Tenor la Regenza è la svelta e fitg buna superaziun da catastrofas e da situaziuns d'urgenza da gronda impurtanza per il chantun Grischun. En las revisiuns parzialas da las Leschas davart la protecziun da la populaziun e davart la protecziun civila integrescha ella perquai las enconuschientschas da crisas e da situaziuns d'urgenza dals ultims onns. La Regenza ha deliberà las missivas correspundentas per mauns dal Cussegl grond.

La Regenza ha mess en vigur per il 1. d'avrigl 2025, sco communitgà, l'obligaziun d'annunziar e da nettegiar bartgas (OANB) (communicaziun a las medias dals16 da december 2024).

La Regenza ha elegì Leta Steck-Rauch e Manuela Gebert sco novas commembras dal cussegl d'administraziun dals Servetschs psichiatrics dal Grischun (SPGR) per la perioda d'uffizi che dura fin ils 30 da zercladur 2026.

5 onns suenter l'erupziun da la pandemia e 3 onns suenter sia finiziun fan las autoritads grischunas da sanadad bilantscha. Il virus circulescha anc adina. SARS-CoV-2 pon ins attribuir oz ad ulteriurs virus che chaschunan infects respiratorics. En il fratemp è il decurs d'ina infecziun cun SARS-CoV-2 per il pli miaivel. Intginas persunas vegnan dentant anc adina fitg malsaunas e ston vegnir tractadas en l'ospital.

La Regenza ha prendì enconuschientscha dal rapport final davart il punct central da svilup «Turissem da sanadad Grischun».

Il chantun Grischun indemnisescha da nov il servetsch da pichet, che las spendreras ed ils gidanters da naschientscha independents furneschan per naschientschas a chasa e per assistenzas durant la pagliola.

Dals 17 fin ils 23 da mars 2025 ha lieu per l'emprima giada l'Emna d'acziun chantunala cunter il rassissem en il Grischun. Ensemen cun differentas organisaziuns, instituziuns e gruppas engaschadas metta il chantun uschia in signal cunter la discriminaziun e per ina societad averta ed inclusiva.

La taglia da traffic en il chantun Grischun duai vegnir calculada en l'avegnir tenor mesiras che correspundan al stadi actual da la tecnica da vehichels. Las taglias da traffic per autos da persunas duain da nov vegnir calculadas sin basa dal pais e da la prestaziun da norma empè da la cilindrada. Vehichels spezialmain effizients areguard l'energia duain profitar da rabats da durada limitada. La revisiun da la lescha ch'è necessaria per questas midadas ha la Regenza deliberà per la consultaziun.

En il rom da l'audiziun ha ina gronda part da las vischnancas, da las partidas e dals ospitals refusà la pussaivladad da conceder emprests transitorics als ospitals che han difficultads finanzialas. La Regenza desista da persequitar vinavant la proposta per garantir la liquiditad e da far avanzar ina revisiun parziala da la Lescha chantunala per promover la tgira da persunas malsaunas. Percunter duai il Model directiv concernent l'organisaziun dal provediment da la sanadad en il chantun Grischun vegnir reelavurà fin la fin dal 2025. Tant las partidas ch'èn stadas participadas a la consultaziun sco er la Regenza dattan gronda prioritad a quest giavisch.

Per garantir il provediment decentral da la sanadad da la populaziun grischuna er en l'avegnir, vul la Regenza pudair conceder emprests transitorics als ospitals en las regiuns da provediment da la sanadad. A medem temp duain las regiuns da provediment da la sanadad er survegnir dapli libertad organisatorica. La Regenza ha perquai avert la consultaziun tar la revisiun parziala da la Lescha per promover la tgira da persunas malsaunas e l'assistenza da persunas attempadas e da persunas che basegnan tgira.

En il rom d'ina denunzia penala ha l'Uffizi per la segirezza da victualias e per la sanadad d'animals contestà products da charn da la mazlaria dal Stabiliment giudizial Realta. Tranter auter era il cuntegn da charn-portg betg vegnì declerà u vegnì declerà en moda memia pauc precisa sin ils products. L'Uffizi per l'execuziun giudiziala ha reagì cun mesiras immediatas.