Iruns grischs che fan donns vegnan sajettads en il Grischun dapi l'onn 2008 sin basa dal "Plan da mesiras concernent utschels che maglian peschs en il chantun Grischun" da l'Uffizi da chatscha e pestga (UCP) dals 17 da mars 2008. Quel è vegnì fatg e communitgà sin basa da l'art. 12 al. 2 da la Lescha federala davart la chatscha e la protecziun dals mamifers e dals utschels selvadis (Lescha da chatscha, LChP; CS 922.0). Ses cuntegn è accordà cun las regulaziuns da l'Uffizi federal d'ambient (UFAM) concernent quest tema che valan anc adina. Il Concept dal UFAM davart l'irun grischun e davart la pestga datescha da l'onn 1984. Las sajettadas fin ussa èn vegnidas annunziadas confurm a l'urden en la statistica federala da chatscha.

Perquai ch'i n'è betg raschunaivel ord motivs d'ina procedura economica da decretar mintga singula sajettada, recumonda il UFAM da communitgar a las organisaziuns cun dretg da far recurs en il futur disposiziuns collectivas, per exempel en furma da plans da mesiras che inditgeschan quant ditg che las reglas valan. Sajettadas duessan alura vegnir communitgadas regularmain. Tenor la recumandaziun dal UFAM ston vegnir decretadas – ultra da las sajettadas da spezias protegidas – er tut las autras sajettadas da spezias permessas durant il temp da schanetg e communitgadas a las organisaziuns cun dretg da far recurs. Gist pervia da questas prescripziuns cumplessivas è la realisaziun da la decisiun dal Tribunal federal menziunada en la dumonda, sa retardada en reguard formal. Suenter ina sesida cun ils represchentants da l'Associaziun grischuna e svizra per la protecziun dals utschels è la pratica vegnida repassada l'onn 2017 e las sajettadas èn vegnidas reducidas cleramain sin quai, sco ch'i resorta er da la dumonda. Il UCP ha plinavant pudì metter a disposiziun resursas persunalas supplementaras per l'onn current 2020 per pudair realisar en moda cumplessiva er las directivas formalas.

Tar la dumonda 1: Gea, er l'onn 2019 èn vegnids sajettads iruns grischs sin basa dal plan da mesiras da l'onn 2008. 

Tar la dumonda 2: I èn vegnids sajettads 8 iruns grischs. 

Tar la dumonda 3: Tut las sajettadas èn vegnidas fatgas en la part sut dal Mesauc en il sectur dals stabiliments per l'allevament da peschs ch'i dat là (Cama e Lostallo) per impedir donns en quests stabiliments sco er per impedir donns vi dal dumber dals peschs, en spezial da la litschala, ch'è protegida là dapi in pèr onns. 

Tar la dumonda 4: Las autoritads chantunalas cumpetentas han relaschà disposiziuns contestablas per regular l'urs ed il luf. En cas d'ulteriuras spezias protegidas, sco l'irun grisch, vegn l'execuziun optimada actualmain. Il motiv per quai è vegnì explitgà en las remartgas introductivas. 

Tar la dumonda 5: Il chantun n'è natiralmain betg mo pront, mabain sa senta obligà da decretar decisiuns en il champ d'applicaziun da la LChP concernent utschels che maglian peschs en l'avegnir tenor las prescripziuns e tenor las recumandaziuns dal UFAM e da las communitgar a las organisaziuns cun dretg da far recurs, incl. l'Associaziun svizra per la protecziun dals utschels. Ord vista dal chantun èsi giavischabel en quest connex ch'il plan da mesiras chantunal concernent utschels che maglian peschs en il Grischun chattia sustegn en spezial per proteger spezias da peschs periclitadas fermamain.