Per lung da la A13 èn las relaziuns igienicas en la gronda part dals areals da spetga per il traffic pesant anc adina nuncuntentaivlas, perquai ch'ils indrizs sanitars mancan u n'adempleschan betg las pretensiuns minimalas.
Schebain che la centrala svizra per la gestiun dal traffic ha renconuschì ch'i dettia qua in basegn d'agir, è la situaziun invariada.
Cunzunt cur ch'il traffic pesant stat airi, in fatg che po capitar da tut temp, er en vista a las relaziuns meteorologicas extremas dal proxim enviern, èn ils areals da spetga emplenids regularmain fitg svelt. Tut tenor pon ils temps da spetga durar pliras uras u plirs dis.
Ils manischunzs n'han naginas alternativas e ston spetgar en lur vehichels fin ch'els pon cuntinuar cun lur viadi. Quai fa daventar la situaziun igienica svelt nuncuntentaivla u schizunt insupportabla.
Las persunas che vivan en la vischinanza dals differents areals da spetga per lung da la A13 daventan pli e pli malpazientas, perquai ch'ellas sentan en moda dischagreabla las consequenzas da las tualettas e dals indrizs sanitars mancants.
Las sutsegnadras ed ils sutsegnaders supplitgeschan perquai la regenza da respunder las suandantas dumondas:
1. È er la regenza da l'avis ch'ils indrizs sanitars en la gronda part dals areals da spetga per lung da la A13 ston vegnir meglierads svelt?
2. È la regenza al current davart las mesiras da meglieraziun ch'èn vegnidas realisadas quest onn u che vegnan realisadas proximamain?
3. Vesa la regenza la pussaivladad ch'il chantun procuria per soluziuns transitoricas provisoricas fin ch'igl è avant maun in concept general da la confederaziun per ina gestiun futura dal traffic pesant sin tut las axas da transit?
4. È la regenza pronta da s'engaschar cun tut sia forza tar l'uffizi federal da vias, per che questa situaziun possia vegnir eliminada bainbaud?
Cuira, ils 9 da december 2009
Casparis-Nigg, Stoffel (Valragn), Plozza, Barandun, Bezzola (Samedan), Bezzola (Zernez), Bleiker, Blumenthal, Brandenburger, Castelberg-Fleischhauer, Caviezel (Pitasch), Caviezel-Sutter (Tusaun), Claus, Clavadetscher, Conrad, Dermont, Donatsch, Fasani, Hartmann (Cuira), Hartmann (Champfèr), Jäger, Jenny, Kleis-Kümin, Koch, Krättli-Lori, Marti, Mengotti, Meyer Persili (Cuira), Meyer-Grass (Claustra Vitg), Nick, Noi-Togni, Pedrini, Peer, Perl, Peyer, Pfäffli, Pfenninger, Portner, Quinter, Ragettli, Righetti, Stiffler, Thomann, Toschini, Trepp, Troncana-Sauer, Valär, Vetsch (Pragg-Jenaz), Wettstein, Cattaneo, Davaz, Engler, Furrer-Cabalzar, Gassmann, Gunzinger, Largiadèr, Schädler, Stoffel (Tavau)
Resposta da la regenza
Il problem dals indrizs sanitars per part insuffizients en ils areals da spetga per lung da la via naziunala A13 è enconuschent a la regenza. Ella è perquai intervegnida il matg 2009 tar l'uffizi federal da vias. La confederaziun vesa en general in basegn d'agir per ils areals da spetga per lung da la A13 ed elavura il mument in concept general per il manaschament futur dal traffic pesant. In object da questa examinaziun è er l'infrastructura dals areals da spetga.
Davart las dumondas concretas s'exprima la regenza sco suonda:
1. La regenza è er da l'avis ch'i dettia effectivamain in basegn d'agir sin ils areals da spetga, cun excepziun dals areals da spetga che vegnan duvrads principalmain (Cuira sid, Valragn, San Bernardino, plazza da paus Campagnola), nua ch'i dat indrizs sanitars.
2. I n'èn enconuschentas naginas mesiras da meglieraziun che fissan vegnidas realisadas l'onn passà resp. che vegnissan realisadas proximamain.
L'UVIAS sclerescha actualmain la dumonda, sche meglieraziuns èn necessarias per ils areals da spetga che vegnan duvrads mo a curta vista (fasa cotschna) sco er, sch'i duain vegnir creadas plazzas adattadas cun l'infrastructura necessaria per temps da spetga resp. per dimoras pli lungas. Resultats n'èn betg anc avant maun.
3. Il chantun na prevesa naginas mesiras provisoricas per schliar temporarmain il problem, perquai che la confederaziun, sco proprietaria da las vias naziunalas, è cumpetenta per quai.
4. La regenza è gia intervegnida tar la confederaziun e vegn a s'engaschar per ina meglieraziun uschè svelta ed uschè effectiva sco pussaivel.
27 da schaner 2010