En il rom da la transfurmaziun digitala lavurain nus vi da numerus projects che tangheschan differents champs da l'administraziun chantunala. Dasper ils exempels numnads qua sut èn blers auters projects en la planisaziun e realisaziun per crear schliaziuns pli effizientas e pli utilisablas per burgaisas e burgais, las interpresas e las collavuraturas ed ils collavuraturs da l'administraziun dal chantun Grischun.


ePortal
Per avair access als servetschs digitals da l'administraziun chantunala vegn sviluppà in ePortal. Gronda attenziun dain nus a la segirezza ed a la praticabladad optimala per pussibilitar a las utilisadras ed als utilisaders in access svelt ed effizient als servetschs.

Administraziun d'identitad e d'access
Il chantun Grischun elavura in'atgna schliaziun per administrar identitads ed autorisaziuns d'access. Igl è planisà da remplazzar quella pli tard, cura che l'identitad electronica da la Confederaziun (E-ID) stat a disposiziun.

Plattafurma da barat electronica («chascha da brevs electronica»)
Sch'i fa da basegn, vegnan documents e communicaziuns messas a disposiziun sin ina plattafurma da barat centrala. Tranter auter era decisiuns administrativas cun signatura digitala sco p.ex. decisiuns da taxaziun. Per l'avegnir èsi planisà da pussibilitar il barat da datas digital tranter l'administraziun chantunala, la populaziun e l'economia.

Formulars online
Cun formulars online unitars vegn pussibilitada ina communicaziun senza palpiri cun l'administraziun chantunala. Quai eliminescha la necessitad da formulars da palpiri tradiziunals ed ils pass colliads da stampar, emplenir a maun e scannar documents avant che inoltrar els.

Proceder da permissiun da construcziun electronic
Cun il proceder da permissiun da construcziun electronic vegn il barat tranter las persunas petentas e l'administraziun communala e chantunala pli effizienta e transparenta. En quest connex vegni a dar la pussaivladad d'inoltrar la dumonda da construcziun via in formular online. Uschia pon plirs posts administrativs elavurar il medem mument la dumonda. Plinavant han las persunas petentas access a las infurmaziuns da las vischnancas e dal Chantun en connex cun il status actual da lur dumonda da construcziun.