposta cuntegna ina reducziun fitg clera, cumpareglià cun la pensiun per vita duranta. Ils respargns fissan quasi uschè gronds sco tar l'iniziativa. Cuntrari a l'iniziativa dessi dentant ina garanzia economica commensurada per il temp suenter la terminaziun da l'uffizi. Qua tras fissi garantì, che las commembras ed ils commembers da la Regenza pudessan exequir lur funcziun en moda independenta fin a lur extrada, uschia che l'uffizi guvernativ restass attractiv.
Il Cussegl grond vegn a tractar il project previsiblamain en la sessiun da zercladur 2025.
Agiuntas:
Infurmaziuns:
Cusseglier guvernativ Martin Bühler, schef dal Departament da finanzas e vischnancas, tel +41 81 257 32 05 (cuntanschibel da las 09.00 fin las 11.00), e‑mail Martin.Buehler@dfg.gr.ch
Responsabladad: Regenza