Il chantun sustegna il project da proveder la regiun Engiadina Bassa/Val Müstair cun bindel ultralad (BUL) sin basa d'ina infrastructura da fibra da vaider. La Regenza ha concedì ina contribuziun chantunala cun in import maximal dad 1,89 milliuns francs. Entant che las vischnancas da Scuol, Valsot e Zernez han gia en mira ina collavuraziun cun l'interpresa dal provediment d'electricitad regiunala «Energia Engiadina», vegnan las vischnancas da Samignun e da Val Müstair a concretisar ulteriuramain il provediment planisà.

In provediment da las regiuns cun colliaziuns d'internet en il sectur dal bindel ultralad (almain 100 Mbit/s simmetric) che permetta la cumpetitivitad, è ina premissa impurtanta per far avanzar la transfurmaziun digitala en il chantun Grischun. Pervia da l'utilisaziun d'applicaziuns che dovran bleras datas è la dumonda d'interpresas e da persunas privatas per grondas capacitads da bindel ultralad s'augmentada cuntinuadamain. In'auta qualitad dal provediment è da gronda impurtanza per il chantun e per las regiuns. Ella gida ad augmentar l'attractivitad dal chantun per interpresas pitschnas e mesaunas sco er per las abitantas ed ils abitants. Perquai promova il Grischun l'extensiun dal bindel ultralad cun contribuziuns dal credit d'impegn per infrastructuras relevantas per il sistem.

La Regenza ha approvà la revisiun parziala da la planisaziun locala che la vischnanca da Surses aveva concludì ils 7 da november 2023. Cun quai determinescha ella il trassé dal flowtrail da mountainbike da Parnoz fin Savognin. Sin in traject vegn er il trassé da la senda da viandar spustà, quai per motivs da detretschament. Questa determinaziun vegn fatga per rinforzar il turissem da stad che survegn adina dapli impurtanza en la vischnanca da Surses ed en tut la destinaziun turistica da la regiun sco er per trair a niz ils potenzials dal turissem da mountainbike.

Cotschen: trail / mellen: traject da transfer (via champestra)
© Andrea Badrutt

La Regenza ha approvà il project da correcziun da la vischnanca da Schlarigna e garantescha a tala ina contribuziun chantunala tenor la Lescha davart la correcziun dals curs d'aua en l'autezza da maximalmain 179 600 francs. Ultra da quai ha ella approvà – tenor la cunvegna da program da la Nova gulivaziun da finanzas (NGF) – ina contribuziun federala da 314 300 francs als custs totals dal project dad 898 000 francs.

Per proteger ils abitadis e las infrastructuras d'aua gronda è vegnida fatga gia ils onns 1910 ina correcziun da l'Ova Schlattain che nascha al Piz Saluver e sbucca la finala en l'En. En il fratemp è il sistem da correcziun vegnì renovà e cumplettà periodicamain. Da princip è quest sistem sa cumprovà. Ils onns 2018 e 2019 hai dentant dà ferms temporals sur quest intschess. Entant ch'ils abitadis e las infrastructuras en il conturn èn per fortuna restads senza donns, èn percunter ils rempars da l'aual per part vegnids donnegiads. Per garantir er en l'avegnir la protecziun cunter aua gronda ha la vischnanca da Schlarigna perquai decidì da reparar ils objects donnegiads.

La Regenza ha constatà, che l'iniziativa dal pievel «Finì cun il paracrudada dad aur per commembras e commembers da la Regenza – Na a la pensiun per vita duranta» è reussida cun 4342 suttascripziuns valaivlas. Il dumber minimal da 3000 suttascripziuns che vegn prescrit da la lescha, è pia vegnì surpassà. Cun l'inoltraziun da las glistas da suttascripziun ils 15 da mars 2024 è er vegnì observà il termin dad 1 onn per rimnar suttascripziuns. L'iniziativa legislativa è vegnida redigida sco iniziativa constituziunala en furma d'in sboz elavurà.

Ultra da questa iniziativa dal pievel è er pendenta ina incumbensa da la fracziun da la PLD davart quest tema. En la sessiun da favrer 2023 aveva il Cussegl grond surdà a la Regenza l'incumbensa da la fracziun da la PLD concernent la regulaziun d'ina pensiun per las commembras ed ils commembers da la Regenza. La Regenza examinescha ussa l'ulteriur proceder areguard l'incumbensa da fracziun en relaziun cun l'iniziativa dal pievel.