Ti lavuras en la cuschina da la chasa d'abitar Scalära, en la mensa Münzmühle u en la GastroCantina a Cuira. Ti prendas en consegna las victualias e controlleschas la quantitad e la qualitad. Ti preparas pasts chauds e fraids e preschentas els en moda decorativa.
Ti enconuschas las differentas tecnicas da preparar victualias sco coier cun vapur, pargialar, gratinar, sotar (brassar curtamain en ina padella fitg chauda) e poschar (coier en liquid chaud). Ti fas schuppas, sosas, funds. En la cuschina fraida preparas ti plattas da charn, salatas e pastetas e fas differentas pastizarias dultschas u saladas. Ti nettegias ils cuntels, las padellas, ils utensils e procuras che las victualias vegnan conservadas en moda igienica.
La basa per la scolaziun manaschiala è – ultra da la promoziun da la part professiunala – il svilup da la cumpetenza metodica, sociala e persunala. Quai vul dir che ti t'acquistas durant tia scolaziun la savida e las enconuschientschas professiunalas da giudim ensi e che ti es en cas da dumagnar las pretensiuns en il sectur interuman e professiunal.
La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras. In pèr exempels:
- Curs da federaziuns professiunalas, da scolas spezialisadas e da scolas professiunalas spezialisadas sco er da scolas spezialisadas superiuras
- Cuschiniera/cuschinier da dieta AFQ, spezialista/spezialist da products da charn AFQ, pasternera/pasterner-pastiziera/pastizier-confisiera/confisier AFQ, spezialista/spezialist da restauraziun AFQ u spezialista/spezialist d'hotel AFQ
- Schefcuschiniera/schefcuschinier cun certificat professiunal federal, manadra/manader da gastronomia cun certificat professiunal federal
- Scheffa/schef da cuschina dipl., manadra/manader da la restauraziun collectiva dipl., interprendidra/interprendider da gastronomia, dipl.
- Hoteliera-ustiera/hotelier-ustier SSS dipl.
- Bachelor of science (SAS) en tecnologia da victualias, bachelor of science (SAS) en international hospitality management, master of science (SAS) en global hospitality business