Cun la digitalisaziun van novas furmas d'instruir e d'emprender en la furmaziun supplementara poliziala interna. Il repertori metodologic è vegnì engrondì. Uschia vegnan cumbinads inputs da video ed ina instrucziun classica. En il sectur da la polizia da segirezza è vegnì emprendì cun in chaun da servetsch.

Per il bloc d'instrucziun «interrogaziun/investigaziun preliminara» han collavuraturas e collavuraturs da la polizia criminala producì aposta material da videos d'emprender. En l'instrucziun funghescha il schef da detachement alura sco moderatur, el lantscha lavurs da gruppa, maina discussiuns e preschenta soluziuns. Ina part dal bloc d'instrucziun dastgan las participantas ed ils participants absolver sco e-learning cun flexibilitad temporala e locala sco er tenor il tempo d'emprender individual.

Cybercrime resta part da la furmaziun supplementara annuala, perquai ch'il dumber da cyberdelicts crescha ad in crescher. Las polizistas ed ils polizists emprendan da lavurar en moda independenta en il sectur da responsabladad da las generalistas e dals generalists. Sustegn tecnic survegnan las generalistas ed ils generalists d'in agid online u d'ina app. Qua chattan ellas ed els er mesiras immediatas e recumandaziuns d'agir preventivas. Plinavant pon ellas ed els contactar en cas d'urgenza powerusers scolads u la hotline dal servetsch da cybercrime che liquidescha l'investigaziun digitala. A l'exempel dal cybercrime vesan ins l'impurtanza da la cumpetenza metodologica sco basa per l'abilitad da s'acquistar novas cumpetenzas specificas.

Collavuraziun cun ils chauns da servetsch
Hansjörg Sax, schef dals chauns da servetsch, infurmescha en ina lecziun da teoria: «Tar la Polizia chantunala dal Grischun avain nus tschintg differents tips da chauns d'acziun: Il classic chaun da protecziun, il chaun che detectescha narcotics, il chaun che detectescha persunas, il chaun che detectescha materias explosivas ed il chaun che detectescha bancnotas.»

En la part pratica vegn reducida la tema da sa scuntrar cun il chaun da servetsch. «Davent da l'entrada da la garascha fin en il tschaler da protecziun na dueva mes chaun Jack mai tutgar il terren», di Sax.

La finala vai per emprender ad enconuscher il wording tar ina intervenziun cun in chaun da protecziun. L'emprim percurs d'ina perquisiziun d'in edifizi fa la classa senza, alura cun il chaun.