Il traffic betg motorisà gioga ina rolla pli e pli impurtanta tant en il traffic quotidian sco er tar la concepziun dal temp liber ed en il turissem. Gia oz stattan a disposiziun als indigens ed als giasts var 11 000 kilometers sendas da viandar marcadas e passa 4000 kilometers rutas da velo da muntogna e vias da velo signalisadas sin territori grischun. Er sco part integrala da la mobilitad quotidiana è la valur dal velo creschida fermamain ils ultims onns. En spezial il velo electric (e-bike) po gidar a mitigiar las situaziuns cun il pli bler traffic.

Il traffic betg motorisà è la moda da sa mover a pe, sin rodas u sin rollas, particularmain il viandar, l'ir cun velo inclusiv l'ir cun velo da muntogna sco er l'avanzament cun urdains sumegliants a vehichels, sco per exempel inline-skates. Dal traffic betg motorisà na fan percunter betg part activitads da sport d'enviern (p.ex. passlung, ir cun gianellas), il chavaltgar sco er furmas dal traffic da l'aua e da l'aria (p.ex. riverrafting, parasgular). Tenor la lescha davart las vias dal chantun Grischun (LVias) è – sin plaun chantunal – cumpetent l'uffizi da construcziun bassa dal Grischun per ils fatgs dal traffic betg motorisà.

Cun quest post spezialisà vegn dada al traffic betg motorisà en il chantun Grischun quella impurtanza che al cumpeta pervia da ses avantatgs ecologics ed economics. Cun la lescha federala davart vias e sendas da viandar (LVS) ch'è entrada en vigur l'onn 1985 e cun la lescha davart las vias dal chantun Grischun (LVias) ch'è vegnida revedida l'onn 2016 vegnan definidas las incumbensas da la confederaziun, dal chantun e da las vischnancas en connex cun la planisaziun, cun la construcziun e cun il mantegniment da las raits dal traffic betg motorisà. Tenor la lescha chantunala davart las vias projecteschan, construeschan e mantegnan las vischnancas las infrastructuras dal traffic betg motorisà. Sco post spezialisà per il traffic betg motorisà coordinescha l'uffizi da construcziun bassa dal Grischun ils differents projects en il chantun, maina ils projects chantunals, maina las raits dal traffic betg motorisà ed è post da consultaziun per dumondas da contribuziun e cumpetent per la cussegliaziun professiunala.

Qua vai a la pagina d'internet dal post spezialisà per il traffic betg motorisà