Navigation

Inhaltsbereich

Incumbensa Stiffler (Tavau Plaz) concernent la cumplettaziun da l'incarica da prestaziun da la Viafier retica per commerzialisar la "viafier grischuna da cultura"

Sessiun: 07.12.2016

En sia resposta a la dumonda Stiffler (Tavau Plaz) ha la regenza ludà la lavur da l'uniun "historic RhB" ed ha envidà d'intensivar sia collavuraziun cun la Viafier retica. Plinavant ha la regenza proponì a "historic RhB" da deponer sias visiuns turisticas directamain tar la Viafier retica.

Sco ch'i vegn ditg è caracterisada la relaziun tranter la Viafier retica e "historic RhB" da numerusas cooperaziuns, d'ina chapientscha vicendaivla e d'ina auta stima ina per l'autra. En la giunta directiva & communicativa che sa cumpona en moda paritetica, vegnan discutads tut ils projects currents, als quals èn participads omaduas partenarias, e vegnan schliads problems che resultan eventualmain.

"historic RhB" vuless duvrar sin la rait da la Viafier retica – supplementarmain al traffic quotidian da la Viafier retica – trens d'aventura che circuleschan tenor urari, ma cun material rullant istoric. Previs fissan per exempel trens nostalgics da Tavau a Bravuogn – integrond il Museum da viafier Alvra a Bravuogn – u da San Murezzan sur il punct il pli aut da la Viafier retica (Ospizio Bernina) fin a la terrassa panoramica Alp Grüm – u da Cuira tras la Ruinaulta fin a l'emprima citad al Rain (Glion) e.u.v. Questas excursiuns vegnissan purschidas regularmain (p.ex. durant las fins d'emna da zercladur – october) e vegnissan publitgadas – sco ils ulteriurs trens regulars da la Viafier retica – en l'urari (urari „online“ e.u.v.). I fiss pia garantì che quests viadis vegnissan realisads.

La Viafier retica, da la quala l'incarica da prestaziun vegn definida tras il chantun, n'è dentant betg en il cas da duvrar dapli meds finanzials per manar trens istorics. Las sutsegnadras ed ils sutsegnaders èn da l'avis ch'in diever regular da tals trens nostalgics vegniss ad augmentar considerablamain la valur turistica e l'attractivitad da la purschida turistica en l'entir chantun.

Per pudair furnir las prestaziuns proponidas e per pudair rinforzar correspundentamain il turissem, supplitgeschan las sutsegnadras ed ils sutsegnaders la regenza da cumplettar l'incarica da prestaziun – mettend a disposiziun ils meds finanzials necessaris e prescrivend ina soluziun senza chaschunar custs supplementars entaifer la Viafier retica – cun l'incumbensa da promover la "viafier grischuna da cultura".

Cuira, ils 7 da december 2016

Stiffler (Tavau Plaz), Hug, Della Vedova, Alig, Atanes, Baselgia-Brunner, Bleiker, Bondolfi, Bucher-Brini, Buchli-Mannhart, Burkhardt, Cahenzli-Philipp, Casty, Cavegn, Clalüna, Danuser, Davaz, Deplazes, Engler, Epp, Felix (Haldenstein), Gartmann-Albin, Giacomelli, Grass, Hartmann, Hitz-Rusch, Holzinger-Loretz, Jeker, Jenny, Koch (Tumein), Koch (Igis), Komminoth-Elmer, Lamprecht, Locher Benguerel, Mani-Heldstab, Mathis, Michael (Donat), Michael (Castasegna), Monigatti, Müller, Nay, Niggli (Samedan), Niggli-Mathis (Grüsch), Noi-Togni, Papa, Peyer, Pfenninger, Pult, Salis, Schutz, Tenchio, Thomann-Frank, Toutsch, Troncana-Sauer, von Ballmoos, Waidacher, Weber, Weidmann, Widmer-Spreiter, Erhard, Pfister

Resposta da la regenza

En la resposta a la dumonda Stiffler (Tavau Plaz) concernent il "sustegn da la viafier da cultura grischuna" dals 13 d'october 2015 (prot. nr. 861) ha la regenza apprezià la stretga collavuraziun tranter la Viafier retica (VR) e l'uniun "historic RhB". Gia oz sustegna la VR en moda multifara l'activitad da l'uniun ed impunda annualmain meds finanzials considerabels per commerzialisar viadis spezials cun trens nostalgics. Ils ultims onns ha er il chantun concedì contribuziuns unicas a favur da projects d'elavurar e d'intermediar ils bains culturals mobils (material rullant istoric), uschia er a favur da la construcziun d'ina halla da vehichels correspundenta a Samedan. L'uniun "historic RhB" vuless ussa duvrar – supplementarmain al "traffic quotidian normal da la Viafier retica" – trens d'aventura che circuleschan tenor urari, ma cun material rullant istoric. I vegn partì dal fatg, ch'in diever regular da tals trens nostalgics vegniss ad augmentar la valur turistica e l'attractivitad da la purschida turistica en l'entir chantun.

Il traffic da temp liber ed aventuras turisticas èn da gronda impurtanza per la VR. Gia oz offra la VR ca. 50 purschidas e viadis spezials per onn. Da resguardar èsi ch'ils viadis istorics, cunzunt ils viadis cun locomotivas a vapur, na cuvran betg ils custs. Sch’i vegn engrondì cun ina purschida tenor urari, vegni pia spetgà ch'il chantun surpiglia annualmain ils custs betg cuvrids.

Tenor l'art. 2 da la lescha davart il traffic public en il chantun Grischun (LTP; DG 872.100) garanteschan il chantun e las vischnancas l'avertura dal traffic chantunal cun meds da transport publics e creeschan impuls per che quels vegnian utilisads pli savens. Ina purschida dal traffic da persunas regiunal vegn empustada ed indemnisada ensemen cun la confederaziun, sche la lingia correspundenta ademplescha ina funcziun d'avertura, è en funcziun durant l'entir onn e demussa ina rentabilitad minimala (art. 6 da l'ordinaziun davart l'indemnisaziun dal transport da persunas regiunal; CS 745.16). Trens d'aventura cun material rullant istoric n'adempleschan betg questas premissas.

Ultra da la finanziaziun ordinaria ensemen cun la confederaziun en connex cun la avertura dal traffic promova il chantun generalmain gia oz il traffic public supplementarmain cun differentas mesiras ed applitgond meds finanzials considerabels. Ils fatgs da promoziun previs en l'art. 19 LTP han dentant en mira mesiras che duain facilitar da duvrar meds da transport publics u promover da midar sin quels. Questa promoziun vul pia adina cuntanscher in effect da midada. Quai na fiss betg il cas tar viadis d'aventura. En quest senn manca la basa legala en la LTP tant per indemnisar sco er per promover ina tala purschida. I n'è pia betg pussaivel da recepir talas prestaziuns en la cunvegna davart la purschida da prestaziuns da la confederaziun e dal chantun cun la VR.

Las sutsegnadras ed ils sutsegnaders da l'incumbensa motiveschan lur giavischs principalmain cun arguments per promover il turissem e la "viafier grischuna da cultura". Ni la lescha davart il svilup economic ni la lescha per promover la cultura prevesan la pussaivladad da pajar contribuziuns a deficits da gestiun che sa repetan mintga onn. Per mancanza d'ina basa legala per finanziar tals deficits na sa senta la regenza betg en cas da correspunder al giavisch. Ella propona perquai da refusar l'incumbensa.

8 da mars 2017