Il post da polizia existent da Samedan ha il 1. d'avrigl 2022 fusiunà cun las basas da polizia San Murezzan, Silvaplauna e Castasegna sco er cun la basa da la polizia da traffic Engiadina ed è sa domicilià en la nova surbajegiada «Porta Samedan». Per pudair furnir il servetsch en moda confurma a las prestaziuns en la regiun d'acziun stattan – cumplementarmain a la nova basa da polizia Engiadin'Ota/Bregaglia – vinavant a disposiziun las localitads da biro a San Murezzan ed a Castasegna. Il biro a Silvaplauna è crudà davent per questa data.

Fin ch'il nov center administrativ regiunal a la staziun da Samedan po vegnir realisà, porscha la basa da polizia Engiadin'Ota/Bregaglia en la «Porta Samedan» cundiziuns optimalas a las collavuraturas ed als collavuraturs per furnir las prestaziuns en moda effizienta. Andrea Mittner, schef da la regiun Engiadina, di: «Questa basa moderna permetta d'avair ina survista e procura per curtas vias d'intervenziun.»

Il cumandant da la Polizia chantunala dal Grischun, colonel Walter Schlegel ha manegià pertutgant il di da las portas avertas dals 23 d'avrigl 2022 a Samedan: «Nus essan engraziaivels che la Regenza ans ha pussibilità questa basa en l'Engiadin'Ota. Quest plaschair avain nus vulì parter cun Vus durant il di da las portas avertas. Nus avain pudì porscher a passa 500 visitadras e visitaders ina invista dal mintgadi da la Polizia sco er da las activitads spezialas da l'equipa da l'Engiadin'Ota. In'occurrenza reussida che ha mussà la confidenza da la populaziun e dals giasts envers la Polizia chantunala dal Grischun sco er l'interess per nossa lavur e che ans collia cun Vus.»

Program dal di da las portas avertas