Navigation

Inhaltsbereich

Dumonda Schneider concernent il center logistic per l'elavuraziun da remittendas e per las codaziuns da video a Cuira

Sessiun: 19.04.2017

Pervia da las midadas socialas, en spezial perquai che la digitalisaziun avanza pli e pli, dentant er pervia da ponderaziuns puramain economicas sa senta la Posta svizra sfurzada da prender differentas mesiras da spargn e da restructuraziun. Cun annunziar da serrar uffizis postals ha ella procurà ils ultims mais per gronda agitaziun er en il chantun Grischun. Ultra da quai ha er l'emprova da pilot da laschar elavurar en il Vietnam brevs ch'èn adressadas incorrectamain, chaschunà bleras discussiuns en Svizra. Per fortuna na vegni betg cuntinuà cun quest project suenter ch'il squitsch public e politic è stà grond. Gia oz è il lieu dal center logistic per l'elavuraziun da remittendas e per las codaziuns da video a Cuira sut squitsch. Qua tras fiss il squitsch creschì anc pli fitg a media resp. a lunga vista.

Tuttina s'imponan en quest connex anc ulteriuras dumondas. Perquai drizzan las sutsegnadras ed ils sutsegnaders las suandantas dumondas a la regenza:

1. Po la regenza confermar ch'i haja dà ils ultims 7 onns ina reducziun da persunal da stgars 30 % en il center logistic per l'elavuraziun da remittendas e per las codaziuns da video a Cuira? Co sa preschentan concretamain questas cifras?

2. Tge quinta la regenza da far per rinforzar il center logistic per l'elavuraziun da remittendas e per las codaziuns da video indeblì a Cuira resp. per mantegnair a lunga vista il center logistic a Cuira?

3. Tras la serrada d'uffizis postals tradiziunals en il Grischun ch'è vegnida annunziada, van a perder ulteriuras plazzas da lavur. Ha la regenza ina strategia concreta, co ch'ella vul laschar remplazzar questas plazzas da lavur en auters secturs da fatschenta da la Posta (eHealth, e-voting, digital workplace)?

Cuira, ils 19 d'avrigl 2017

Schneider, Deplazes, Albertin, Caduff, Caluori, Casanova (Glion), Cavegn, Crameri, Darms-Landolt, Della Vedova, Dermont, Dosch, Epp, Fasani, Florin-Caluori, Geisseler, Giacomelli, Kunfermann, Niederer, Sax, Tomaschett (Breil), Tomaschett-Berther (Trun), Berther (Segnas), Cantieni, Lombardi, Natter

Resposta da la regenza

Tar la dumonda 1:
Igl è correct ch'igl è vegnì reducì persunal ils ultims onns en il center logistic per l'elavuraziun da remittendas e per las codaziuns da video a Cuira. L'onn 2009 ha quest center logistic cuntanschì il dumber maximal da persunal da 69 unitads da persunal (repartidas sin 108 collavuraturas e collavuraturs). Actualmain èn occupadas en quel 76 collavuraturas e collavuraturs en la dimensiun da totalmain 51 unitads da persunal. La reducziun da las unitads da persunal per ils 7 onns passads correspunda pia a stgars 30 pertschient.

En la medema perioda è la quantitad da brevs sa reducida per circa 15 pertschient, quai che sto vegnir resguardà. Grazia al svilup tecnologic è plinavant vegnida meglierada l'identificaziun da datas cun ils apparats applitgads. Sco consequenza da quests svilups è er il dumber da remittendas sa reducì. La reducziun importa actualmain var 10 pertschient.

Tar la dumonda 2:
La regenza n'ignorescha insumma betg las midadas economicas e socialas e n'ha perquai er betg la finamira da mantegnair structuras u servetschs antiquads. Tenor la regenza èsi correct che la Posta po resp. sto tegnair quint dal cumportament midà da la clientella en il rom da sias decisiuns d'interpresa. En vista a la reducziun marcanta dal volumen na prevesa la regenza er betg mesiras per rinforzar u per mantegnair explicitamain il center logistic per l'elavuraziun da remittendas e per las codaziuns da video. Anzi, ella vul che interpresas, tranter quellas er la Posta, stgaffeschian novs formats da plazzas da lavur s'orientond al futur. Quai cun la supposiziun motivada che quellas sajan pli independentas dal lieu pervia da la digitalisaziun e na stoppian betg pli sa chattar sfurzadamain en las grondas aglomeraziuns. La regenza ha communitgà las aspectativas correspundentas a la Posta.

Tar la dumonda 3:
En connex cun ils secturs eHealth u e-voting che vegnan menziunads en la dumonda sa tracti da projects naziunals ed en spezial da meglierar ils andaments e da concepir en moda pli effizienta cun meds electronics la collavuraziun dals differents furniturs da prestaziuns. Il departament d'economia publica e fatgs socials ha manà emprims discurs cun la Posta, co ch'ils avantatgs ch'il Grischun porscha sco "digital workplace" pon tuttina vegnir tratgs a niz. Ils proxims mais vegnan examinadas eventualas pussaivladads per il Grischun. En il rom da la strategia d'elavuraziun 2020 examinescha la Posta ultra da quai er in nov center decentral per la distribuziun da pachets en il Grischun. Il lieu ed il dumber da plazzas da lavur n'èn anc betg fixads e vegnan communitgads a temp util.

Ulteriuras enconuschientschas dastgassan resultar da l'elavuraziun da l'incumbensa Casanova-Maron ch'il cussegl grond ha acceptà e che tematisescha l'access a bindel lartg sco er ils svilups e las sfidas en il sectur da la transfurmaziun digitala en il Grischun.

8 da zercladur 2017