Dapi il cumenzament da la stagiun da pestga 2018 stat a disposiziun a las pestgadras grischunas ed als pestgaders grischuns l'app da pestga per manar la statistica da pestga. La registraziun digitala da l'activitad da pestga e dals peschs pigliads ha avantatgs enorms per las utilisadras ed ils utilisaders. Er la qualitad da las datas vegn meglierada. I vala la paina da midar a l'app!
Registraziun
L'app po vegnir chargiada giu dal Google Playstore u dal Apple App Store.
Per pudair duvrar l'app da pestga ston ins l'emprim sa registrar. Suenter la registraziun pon ins avrir l'app, endatar las datas da login ed uschia s'annunziar.
Sch'ins avra l'app da pestga sin l'agen apparat mobil, arrivan ins sco emprim sin la plattafurma d'annunzia. Là ston ins sa registrar cun smatgar sin il buttun blau "Registrieren" giusum il monitur e cun endatar las datas persunalas sin la proxima pagina. Silsuenter survegn ins in e-mail da verificaziun sin l'adressa dad e-mail ch'ins ha inditgà sco num d'utilisaziun. L'adressa dad e-mail ston ins confermar cun avrir il link da verificaziun ch'è inditgà en il e-mail. Suenter che la verificaziun è gartegiada, survegn ins in e-mail da conferma. Quest e-mail da conferma duess ins arcunar en l'agen conto dad e-mails, per ch'ins haja pli tard – en cas da basegn – access a las atgnas datas da login.
Utilisaziun
Avant che duvrar l'app sco statistica da pestga, legiai per plaschair las instrucziuns davart l'utilisaziun da l'app da pestga. Sche la statistica da pestga vegn manada incorrectamain cun l'app da pestga, vegn quai chastià cun ina multa – analogamain a la pratica usitada per la statistica sin palpiri tenor las Prescripziuns da pestga vertentas.
Instrucziun
L'app da pestga remplazza la statistica sin palpiri. Sch'ins maina la statistica da pestga cun l'app da pestga, na ston ins betg manar la statistica sin palpiri. Durant la stagiun n'èsi betg pussaivel da midar dal cudeschet da statistica a l'app da pestga u viceversa.
En l'app da pestga vegnan da nov menziunadas – sco resumaziun – las prescripziuns che valan per l'aua nua ch'i vegn pestgà. I sa tracta dentant mo d'in agid d'orientaziun. Giuridicamain liantas èn las disposiziuns en las Prescripziuns da pestga actualas. Per la correctadad dal cuntegn e per la cumplettadad da las infurmaziuns en l'app da pestga na po vegnir surpigliada nagina garanzia.
Protecziun da datas
Tras l'utilisaziun da l'app da pestga acceptais Vus la decleraziun davart la protecziun da datas. La decleraziun davart la protecziun da datas da l'app da pestga po vegnir consultada sut "Einstellungen" ⟹ "Datenschutzerklärung".
Areguard la protecziun da datas n'exista da princip nagina differenza tranter il cudeschet da statistica e l'app da pestga. Cun tuttas duas modas da manar la statistica da pestga vegnan rimnadas datas persunalas da la pestgadra u dal pestgader sco er infurmaziuns davart las activitads da pestga exequidas e davart ils peschs pigliads. Cumpareglià cun il cudeschet da statistica èn las infurmaziuns davart las activitads registradas e davart ils peschs pigliads dentant pli detagliadas (mument dal cumenzament e da la finiziun d'ina activitad, mument ch'ils peschs èn vegnids pigliads, lunghezza exacta dals peschs e – sche quai vegn inditgà – estga utilisada). L'intent da la registraziun da datas resta dentant la protecziun da la diversitad natirala da las spezias e da la populaziun da peschs indigens sco er la garanzia d'ina utilisaziun persistenta da las populaziuns da peschs (art. 2 da la Lescha chantunala da pestga [LCP; DG 760.100] dals 26 da november 2000; versiun dal 1. da schaner 2014). Grazia al meglier grad da precisaziun da las datas registradas po il UCP ademplir anc meglier questa incumbensa prescritta.
Infurmaziuns detagliadas davart la protecziun da datas en connex cun l'utilisaziun da l'app da pestga èn cuntegnidas en la
decleraziun davart la protecziun da datas.
App da pestga – FAQ
Funcziuna l'app er en lieus che n'han nagina colliaziun cun l'internet?
Gea. Tut las datas endatadas vegnan memorisadas temporarmain sin Voss smartphone, fin che l'activitad vegn arcunada. Uschespert ch'ina activitad è vegnida terminada ed arcunada, vegn l'entir pachet da datas transmess per internet al UCP. En lieus senza colliaziun cun l'internet vegnan las datas memorisadas temporarmain sin il smartphone e transmessas automaticamain al UCP, uschespert ch'ina colliaziun cun l'internet è puspè avant maun.
Tge capita, sche l'accu da mes smartphone è vid?
Sch'ins va a pestga, ston ins – tenor las Prescripziuns da pestga valaivlas – pudair preschentar da tut temp la statistica da pestga als organs da surveglianza da pestga. Sche l'accu da Voss smartphone è vid e sche Vus na pudais betg As gidar cun in statistica sin palpiri, na dastgais Vus betg pestgar vinavant. Mintga pestgadra e pestgader è sez responsabel per pudair preschentar da tut temp la statistica da pestga. Quai vala er, sche la statistica da pestga vegn manada cun l'app da pestga.
Stoss jau anc manar il cudeschet da statistica, sche jau hai ussa l'app da pestga?
Na. L'app da pestga remplazza la statistica sin palpiri. Sch'ins maina la statistica da pestga cun l'app da pestga, na ston ins betg manar la statistica sin palpiri.
Poss jau midar dal cudeschet da statistica a l'app da pestga er durant la stagiun?
Na. Durant la stagiun currenta n'èsi betg pussaivel da midar dal cudeschet da statistica a l'app da pestga u viceversa.
Tge datas da l'app vegnan transmessas al UCP?
Las suandantas datas d'ina activitad registrada vegnan transmessas al UCP:
- mument dal cumenzament e da la finiziun d'ina activitad
- numer da l'aua nua ch'i vegn pestgà
- spezia da peschs, grondezza e mument ch'ils peschs èn vegnids pigliads
- diever d'estga natirala u artifiziala (sche quai vegn inditgà)
Poss jau midar u stizzar pli tard en l'app las activitads registradas?
Na. Suenter ch'ina activitad è vegnida arcunada, na pon ins betg pli midar u stizzar quella. Uschespert ch'ina activitad è vegnida arcunada, vegn ella transmessa al UCP e cumpara en Voss archiv.