Il chantun Grischun vul accelerar la transfurmaziun digitala da l'administraziun a favur da la populaziun, las interpresas e l'administraziun. A questas gruppas en mira vulain nus dar spezialmain gronda paisa cun integrar ellas a moda intenziunada ed activa en la realisaziun. Nus ans orientain d'in cuntin tenor la visiun «Uniun e diversitad dattan forza – er en il spazi digital». Da quai po noss chantun grond cun sias 150 valladas e bleras regiuns perifericas profitar spezialmain bain.

Per la populaziun
Da tuttas uras vegn pussibilità a la populaziun in access als servetschs e las infurmaziuns da l'administraziun ch'è uschè simpel e pratic d'utilisar sco pussaivel. Quai tenor il princip «digital first», pia en emprima lingia digital, ma cun salvar ils process sin palpiri nua ch'igl è necessari. Plinavant vegn dà gronda attenziun sin ina realisaziun senza barrieras, uschia che mintga persuna po nizzegiar las purschidas independentamain da sias cumpetenzas digitalas, enconuschientschas linguisticas u impediments. Per resguardar il meglier pussaivel ils basegns vegn la populaziun integrada en la planisaziun da las applicaziuns correspundentas.

Per las interpresas
Interpresas vegnan distgargiadas entras la midada futura sin process digitals. En il center stattan qua interacziuns transitoricas e per gronda part automatisadas cun l'administraziun chantunala – en accord cun la devisa «digital only, automation first». Cun l'administraziun digitala daventan process chapibels era per interpresas e cun quai era transparents.
Interpresas e federaziuns professiunalas da differents champs vegnan integradas activamain en la planisaziun per realisar la transfurmaziun digitala. Quai garantescha ina qualitad maximala da las schliaziuns digitalas.

Per l'administraziun
La transfurmaziun digitala pussibilitescha in barat uschè digital sco pussaivel entaifer ils differents posts da l'administraziun. Uschia vegn la collavuraziun tranter departaments, posts e lieus da l'administraziun chantunala simplifitgada vinavant. Projects entaifer questas unitads vegnan accelerads entras la creaziun da novas plazzas e cumpetenzas. Collavuraturas e collavuraturs vegnan distgargiads en spezial tar lavurs repetitivas; uschia pussibilitescha la transfurmaziun digitala la finala er il sustegn per models da temp da lavur flexibels.