Intervals da las controllas
Cura stuais Vus puspè preschentar Voss vehichel?
L'emprima giada 1 onn suenter l'emprima immatriculaziun, alura mintga onn:
- vehichels per il transport professiunal da persunas, cun excepziun da vehichels che vegnan duvrads tenor l'art. 4 al. 1 lit. d da l'ordinaziun davart il temp da lavur e da repaus dals manischunzs professiunals da vehichels levs per il transport da persunas e d'autos da persunas grevs (OLR 2),
- autocars,
- chars annexs per il transport da persunas,
- vehichels ch'èn destinads al transport da rauba privlusa e che ston vegnir controllads mintga onn tenor l'ordinaziun davart il transport da rauba privlusa sin via (SDR).
L'emprima giada 2 onns suenter l'emprima immatriculaziun, la segunda giada suenter 2 onns ed alura mintga onn:
- camiuns cun ina sveltezza maximala da passa 45 km/h,
- camiuns a sella cun in pais total da passa 3,5 t e cun ina sveltezza maximala da passa 45 km/h,
- chars annexs per il transport da chaussas cun in pais total da passa 3,5t e cun ina sveltezza maximala admessa da passa 45 km/h.
Sche vehichels tenor las cifras 1–3 na vegnan betg mo duvrads per il traffic naziunal, na dastga l'ultima examinaziun uffiziala dal vehichel betg esser stada avant dapli che 1 onn. Las possessuras ed ils possessurs ston procurar sezs ch'ils vehichels vegnian examinads a temp.
L'emprima giada 4 onns suenter l'emprima immatriculaziun, la segunda giada suenter 3 onns ed alura mintga 2 onns:
- minibus,
- autos da furniziun,
- camiuns cun ina sveltezza maximala fin 45 km/h,
- camiuns a sella cun in pais total fin 3,5 t u cun ina sveltezza maximala fin 45 km/h,
- rulottas a motor e vehichels cun ina carossaria endrizzada sco local.
L'emprima giada 5 onns, dentant fin il pli tard 6 onns suenter l'emprima immatriculaziun, la segunda giada suenter 3 onns ed alura mintga 2 onns:
- autos da persunas levs e grevs,
- motos,
- vehichels a motor levs, vehichels a motor pitschens e vehichels a motor a trais rodas,
- chars annexs da transport, inclus chars annex cun ina carossaria endrizzada sco local, cun in pais total da passa 0,75 t, permess che il chars na crudan betg sut la letra a cifras 3 u 4, letra a fin cifra 3 u letra e cifra 5.
L'emprima giada 5 onns suenter l'emprima immatriculaziun, alura mintga 3 onns ston vegnir controllads ils suandants vehichels cun numers d'immatriculaziun:
- tractors industrials,
- maschinas da lavur.
L'emprima giada 5 onns suenter l'emprima immatriculaziun, alura mintga 5 onns ston vegnir controllads ils suandants vehichels cun numers d'immatriculaziun:
- chars a motor,
- chars da lavur,
- vehichels agriculs a motor,
- vehichels a motor d'in ischigl,
- chars annex cun in pais total da passa 0.75 t da vehichels suenter cifra 1-4.
- chars annexs da lavur, cun excepziun da chars annex cun in pais total fin 0.75 t, sco era chars annexs dals pumpiers e da la protecziun civila.