En il rom da la Strategia Administraziun digitala Grischun 2024–2028 ha la Regenza stgaffì – cun la Lescha davart l'Administraziun digitala (LAD; DG 177.100) – la basa legala per introducir open government data (OGD) en l'administraziun chantunala. Per realisar questa finamira strategica è vegnida concludida la mesira S11a, che prevesa d'etablir ina plattafurma OGD per publitgar open data administrativas. La finamira da la plattafurma è quella da metter a disposiziun ina purschida da basa dad open data administrativas che stat a la libra disposiziun da gruppas d'utilisaders interns sco er externs. La responsabladad per installar, manar e sviluppar vinavant la plattafurma OGD ha dapi il 1. da schaner 2024 la partiziun Datas e statistica da l'Uffizi per economia e turissem.

L'onn 2024 è il process d'acquisiziun da la plattafurma da datas vegnì terminà cun success. L'onn 2025 cumenza l'installaziun tecnica da la plattafurma, accumpagnada dal svilup dals process per publitgar las datas. Silsuenter vegnan quests process examinads ed optimads en projects da pilot che vegnan realisads ensemen cun auters uffizis. Ils process vegnan documentads en prescripziuns interdisciplinaras da governance. Suenter ch'ils tests èn vegnids terminads cun success, vegn il project transferì en il manaschi regular sco er extendì pass per pass sin ulteriurs posts da servetsch.