Cordial bainvegni sin la pagina d'internet dal DGSS

Chara visitadra, char visitader
Charas burgaisas e chars burgais

Il departament da giustia, segirezza e sanadad (DGSS) ademplescha incumbensas multifaras ed impurtantas per la populaziun dal chantun Grischun.

En il sectur da la giustia essan nus cumpetents per ina legislaziun moderna en dumondas da la constituziun chantunala, dal dretg civil, dal dretg penal e dal dretg administrativ, inclusiv il dretg processual. Nus exequin la surveglianza administrativa da la procura publica e da l'autoritad per la protecziun d'uffants e da creschids. Ultra da quai procurain nus per in'execuziun ordinada da chastis e da mesiras. Che las autoritads possian lavurar en moda efficazia en l'interess da la generalitad, è la finamira da nossa lavur en il sectur da la giustia.

En il sectur da la segirezza essan nus cumpetents per la polizia, per il traffic sin via, per la protecziun da la populaziun, per il militar, per la protecziun civila e per il manaschi dal stabiliment per l'execuziun giudiziala. L'assicuranza d'edifizis dal Grischun, ch'è suttamessa sco institut da dretg public a la surveglianza da la regenza, è medemamain affiliada a noss departament. Da garantir la segirezza publica, d'identifitgar e d'impedir en moda preventiva privels pussaivels e da reducir eventuals donns, da gidar svelt en cas da catastrofas e d'eveniments e da coordinar las prestaziuns d'agid necessarias èn las finamiras da nossa lavur en il sectur da la segirezza.

En il sectur da la sanadad essan nus cumpetents per il provediment da la sanadad, per la promoziun da la sanadad e per la prevenziun. Affiliads al DGSS èn er ils servetschs psichiatrics dal Grischun, che suttastattan sco institut da dretg public medemamain a la surveglianza da la regenza. Garantir in provediment sanitar ambulant e staziunar che correspunda als basegns e che ha ina qualitad optimala, mettend a disposiziun contribuziuns, e motivar la populaziun ad in stil da viver saun ed autodeterminà cun mesiras da la promoziun da la sanadad e da la prevenziun, quai èn las finamiras da nossa lavur en il sectur da la sanadad.

Ultra da quai è noss departament er cumpetent per ils fatgs dal stadi civil, per la migraziun e per l'integraziun. In tractament gist da tut las gruppas da persunas dal sectur d'asil sco er ina cussegliaziun ed in sustegn cumpetent en dumondas da la dimora, da las natiralisaziuns e dal dretg civil sco servetschs en l'interess da l'entira populaziun èn las finamiras da nossa lavur en quest sectur.

Ensemen cun mias collavuraturas e mes collavuraturs As stun jau gugent a disposiziun per dumondas e per infurmaziuns, e quai per telefon u per e-mail.

Peter Peyer, Cusseglier guvernativ
schef dal departament da giustia, segirezza e sanadad