La carta dal di "vischnanca" è in bigliet apprezià che vala sin tut la rait dal traffic public da la Svizra (cun excepziun da las telefericas) e che vegn vendì mo da las vischnancas. En il chantun Grischun vendan circa 40 vischnancas, per gronda part las vischnancas pli grondas, quest bigliet.
La carta dal di "vischnanca" è per las abitantas e per ils abitants dal Grischun spezialmain attractiva, perquai che las vischnancas tegnan bass ils pretschs da vendita e perquai ch'i na basegna betg in abunament da mesa taxa per duvrar questa carta dal di. La carta dal di "vischnanca" custa per regla 35 francs tar las vischnancas grischunas, ina carta dal di normala custa percunter 64 francs tar la Viafier retica (VR) u tar las Viafiers federalas (VFF). La carta dal di è in bigliet pauschal tipic cun in pretsch ch'è independent da la distanza che vegn fatga. Da tals bigliets pon profitar las abitantas ed ils abitants da las regiuns periferas, perquai ch'ellas ed els ston per regla far distanzas pli lungas.
Tenor ina communicaziun da la federaziun per il traffic public e da las VFF a las medias dals 14 da schaner 2010 duai la carta dal di "vischnanca" daventar – a partir dals 12 da december 2010 – 15 pertschient pli chara e valair da nov pir a partir da las 9.00 ils lavurdis (glindesdi fin venderdi), las fin d'emnas dentant senza restricziuns sco enfin ussa.
Questa restricziun da l'utilisaziun da la carta dal di "vischnancas" inventada da nov e concludida da las viafiers ha in effect direct per las regiuns periferas. Tgi che sto far distanzas pli grondas, dovra er dapli temp per quai resp. sto sa metter en via pli baud. Tgi che vul ir en in'aglomeraziun gronda svizra sco Grischuna u sco Grischun, piglia per regla il tren u il bus avant las 9.00. Ina carta dal di "vischnanca" che vala pir a partir da las 9.00 vegn pervia da quai ad esser induvrabla per bleras abitantas e per blers abitants da las regiuns periferas da la Svizra. Questa mesira renda il traffic public – ed en general la vita en las regiuns periferas – pli inattractiv.
L'augment extraordinari dal pretsch da la carta dal di "vischnanca" da 15 pertschient (da 9'775.– francs sin 11'300.– francs per 365 cartas dal di) che las viafiers han concludì per ils 12 da december 2010 è massiv. Quest augment va cumplainamain sin donn e cust da las utilisadras e dals utilisaders dal bigliet pauschal resp. da las abitantas e dals abitants da las regiuns periferas. La restricziun da l'utilisaziun a partir da las 9.00 ch'è vegnida concludida supplementarmain va dentant memia lunsch.
En vista a quests fatgs fan las sutsegnadras ed ils sutsegnaders las suandantas dumondas:
1. È er la regenza da l'avis che la carta dal di "vischnanca" è in bigliet ch'è concepì spezialmain per las abitantas e per ils abitants da regiuns periferas e ch'el sto pervia da quai vegnir mantegnì en sia attractivitad actuala?
2. Co giuditgescha la regenza las pussaivladads da prender influenza, per exempel da tschertgar il dialog en collavuraziun cun autras regenzas chantunalas via CTP (conferenza da las directuras e dals directurs chantunals dal traffic public) per contractar cun las interpresas da transport svizras e da s'engaschar ch'ellas renunzian a la restricziun da l'utilisaziun da la carta dal di "vischnanca"?
3. Co pudess la regenza sustegnair las vischnancas da mantegnair l'attractivitad da la carta dal di "vischnanca"? Èsi en ils egls da la regenza raschunaivel e realisabel cun success da motivar la Viafier retica, l'Auto da posta dal Grischun e las ulteriuras interpresas grischunas dal traffic public da renunziar a la restricziun d'utilisaziun che vegn eventualmain introducida?
