Polycom è la designaziun per la rait radiofonica da segirezza naziunala che cuvra la surfatscha da l'entira Svizra. Grazia ad ella pon tut las autoritads e tut las organisaziuns activas en il sectur da salvament e da la segirezza (AOSS) da la Confederaziun, dals chantuns e da las vischnancas utilisar il contact radiofonic cuminaivel sur ina infrastructura unitara ed omogena. Las investiziuns ch'èn necessarias per quest intent, vegnan finanziadas da la Confederaziun e dals chantuns. Tranter ils onns 2001 fin 2015 han las raits parzialas dals chantuns e da la Confederaziun realisà ina rait radiofonica naziunala per la segirezza ch'è d'impurtanza naziunala. Dapi che quella è en funcziun vegn l'entira Svizra cuvrida da var 750 antennas che servan a passa 55 000 utilisadras ed utilisaders. Polycom na po betg vegnir tadlà giu e funcziuna independentamain dal provediment d'electricitad public. Per che Polycom possia vegnir utilisà vinavant, sto il sistem vegnir renovà pervia la midada da la tecnologia.

 

Questa renovaziun porta:

• in cumportament da midada da cellas pli svelt dals apparats radiofonics
• cuvrida sistematica da l'entira Svizra
• simplificaziun da l'utilisaziun en l'administraziun tactica
• configuraziun pli simpla da cellas da frequenzas singulas

Datas fundamentalas per il chantun Grischun (stadi 2023)

Lieus da radiofonia directiva                       134 (chantun GR + UDSC (*1))
Lieus da staziuns da basa                          89 (chantun GR + UDSC (*1))
Apparats radiofonics                                   ca. 2600 (gestids tras il center da cumpetenzas radiofonic da la Polizia chantunala GR)
Direcziun radiofonica                                  3 (Polizia chantunala (*2) CO (*3), Centrala (*4) 144, CA (*5) UDSC (*1))

En la rait parziala Grischun èn latiers vegnids planisads differents terms e projects:

• Project Remplazzament rait da radiofonia directiva chantunala Grischun RRCGR: Tar tut las staziuns da radiofonia directiva vegnan remplazzadas – senza interrupziun dal manaschi – las antennas, tut ils cabels sco er la hardware da sistem. Plinavant vegn la distribuziun d'electricitad adattada da nov. L'entira rait da radiofonia directiva po vegnir gestiunada e survegliada sur in nov management da rait. Il rollout als lieus è terminà fin la fin da december 2023. A partir d'alura è la rait da radiofonia directiva preparada per il proxim project. Tar quel vegnan installadas las novas staziuns da basa ch'èn sin basa dad IP.
• Mantegnair la valur da Polycom 2030 WEP2030: Ils sistems centrals per la nova infrastructura da Polycom èn en il fratemp installads ed en funcziun. Fin la fin da l'onn 2024 vegnan remplazzads – senza interrupziun dal manaschi – tut las staziuns da basa en la rait parziala Grischun. Tut l'infrastructura, la rait da radiofonia directiva sco er las staziuns da basa correspundan alura a la tecnologia dad IP actuala.
• Project RRCGR/ WEP2030: Tranter 2024/25 èn planisadas lavurs da demontascha, da demoliziun u da transferiments da las infrastructuras existentas.
• A partir da l'onn 2025 vegn la direcziun radiofonica da la centrala d'acziuns separada tranter la Polizia chantunala / Centrala 144 ed il UDSC (*1) ed adattada a la nova tecnologia dad IP.
  
• Preventiv Polizia chantunala GR 2025/26 (planisà)
  Remplazzament apparat radiofonic TPH-700 (apparats radiofonics da maun e da staziun) da la Polizia chantunala GR
• Preventiv Polizia chantunala GR 2025 – 2028 (planisà)
  Remplazzament apparat radiofonic TPM-700 (vehichels) da la Polizia chantunala GR

- - - - - - - - - - - - - - - - - - - - - - - - - - - - - - - -

(*1) Uffizi federal da la duana e da la segirezza dals cunfins
(*2) Polizia chantunala dal Grischun
(*3) Centrala d'acziuns
(*4) Centrala dal clom d'agid sanitar 144
(*5) Centrala d'acziuns