Navigation

Inhaltsbereich

Dumonda Dudli concernent la realisaziun da la refurma da l'imposiziun da taglia sin interpresas en il chantun Grischun / program da spargn per sanar las finanzas chantunalas

Sessiun: 01.09.2016

Las chombras federalas han rectifitgà e deliberà la refurma da l'imposiziun da taglia sin interpresas III (RITI III). Per reducir las taglias sin il gudogn d'interpresas vegn auzada la quota dal chantun vi da la taglia federala directa dad actualmain 17 % a 21,2 %. Da nov duain las dividendas da participaziuns da passa 10 % vegnir suttamessas a la taglia cun almain 60 %. Fin ussa vegniva incassada en il chantun Grischun ina taglia fixa da 60 % sin talas dividendas. Ils privilegis fiscals d'enfin ussa vegnan remplazzads tras la «patent box» che serva a suttametter a la taglia en moda privilegiada ils retgavs che resultan da dretgs da bains immaterials, e tras l'uschenumnada «promoziun da l'input» che permetta da deducir da la taglia las expensas da perscrutaziun a passa 100 % dals custs effectivs. Er per scuvrir reservas zuppadas valan cundiziuns favuraivlas. La finala è vegnida introducida ina taglia sin il gudogn cun tschains rectifitgads.

 

En almain 14 chantuns èsi gia concludì u planisà da reducir las taglias sin il gudogn d'interpresas, uschia p.ex. er en ils chantuns Turgovia e Tessin. Ils chantuns Son Gagl e Turitg vulan spetgar las mesiras d'auters chantuns (NZZ dals 12 da matg 2016). Gia oz ston interpresas en il chantun Grischun pajar dapli taglia che p.ex. en ils chantuns Glaruna, Turgovia ed en ils dus Appenzells (NZZ dals 20 da schaner 2016). Il chantun Vad ha gia concludì ina reducziun da 21,65 % a 13,8 %. Schaffusa – gia oz tschintg rangs avant il Grischun – annunzia ina reducziun dad actualmain 16,08 % a 12 % fin 12,5 %.

 

Tenor la voluntad da la regenza duess il Grischun avair in rang en l'emprima mesadad dals chantuns areguard la grevezza fiscala da las persunas giuridicas. Quai na vegn betg pli ad esser pussaivel suenter la realisaziun da la RITI III.

 

Gia per l'onn 2016 è budgetà in deficit da 50,8 milliuns francs en il chantun Grischun. Tenor il plan da finanzas duai il deficit importar 40,3 milliuns francs l'onn 2017, 73,1 milliuns francs l'onn 2018 e schizunt 89,3 milliuns francs l'onn 2019.

 

En vista a quests fatgs vegn la regenza dal chantun Grischun supplitgada da respunder las suandantas dumondas:

 

1. Ha la regenza l'intenziun da procurar che la cumpetitivitad fiscala areguard l'imposiziun da taglia sin interpresas restia – cumpareglià cun auters chantuns – sin in rang en l'emprim terz?

 

2. È la regenza pronta da trair a niz resp. da realisar las pussaivladads da stgaffir «patent boxes» sco er las pussaivladads da deducir las expensas per la perscrutaziun ed il svilup (P+S) en la dimensiun maximala admissibla tenor la legislaziun federala?

 

3. Co quinta la regenza da dar vinavant a las interpresas la quota pli auta dals chantuns vi da la taglia federala directa?

 

4. È er la regenza da l'avis ch'in clima fiscal favuraivel per interpresas saja in dals meds ils pli impurtants e pli effizients per mantegnair la cumpetitivitad dal Grischun sco lieu economic e per domiciliar novas interpresas?

 

5. Ha la regenza – ultra da dar vinavant a las interpresas la quota pli auta vi da la taglia federala directa, d'exaurir cumplainamain las pussaivladads en connex cun las «patent boxes» e cun la deducziun da las expensas P+S sco er cun las taglias sin il gudogn cun tschains rectifitgads – l'intenziun da prevair ulteriuras distgargias fiscalas per las interpresas ed uschia da rinforzar l'attractivitad dal Grischun sco lieu economic e las cundiziuns generalas economicas dal chantun Grischun?

 

6. Ha la regenza l'intenziun da mantegnair senza midadas l'imposiziun privilegiada da dividendas?

 

7. È la regenza – en vista al svilup inevitabel preschentà qua survart tar l'imposiziun da taglia sin interpresas sco er en vista al pegiurament acut da las finanzas chantunalas – er da l'avis ch'in program da spargn ed augments da l'effizienza tar l'administraziun sco er tar l'impundaziun dals meds publics sajan indispensabels?

