Controllas da vehichels
Ils termins pudais Vus spustar online. Sche quai na duess betg esser pussaivel, ans pudais Vus gugent contactar via las datas da contact qua sutvart:
Link: Noss lieus
Informaziuns impurtantas
Tut ils vehichels admess cun numers d'immatriculaziun ston vegnir controllads periodicamain da noss uffizi. Ils intervals da las controllas anflais Vus qua.
Nus As supplitgain da controllar, da nettegiar e – sche necessari – da laschar reparar il vehichel avant la controlla. Reparaturas provisoricas na pudain nus betg renconuscher.
Sche l'aura permetta, dastgais Vus preschentar il vehichel durant l'enviern cun pneus da stad. En mintga cas stoi esser pussaivel da far in viadi d'emprova.
Camiuns, autos da furniziun e chars annexs cun frain ston vegnir preschentads cun almain 75% dal pais total ch'è inscrit en il document dal vehichel.
Infurmaziun davart la novaziun en connex cun controllas da domicil da chars annexs cun frains cuntinuads anflais Vus qua.
Vehichels novs na ston betg vegnir preschentads cun chargia, sche lur tip è vegnì controllà ed approvà.
Dimensiuns maximalas da vehichels a motor e da chars annexs:
| ladezza |
2,55 m cun chargia, 2,60 m per vehichels isotermics |
| lunghezza |
12 m senza chargia, senza remortga a sella
16,5 m per camiuns cun remortga a sella
18,75 m per remortgas dublas |
| autezza |
4,00 m cun chargia |
Proceder da la controlla dal vehichel tar l'Uffizi per il traffic sin via (film)
Il suandant film illustrescha, co che l'Uffizi per il traffic sin via fa ina controlla posteriura periodica, quai a maun d'in exempel dal post da controlla Cuira:
Link al film Controlla posteriura tar l'Uffizi per il traffic sin via
Dumondas e respostas
Cura e nua stoss jau laschar controllar mes vehichel?
Tut ils vehichels admess cun numers d'immatriculaziun ston vegnir controllads periodicamain da noss uffizi. Nus As clamain a la controlla, uschespert ch'igl è necessari da far ina controlla da Voss vehichel. Ils intervals da las controllas chattais Vus qua.
Las controllas dals vehichels vegnan fatgas en plirs lieus en il chantun Grischun. Sin fundament da Voss lieu da domicil vegnis Vus clamads al lieu respectiv.
Po la controlla dal vehichel vegnir fatga en in auter chantun u a l'exteriur?
Sut las suandantas cundiziuns po la controlla dal vehichel vegnir fatga en in auter chantun:
- Ils termins dal chantun Grischun ston vegnir observads.
- Tramettai a nus immediatamain la clamada da l'auter chantun.
- Sche la procedura da controlla sto vegnir prolungada pervia d'ina reparatura, ans annunziai quai per plaschair immediatamain.
- Suenter la controlla essas Vus responsabla u responsabel, ch'il rapport da controlla incl. il document original dal vehichel vegnian tramess a la suandanta adressa:
Uffizi per il traffic sin via dal Grischun
Ringstrasse 2
7000 Cuira
Controllas dal vehichel a l'exteriur na vegnan betg renconuschidas
Perquai ch'i n'existan naginas cunvegnas bilateralas tranter la Svizra e la UE areguard la renconuschientscha vicendaivla da las controllas da vehichels, na vegnan concedidas naginas permissiuns per controllas dal vehichel a l'exteriur.
Ils vehichels ch'èn immatriculads en Svizra, ma ch'èn staziunads a l'exteriur, ston vegnir prendids ord circulaziun e survegnir numers d'immatriculaziun dal stadi da domicil. Sche quai na vegn betg fatg, ston tals vehichels vegnir controllads d'in post da controlla en Svizra.
Tge midadas stoss jau laschar controllar uffizialmain?
Midadas vi da vehichels ston vegnir annunziadas a noss uffizi. Nus essan obligads da controllar vehichels midads avant ch'els vegnan puspè duvrads.
En spezial sto vegnir annunzià il suandant:
- midada da la classificaziun dal vehichel;
- midada da las dimensiuns, da la distanza axiala, da la distanza tranter las rodas, dals pais;
- intervenziuns che midan las emissiuns da svapur u da canera;
- indriz da sbuf che n'è betg approvà per il tip da vehichel;
- midada vi da la transmissiun;
- rodas che n'èn betg approvadas per il tip da vehichel;
- midada vi dal guvernagl u vi dals frains;
- montascha d'in indriz per trair chars annexs;
- tut las autras midadas essenzialas.
Tge preparaziuns stoss jau far, avant che preschentar mes vehichel?
Nus As supplitgain da controllar, da nettegiar e – sche necessari – da laschar reparar il vehichel avant la controlla. Reparaturas provisoricas na pudain nus betg renconuscher.
Ston autos da furniziun e chars annexs vegnir preschentads cun chargia?
Camiuns, autos da furniziun e chars annexs cun frain ston vegnir preschentads cun almain 75% dal pais total ch'è inscrit en il document dal vehichel.
Dastg jau preschentar mes vehichel l'enviern cun pneus da stad?
Sche l'aura permetta, dastgais Vus preschentar il vehichel durant l'enviern cun pneus da stad. En mintga cas stoi esser pussaivel da far in viadi d'emprova.
Betg reussì la controlla dal vehichel, e lura?
Sin il rapport da controlla che Vus survegnis suenter la controlla, èn menziunads il resultat da la controlla e las reclamaziuns che ston vegnir messas en urden.
Resultat «betg reussì (conferma da reparatura)»:
Las mancanzas pon ins laschar reparar e confermar d'in manaschi autorisà tras l'Uffizi per il traffic sin via.
L'autorisaziun per emetter confermas da reparatura vegn concedida ad in manaschi che fa per regla part d'ina federaziun professiunala, quai tras cunvegnas spezialas cun l'Uffizi per il traffic sin via. Cun la conferma da reparatura declera il manaschi privat d'avair reparà tenor las prescripziuns las mancanzas ch'èn vegnidas constatadas da l'Uffizi per il traffic sin via sin il rapport uffizial da la controlla dal vehichel. La conferma da reparatura ha l'effect d'ina controlla posteriura uffiziala.
Glista dals manaschis ch'èn autorisads per mesiraziuns da particlas
Glista dals manaschis ch'èn autorisads d'emetter confermas da reparatura
Resultat «betg reussì (nov termin)»:
Nus As tramettain immediatamain in nov termin per laschar controllar il vehichel anc ina giada suenter l'eliminaziun da las mancanzas.
Reussì la controlla dal vehichel, e lura?
Suenter ina controlla dal vehichel reussida survegnis Vus directamain al lieu il document actualisà dal vehichel. Las taxas per la controlla As vegnan messas a quint.
Quant importan las taxas per las controllas dals vehichels?
Las taxas generalas per il traffic sin via dal chantun Grischun chattais Vus qua.