Er quest onn ha gì lieu l'inscunter annual da las persunas ch'èn responsablas per il persunal dals 39 posts da servetsch dal chantun Grischun. L'occurrenza è vegnida organisada da l'Uffizi da persunal.

En il center è stà il barat tranter las participantas ed ils participants, il qual è vegnì approfundà durant il gentar cuminaivel sco er durant l'apero final. Ils temas centrals èn stads: parter enconuschientschas spezialas in cun l'auter e barattar experientschas praticas per emprender in da l'auter, per sa sustegnair vicendaivlamain e per rinforzar la chapientscha in per l'auter.

Durant l'avantmezdi han ins pudì visitar differents stans cun infurmaziuns davart la Strategia da HR, cun in sguard davos las culissas da Payroll e cun detagls davart la rolla da las persunas ch'èn responsablas per il persunal. Il suentermezdi han gì lieu referats d'input davart ils temas «Segirezza al plaz da lavur per futuras mammas» e «Co ir enturn cun collavuraturas e collavuraturs che han grevezzas psichicas». A las participantas ed als participants han quests referats dà invistas ed impuls per il mintgadi da lavur.

Nus engraziain a tuttas persunas preschentas per la participaziun activa e per ils blers resuns ed ans legrain gia sin ils proxims inscunters.