 

8. Tge mesiras ha la regenza l'intenziun da realisar e cura vul ella far quai?

 

Cuira, il 1. da settember 2016

 

Dudli, Kunz (Cuira), Geisseler, Blumenthal, Bondolfi, Brandenburger, Buchli-Mannhart, Burkhardt, Caduff, Casanova-Maron (Domat), Casty, Caviezel (Tavau Clavadel), Claus, Clavadetscher, Davaz, Engler, Giacomelli, Hitz-Rusch, Hug, Jeker, Jenny, Kasper, Koch (Tumein), Koch (Igis), Komminoth-Elmer, Kunz (Fläsch), Lamprecht, Lorez-Meuli, Mathis, Michael (Donat), Müller, Niggli-Mathis (Grüsch), Papa, Pedrini, Salis, Schutz, Steck-Rauch, Steiger, Stiffler (Tavau Plaz), Stiffler (Cuira), Tenchio, Thomann-Frank, Troncana-Sauer, Vetsch (Claustra Vitg), Vetsch (Pragg-Jenaz), Waidacher, Wieland, Zanetti, Gujan-Dönier, Stäbler

Resposta da la regenza

La refurma da l'imposiziun da taglia sin interpresas III (RITI III) è vegnida deliberada da las chombras federalas ils 17 da zercladur 2016. Cunter quest relasch è vegnì fatg ed è reussì il referendum. La votaziun è previsa per ils 12 da favrer 2017. Igl è planisà da metter en vigur la revisiun per il 1. da schaner 2019.

Al legislatur chantunal resta pauc temp per realisar la RITI III en il dretg chantunal. Tenor il plan da termins actual da la regenza è planisada ina procedura da consultaziun dal mars fin il zercladur 2017, e las tractativas parlamentaras èn previsas per la sessiun d'avrigl 2018.

Actualmain n'è la regenza betg anc s'occupada profundamain cun la realisaziun da la RITI III, uschia che las dumondas qua sutvart na pon betg vegnir respundidas en detagl. Davart las differentas dumondas prenda la regenza posiziun sco suonda:

1. Igl è la finamira da la regenza da mantegnair la cumpetitivitad fiscala areguard l'imposiziun da taglia sin interpresas, uschenavant che la situaziun finanziala dal chantun e da las vischnancas permetta quai. Sch'in rang en l'emprima mesadad da tut ils chantuns sa lascha tegnair en quest connex, na po actualmain betg vegnir giuditgà.

2. I sto vegnir examinà, sch'i duai vegnir prendida en mira ina reducziun moderada da la taglia sin il gudogn cun in'auta distgargia en las differentas mesiras da cumpensaziun ("patent box" e.u.v.) ubain ina reducziun pli ferma da la taglia sin il gudogn cun regulaziuns spezialas main attractivas.

3. Tenor las calculaziuns approximativas actualas da la confederaziun vegnan ils retgavs supplementars, che resultan da la quota pli auta da la taglia federala directa, consumads tras il minus d'entradas che resulta da la gulivaziun da las resursas da la NGF da la confederaziun. I na resta nagin surpli che po vegnir repartì.

4. Gea, il clima fiscal è in factur local fitg impurtant. Sco gia explitgà en la missiva tar la lescha davart il svilup economic, èn dentant er la coordinaziun dals secturs politics (traffic, planisaziun dal territori, furmaziun, ambient fiscal e.u.v.) sco er lur orientaziun a las finamiras dal svilup economic d'ina impurtanza centrala per il svilup da l'economia chantunala (missivas, carnet nr. 2/2015-2016, p. 75).

5. Questa dumonda è vegnida respundida sut las cifras 2 e 3.

6. L'imposiziun privilegiada da dividendas duai vegnir mantegnida; ses intent è quel d'evitar l'imposiziun economica dubla da la persuna giuridica e da sias persunas participadas. La dimensiun da la privilegiaziun dependa pia directamain da l'autezza da las tariffas da la taglia sin il gudogn, uschia ch'ina resposta è pussaivla pir suenter che quellas èn fixadas.

7. Pervia dal svilup interchantunal tar l'imposiziun da taglia sin interpresas èsi segiramain necessari da reducir a sut 15 pertschient la grevezza fiscala effectiva sin il gudogn da la confederaziun, dal chantun e da las vischnancas. Las reducziuns dal pe da taglia proponidas per las persunas giuridicas cun il preventiv 2017 effectueschan mo ina reducziun da 16,7 a 16,1 pertschient. En il plan da finanzas actualisà 2020 è resguardada tar las taglias sin il gudogn in'ulteriura reducziun a questa finamira minimala da 15 pertschient. La realisaziun da la RITI III planisada l'onn 2019 s'effectuescha pir l'onn 2020 cumplainamain sin il quint. Il plan da finanzas 2020 quinta cun in deficit da 96,8 milliuns francs. Quest deficit è sur la limita tolerabla. Mesiras da distgargia vegnan perquai ad esser inevitablas, ma actualmain na pon quellas betg anc vegnir concretisadas. La planisaziun da finanzas cuntegna enconuschentamain numerusas malsegirezzas. En mintga cas sto vegnir rutta la dinamica d'expensas en il sectur da las contribuziuns. Indispensabla è plinavant ina disciplina d'expensas pli consequenta en tut ils secturs.

8. Per garantir l'equiliber da las finanzas ha la regenza l'intenziun da proceder en moda flexibla e pass per pass. Cun la consultaziun da l'institut BAK Basel Economics SA vegn actualmain fatga in'analisa cumplessiva da la structura dals custs dal chantun inclusiv da las vischnancas. Tras questa analisa, che cumpiglia tut ils champs d'incumbensas, duain vegnir identifitgads secturs cun potenzial e cun basegn da distgargia. Sin basa da quai duai vegnir elavurà in project per mauns dal cussegl grond, che augmenta per il cussegl grond ils spazis d'agir en la politica da finanzas. Las pussaivladads da distgargia vegnan sche necessari a stuair vegnir nizzegiadas. En quest process ston vegnir gulivadas er las perditas dal retgav che resultan da la RITI III.

21 d'october 2016