Navigation

Inhaltsbereich

Incumbensa Caluori concernent la finanziaziun da la scola en l'ospital

Sessiun: 19.10.2016

Tenor la disposiziun dal departament d'educaziun, cultura e protecziun da l'ambient dals 15 da zercladur 2015 na vegnan uffants ospitalisads betg pli resguardads sco scolar(a)s da la scola speziala, mabain sco scolar(a)s da la scola regulara, e quai a partir dal 1. da schaner 2016. Per l'instrucziun da scolar(a)s da la scola regulara ed uschia er per ils custs da l'instrucziun en la scola en l'ospital èn responsabels ils purtaders da scola respectivs da las vischnancas. Correspundentamain ston vegnir mess a quint a la vischnanca respectiva ils custs cumplains per l'instrucziun en l'ospital sco er en la staziun da la psichiatria d'uffants e da giuvenils PUG dal Grischun, quai vul dir ina tariffa da 125 francs per di da scola. Per ils purtaders da scola da las vischnancas signifitga quai custs supplementars envers la regulaziun veglia da 104 francs per di da scola. En cifras absolutas resultan per las vischnancas custs supplementars da ca. 150 000 francs (media dals dis da scola 2013 e 2014). Tar la calculaziun da las pauschalas per scolar(a) èn ils custs supplementars ch'il chantun paja a las vischnancas percunter vegnids fixads uschia, che las vischnancas survegnan tut en tut indemnisads ils custs supplementars. Tut tenor ils dis d'ospitalisaziun che ston vegnir pajads da la vischnanca da scola respectiva datti ina sut- u ina surcumpensaziun.

 

Tenor la regulaziun veglia vegniva giuditgà medicinalmain, sch'in uffant ospitalisà era en cas da frequentar l'instrucziun. Sche la resposta era positiva, cumenzava l'instrucziun en l'ospital. Als purtaders da scola en las vischnancas vegniva messa a quint la tariffa da 21 francs per di da scola, in import che vegniva normalmain pajà senza opposiziun.

 

L'experientscha mussa che circa 50 % dals dis da scola ch'èn resultads pervia d'uffants ospitalisads na vegnan betg pli pajads sut la nova regulaziun cun in renviament a la basa legala mancanta. En la pratica n'èsi betg realisabel che l'ospital va a dumandar la permissiun da mintga purtader da scola communal respectiv. Primo sa tractassi d'ina lavur administrativa sproporziunada. Secundo sto la decisiun d'instrucziun vegnir dada entaifer 24 fin 48 uras, quai che chaschunass tar ils purtaders da scola ina situaziun che fiss lunsch davent da la pratica.

 

Entant che las scolas en l'ospital èn vegnidas manadas pli baud praticamain en tut la Svizra sco scolas spezialas, è quai sa midà oz en blers chantuns, uschia per exempel en il chantun Turitg ed en auters chantuns da la Svizra orientala. En il chantun Turitg èn las scolas en l'ospital francadas dapi l'onn 2011 en la lescha davart la scola populara sco purschidas da furmaziun independentas. L'ordinaziun respectiva prevesa il suandant:

 

• Instruids vegnan uffants e giuvenils en la vegliadetgna dad ir a la scola populara, q.v.d. er ils giuvenils dals gimnasis inferiurs, dals quals la dimora a l'ospital dura previsiblamain almain in'emna.

 

• La decisiun davart l'instruibladad vegn prendida da la scola en l'ospital, ils purtaders da scola vegnan infurmads correspundentamain.

 

• En cas da scolar(a)s extrachantunal(a)s vegn procurada ordavant resp. uschè svelt sco pussaivel ina garanzia da surpigliar ils custs.

 

1. Las sutsegnadras ed ils sutsegnaders pretendan da la regenza da crear la basa legala en la lescha da scola che regla la gestiun d'ina scola resp. d'ina scolina en l'ospital tras ils furniturs da prestaziuns en il sectur da sanadad cun ina incarica da prestaziun correspundenta. Correspundentamain sto la lescha vegnir adattada uschia che:

 

a) la decisiun davart l'instrucziun tras la scola en l'ospital vegn prendida a partir dal 5. di ed il purtader da scola sto vegnir infurmà;

 

b) ils custs cumplains vegnan mess a quint mintgamai per la mesadad als purtaders da scola da las vischnancas respectivas ed al chantun. La tariffa dals custs cumplains sto vegnir approvada periodicamain da l'uffizi per la scola populara ed il sport.

 

2. Las sutsegnadras ed ils sutsegnaders pretendan ultra da quai da la regenza da stgaffir la basa legala er areguard scolar(a)s da la scola media e da la scola professiunala confurm a la cifra 1 qua survart – analogamain al chantun Turitg. En quest connex vegnan ils custs cumplains mess a quint als uffizis ch'èn cumpetents per las scolas medias e per la furmaziun professiunala.