Cuira, ils 21 d'avrigl 2010
Michel, Niederberger, Barandun, Berther (Sedrun), Bezzola (Zernez), Bleiker, Blumenthal, Buchli, Bühler-Flury (Schiers), Campell, Casparis-Nigg, Casty, Casutt, Caviezel (Pitasch), Christoffel-Casty, Clavadetscher, Conrad, Darms-Landolt, Dermont, Feltscher, Hardegger, Hartmann (Cuira), Jenny, Keller, Kessler, Koch, Kollegger, Kunz (Cuira), Märchy-Michel (Malans), Mengotti, Möhr, Parolini, Parpan, Peer, Perl, Pfister, Plozza, Portner, Quinter, Ragettli, Righetti, Rizzi, Sax, Thomann, Tuor, Valär, Vetsch (Claustra Vitg), Bühler-Hunger (Valendau), Cortesi, Furrer-Cabalzar, Hartmann (Küblis), Kunz (Fläsch), Schädler
Resposta da la regenza
Per ils 12 da december 2010 han las interpresas da transport dal traffic public concludì differentas mesiras tariffaras. Tranter auter duain ils pretschs da las cartas dal di da las vischnancas vegnir augmentads massivamain, e lur valaivladad duai vegnir restrenschida. Questas cartas dal di fissan valaivlas da glindesdi fin venderdi mo pli a partir da las 9.00.
L'augment dal pretsch è bain chapibel per la regenza, la restricziun da la valaivladad avess dentant effects fitg negativs per las regiuns periferas. Qua tras vegniss probablamain tschernì pli savens in med da transport dal traffic individual. Berna p.ex. fiss cuntanschibel davent da Cuira il pli baud a las 11.29 cun ina carta dal di da las vischnancas, davent da San Murezzan schizunt pir a las 13.29. Er en la cuntradirecziun cuntanschess ins tard las regiuns periferas, uschia che p.ex. excursiuns d'in di cun il traffic public en il Grischun daventassan main attractivas. L'attractivitad da las cartas dal di da las vischnancas sa reduciss massivamain. Consequentamain dastgass la vendita da talas cartas dal di sa diminuir fermamain, perquai che las vischnancas na vulan betg stuair vender purschidas nunattractivas. Ellas portan numnadamain sulettas la ristga da vendita.
Dapi ch'ils novs pretschs e la restricziun da la valaivladad èn vegnids enconu-schents, èn gia differentas vischnancas, ma er l'associaziun da las vischnancas svizras e l'uniun da las citads svizras sa drizzadas en chaussa al gremi tariffar cumpetent (uniun dals transports publics [UTP] / cumissiun per il traffic public). Pendenta è er anc la posiziun dal survegliader dals pretschs davart questas mesiras tariffaras.
Da vart dal chantun è il departament cumpetent da construcziun, traffic e selvicultura s'occupà da quest tema gia avant l'inoltraziun da la dumonda parlamentara qua avant maun, ed ha dumandà l'UTP da laschar crudar almain la restricziun dal temp u d'examinar ina differenziaziun dals pretschs (pretschs pli auts da glindesdi fin venderdi). En sia resposta ha l'UTP empermess da chattar soluziuns ensemen cun l'associaziun da las vischnancas svizras e cun l'uniun da las citads svizras.
Uschia pon las dumondas concretas vegnir respundidas sco suonda:
1. La regenza va d'accord cun l'opiniun formulada en la dumonda.
2. Las pussaivladads da la regenza da far valair sia influenza èn restrenschidas, cunquai che la suveranitad tariffara sa chatta formalmain tar las interpresas da transport. Tut tenor il resultat da las tractativas cun l'UTP è er raschunaivla ina collavuraziun en il rom da la conferenza da las directuras e dals directurs chantunals dal traffic public (CTP).
3. La regenza sustegna las vischnancas en il rom da sias pussaivladads. Percunter è ella da l'avis ch'i na saja strusch pratitgabel e pauc raschunaivel per las interpresas grischunas da transport dal traffic public da tscherner in'atgna via tariffara.
3 da zercladur 2010