Dapi passa 50 onns s'engaschan las collavuraturas ed ils collavuraturs dal UNA per in Grischun cun ina natira ed in ambient intact. Ellas ed els procuran che las generaziuns futuras hajan aua clera, aria netta, terrens fritgaivels, prads cun ina gronda varietad da flurs e cuntradas natiralas intactas sco basa da viver. Lur lavur s'orientescha en emprima lingia a las leschas federalas davart la protecziun da las auas, da l'ambient, da la natira e da la patria sco er a la Lescha davart il CO2. En il chantun Grischun è numnadamain il UNA per gronda responsabel part per realisar questas leschas.

La necessitad da proteger las auas è vegnida identifitgada relativamain baud. Fin l'onn 1969, cura ch'il «Uffizi per la protecziun da las auas» è vegnì creà, ha la protecziun da las auas gì ina posiziun impurtanta tar l'Uffizi da meglieraziun e mesiraziun. Gia l'onn 1968 è vegnì fundà il «Uffizi per la tgira da la cuntrada e la protecziun da la natira» (UTP). L'onn 1985 è il num dal «Uffizi per la protecziun da las auas» vegnì midà ad «Uffizi per la protecziun da l'ambient» (UPA). A medem temp ha l'uffizi er survegnì incumbensas supplementaras. L'onn 1999 ha il «Uffizi per la protecziun da l'ambient» survegnì ina designaziun pli curta, numnadamain «Uffizi per l'ambient» (UPA). Il «Uffizi per la tgira da la cuntrada e la protecziun da la natira» ha gì num dapi lura «Uffizi per la natira e la cuntrada» (UNC). L'onn 2003 èn il «Uffizi per l'ambient» ed il «Uffizi per la natira e la cuntrada» vegnids fusiunads al nov «Uffizi per la natira e l'ambient» (ANU).

Ensemen cun las regulaziuns legalas han novas vistas ed opiniuns en la populaziun procurà che l'ambient n'è betg pli engrevgià uschè fitg sco anc avant 50 onns. Tuttina sa preschentan adina puspè novas sfidas al chantun, che ha entant var 198 000 abitantas ed abitants (stadi 2020): spezias e spazis da viver sa reduceschan vinavant, il clima sa mida, en las auas s'accumuleschan pesticids e microcontaminaziuns, e l'aria cuntegna memia blera pulvra fina. Il UNA sa stenta da cumbatter questas situaziuns nuncunvegnentas en moda cumpetenta ed efficazia, a favur da nossa sanadad sco er a favur da la sanadad da la natira e da l'ambient.