 

Cuira, ils 19 d'october 2016

 

Calouri, Bucher-Brini, Casty, Albertin, Atanes, Baselgia-Brunner, Blumenthal, Caduff, Cahenzli-Philipp, Casanova-Maron (Domat), Casutt-Derungs, Cavegn, Caviezel (Cuira), Clalüna, Darms-Landolt, Dermont, Dosch, Epp, Fasani, Florin-Caluori, Foffa, Gartmann-Albin, Geisseler, Hitz-Rusch, Holzinger-Loretz, Hug, Jaag, Jeker, Kunfermann, Locher Benguerel, Mani-Heldstab, Märchy-Caduff, Marti, Michael (Donat), Niederer, Niggli-Mathis (Grüsch), Paterlini, Perl, Pult, Sax, Schneider, Stiffler (Tavau Plaz), Stiffler (Cuira), Thöny, Tomaschett (Breil), Tomaschett-Berther (Trun), Troncana-Sauer, von Ballmoos, Waidacher, Widmer-Spreiter, Wieland, Zanetti, Berther (Segnas), Bonderer, Cantieni, Engler (Surava), Gugelmann, Horrer, Natter, Pfister, Ruckstuhl, Vassella

Resposta da la regenza

Sa basond sin ils art. 11 e 69 da la lescha davart las scolas popularas dal chantun Grischun dals 21 da mars 2012 (lescha da scola; DG 421.000) è la cumpetenza per l'instrucziun da scolaras e scolars da la scola regulara, ch'èn malsauns u che han gì in accident, chaussa dals purtaders da scola respectivs da lur vischnanca da domicil. Uschia vegn applitgà l'art. 6 da l'ordinaziun tar la lescha da scola dals 25 da settember 2012 (ordinaziun da scola; DG 421.010) che premetta ch'il purtader da scola cumpetent dettia ina incumbensa er per l'instrucziun temporara en ina scola d'ospital. Tenor l'art. 16 da la lescha da scola dovra la scola d'ospital ultra da quai ina permissiun da la regenza, perquai ch'i sa tracta qua d'ina scola privata. Il medem mument ston tenor l'art. 3 da l'ordinaziun da scola contracts che reglan la collavuraziun tranter purtaders da scola privats (sco la scola en l'ospital) e publics vegnir permess dal departament.

Ils custs cumplains da la scola d'ospital en l'ospital chantunal importavan l'onn 2014 circa 117 000 francs. Ils custs supplementars per ils purtaders da scola che vegnan inditgads en l'incumbensa cun 150 000 francs n'èn betg chapibels per la regenza, gist uschè pauc sco la tariffa da 125 francs per di da scola (da 1061 dis da scola l'onn 2014 resulta ina tariffa dals custs cumplains da ca. 110 francs per di).

Ina survista da l'uffizi per la scola populara ed il sport davart la scola d'ospital da l'ospital chantunal dal Grischun per ils onns 2013 fin 2015 mussa che 96 % dad en media 200 uffants per onn han frequentà la scola d'ospital tranter 1 e 15 dis da scola (82 % dad els tranter 1 e 4 dis da scola). Mo 4 % (en media 8 uffants per onn, 6 da quels or dal chantun) èn vegnids instruids durant dapli che 15 dis da scola en la scola en l'ospital. Pia sa limitescha il basegn d'ina scolaziun d'ospital ad en media 6 uffants per onn. En cas da malsognas sco grippas u accidents pli pitschens na dat per regla nagin purtader da scola scola. Cuntrari n'exista er da vart da las persunas responsablas per l'educaziun strusch in'aspectativa en quest reguard. Tenor l'art. 28 da la lescha da scola pon ils purtaders da scola plinavant dar congedi a las scolaras ed als scolars durant maximalmain 15 dis da scola per onn da scola. Durant quest temp n'ha savens er lieu nagina instrucziun organisada e finanziada tras ils purtaders da scola. Perquai n'exista per regla er en cas da dimoras a l'ospital d'ina durada da fin a 15 dis nagina necessitad d'instrucziun.

Perquai che las prestaziuns dals ospitals e da las clinicas dal chantun Turitg cun lur purschidas spezialisadas vegnan duvradas da pazientas e pazients da grondas parts da la Svizra tudestga èsi chapibel ch'il chantun Turitg ha relaschà in'ordinaziun davart l'instrucziun a l'ospital. In intschess da questa grondezza n'è betg avant maun en il chantun Grischun. En in chantun cumparegliabel sco il chantun Son Gagl èn avant maun las medemas basas legalas sco actualmain en la lescha da scola dal Grischun (scola d'ospital sco scola privata, finanziaziun tras il purtader da scola responsabel).

Las premissas per in basa legala sco pretendida en l'incumbensa (decisiun da scolaziun tras l'ospital empè da tras il purtader da scola, scolaziun a partir dal 5. di e repartiziun d'ina mesadad dals custs cumplains a las vischnancas e da l'autra mesadad al chantun) chaschunan grondas differenzas concernent las cumpetenzas da decider dals purtaders da scola tenor la lescha da scola (da princip pussaivladad da conceder in congedi da 15 dis per il sport e per autras chaussas, percunter nagina cumpetenza da decider en cas d'ina dimora a l'ospital) ed in tractament inegual da las scolaras e dals scolars (absenzas da la scola fin a 15 dis èn pussaivlas, cun excepziun da la dimora a l'ospital). Ultra da quai stuessan ils purtaders da scola ed il chantun surpigliar ils custs cumplains senza pudair er decider en chaussa. En il senn d'in tractament egual avessan ultra da quai – sper l'ospital chantunal – er ils ospitals regiunals la pussaivladad ed in stimul correspundent d'endrizzar ina scola d'ospital, er sch'il basegn è pitschen, perquai che la ristga finanziala sa chattass a 100 % tar las vischnancas e tar il chantun (repartiziun mez a mez dals custs cumplains).

I existan gia basas legalas cleras ed unitaras per la finanziaziun. La regenza propona perquai da refusar l'incumbensa.

14 da december 2016