Perspectivas positivas per l'avegnir per interpresas, cundiziuns generalas stabilas, fidadas ed attractivas èn premissas per in svilup economic, servan a la resilienza cunter sfidas ed èn uschia adina er in'empermischun per la populaziun indigena.

Sco post da contact per l'economia s'engascha il UET per interpresas existentas e novas en il Grischun cun la finamira, che quellas possian trair a niz cumplainamain lur potenzial da svilup.

Curt: L'Uffizi per economia e turissem (UET) procura per cundiziuns generalas optimalas a favur da l'economia en il chantun Grischun.

Nossas gruppas da clientella e nossas finamiras

Cun ina vasta purschida da servetschs accumpagnain e sustegnain nus interpresas, instituziuns da perscrutaziun, regiuns u vischnancas. Nus promovain projects dals differents secturs da l'economia, per exempel innovaziun, tecnologia, turissem, sanadad, furmaziun u svilup regiunal.

Nossas finamiras cuminaivlas: Rinforzar il Grischun sco plazza economica, promover innovaziuns, stgaffir avantatgs economics per interpresas en il Grischun, meglierar cuntinuadamain la cumpetitivitad dal chantun, garantir plazzas da lavur e stgaffir persistentamain novas.

Nossa purschida da prestaziuns

Il post da contact per economia è l'one-stop-shop per dumondas d'interpresas. El sustegna projects d'expansiun u da domiciliaziun, gida tar dumondas concretas, porscha access ad instruments da promoziun statals e favurisescha activitads innovativas d'interpresas. Uschia vegnan stgaffids impuls per investiziuns en il chantun e – collià cun quai – per activitads da valurisaziun persistentas e per la creaziun da plazzas da lavur.

Per il svilup da las firmas activas en il Grischun èn il transfer da savida sco er il management da relaziuns centrals. Il post da contact per economia pussibilitescha ad interpresas il barat cun expertas ed experts sco er cun instituts da tecnologia relevants (p.ex. il CSEM) e stabilescha contacts cun scolas autas e cun instituts da perscrutaziun (tranter auter UZH, SPFT, SASGR).

Pervia da sia impurtanza per l'economia publica per il chantun, na sa concentrescha il svilup da l'economia locala betg mo sin ils instruments da la politica da l'innovaziun, mabain er sin la promoziun da l'ulteriur svilup dal turissem.

Cun nossas retschertgas da datas, nossas analisas e noss rapports da basa cumplettain nus nossa purschida da prestaziuns per la populaziun e per las interpresas dal Grischun.

Nossas incumbensas legalas

Cun la Lescha per promover il svilup economic en il chantun Grischun (LSE) ha il Grischun ina basa che persequitescha la finamira d'augmentar l'abilitad da cumpetitivitad e d'innovaziun dal Grischun sco plazza economica, da mantegnair u d'augmentar la valurisaziun en il chantun sco er da garantir las plazzas da lavur existentas e da stgaffir novas. Sco instruments prevesa la LSE emprests e contribuziuns.

Ulteriurs instruments da promoziun dal chantun Grischun èn programs e projects d'infrastructura da la Confederaziun e dals chantuns en il rom da la Nova politica regiunala da la Confederaziun (NPR) sco er dals Sistems d'innovaziun regiunals (SIR) – en spezial la Rait d'innovaziun da la Svizra Orientala (INOS) ed il Sistema Regionale dell'Innovazione (SRI). Cun quests instruments da promoziun pon interpresas grischunas profitar da differentas prestaziuns.