Navigation

Inhaltsbereich

Dumonda Favre Accola concernent la realisaziun da la Convenziun davart ils dretgs da l'uffant (CDU) en il Grischun

Sessiun: 19.06.2020

La Confederaziun ha ratifitgà la CDU ed è – tenor il dretg internaziunal – responsabla per realisar las obligaziuns surpigliadas(p.ex. concepir ina politica d'uffants e da giuvenils; coordinar ils chantuns; rediger rapports naziunals al Comité dals dretgs da l'uffant da las Naziuns Unidas concernent la realisaziun tenor l'art. 44 CDU, confurm a l'urden la proxima giada l'onn current 2020).

A l'intern da la Svizra portan però ils chantuns la chargia principala da la realisaziun dals dretgs da l'uffant; la Confederaziun n'ademplescha facticamain strusch betg sia funcziun d'iniziativa e da surveglianza. Per ch'il chantun daventia favuraivel per uffants u vegnia midà en in stadi adattà als uffants, pon sias incumbensas vegnir divididas en:

  • elavuraziun d'in concept, co che la gruppa da la populaziun dals uffants sa cumpona e cun tge interess da la scola, da la protecziun d'uffants, da la planisaziun dal territori, da la politica fiscala, da la giustia e.u.v. che questa gruppa da la populaziun sa posiziunescha en la politica chantunala e tras tge organs che quests interess pon s'articular.
  • Il parlament è obligà envers l'administraziun ed envers las dretgiras oravant tut en quai che concerna la legislaziun, la budgetaziun e la surveglianza suprema.
  • L'administraziun chantunala, q.v.d. oravant tut ils departaments dovran in'organisaziun structurala e funcziunala per far valair – en l'applicaziun dal dretg en emprima instanza ed en la giurisdicziun entaifer l'administraziun – las valurs da basa da la CDU en il mintgadi dals uffants.
  • Ils purtaders da decisiuns en l'administraziun ed en las dretgiras ston vegnir sensibilisads per la problematica da la CDU ed ad els ston vegnir intermediads enconuschientschas operativas e l'ulteriur svilup da quellas en la pratica. En spezial èn dumandadas proceduras sveltas en cas da mesiras per proteger la lètg u en cas da regulaziuns dal dretg da tgira.
  • Il chantun sustegna las vischnancas ed ils organs regiunals a realisar la CDU.

Gugent dumandain nus en quest connex:

1.     Quants uffants èn vegnids tadlads durant la perioda d'uffizi currenta e durant quella precedenta tenor l'art. 314a CCS resp. tenor l'art. 298 PC e per quants uffants è vegnì nominà in represchentant per la procedura d'uffant tenor l'art. 314abis CCS resp. tenor l'art. 299 PC (en cifras absolutas ed en pertschients dals uffants)? Sa lascha percorscher in svilup?

2.     Co vegn pratitgada l'audienza dals uffants dals uffizis menziunads,

-  a partir d'ina tscherta vegliadetgna,

-  cun ina citaziun persunala en ina furma specifica per uffants u cun in formular,

-  cun tge orientaziun davart las cundiziuns generalas legalas da l'audiziun,

-  da persunas uffizialas sezzas u da persunas spezialisadas engaschadas d'ordaifer,

-  tut tenor il stgalim da vegliadetgna en locals equipads specificamain?

3.     Han las collavuraturas ed ils collavuraturs da las dretgiras ina scolaziun correspundenta ed experientscha, co ch'ils uffants ed ils giuvenils duain vegnir tractads?

4.     Co sensibilisescha il chantun Grischun collavuraturas e collavuraturs da la APUC, curatellas professiunalas, dretgiras, chanzlias (advocatas ed advocats, ma er mediaturas e mediaturs) d'ina vart, ma er uffants/giuvenils da l'autra vart en quai che concerna la CDU e sia realisaziun consequenta? (Guardar er la broschura «Deine Meinung ist wichtig» da las dretgiras da Turitg).

5.     Planisà vegni da stgaffir in servetsch da mediaziun naziunal (moziun CC Noser), ma l'installaziun e – per gronda part – er l'organisaziun da la procedura è e resta per ina durada imprevisibla reglada sin plaun chantunal. A tge post spezialisà en il Grischun duain uffants e giuvenils sa drizzar, sch'els han dumondas da dretg?

Cuira, ils 19 da zercladur 2020

Favre Accola, Gugelmann, Rettich, Baselgia-Brunner, Brandenburger, Buchli-Mannhart, Cahenzli-Philipp, Casty, Casutt-Derungs, Cavegn, Clalüna, Danuser, Degiacomi, Deplazes (Cuira), Deplazes (Rabius), Dürler, Ellemunter, Engler, Gartmann-Albin, Gasser, Geisseler, Gort, Grass, Hardegger, Hartmann-Conrad, Hofmann, Hohl, Holzinger-Loretz, Horrer, Hug, Jochum, Kappeler, Kasper, Koch, Kohler, Lamprecht, Loepfe, Michael (Donat), Müller (Susch), Müller (Favugn), Niggli-Mathis (Grüsch), Papa, Preisig, Ruckstuhl, Rutishauser, Salis, Schmid, Schwärzel, Stiffler, Thomann-Frank, Tomaschett-Berther (Trun), Ulber, Widmer-Spreiter (Cuira), von Ballmoos, Wilhelm, Zanetti (Sent), Zanetti (Landquart), Pajic, Renkel, Spadarotto

Resposta da la regenza

Perquai ch'igl è ina incumbensa regiunala da manar las curatellas professiunalas e perquai che er las dretgiras e las advocatas ed ils advocats na fan betg part da l'administraziun chantunala, cuntegnan las respostas qua sutvart per gronda part la posiziun da la APUC.

Tar la dumonda 1: En proceduras da protecziun d'uffants davant las APUC vegnan ils uffants pertutgads da princip tadlads. La dumonda, sch'i po vegnir renunzià da tadlar ils uffants sto vegnir respundida considerond las circumstanzas totalas. Pli greva che l'intervenziun è e main ch'i po vegnir desistì da tadlar ils uffants. Sche las parts participadas a la procedura da la dretgira regiunala èn perina, na vegni per regla betg giavischà da tadlar ils uffants ed i vegn desistì da quai. En cas dispitaivels vegnan ils uffants per regla tadlads, nun che quai na vegnia explicitamain betg giavischà.

Adina pli savens vegni fatg diever da la pussaivladad da metter a disposiziun als uffants ina represchentanza da procedura. Entant che las APUC han mess a disposiziun tut en tut tschintg represchentanzas l'onn 2013, èn quai stadas gia 33 represchentanzas per l'uffant l'onn 2019. En relaziun cun il dumber total dals uffants pertutgadas è la quota da represchentanzas per l'uffant s'augmentada da stgars 0,8 % l'onn 2013 a var 5,3 % l'onn 2019. En cas da proceduras davant dretgiras regiunalas è l'engaschament da represchentanzas per l'uffant da princip in tema mo en cas dispitaivels. Represchentanzas per l'uffant vegnan instituidas da rar.

En proceduras davant la Dretgira chantunala sa tracti per regla da proceduras da meds legals, per las qualas è vegnida nominada ina represchentanza per l'uffant gia davant l'emprima instanza, sche quai è stà necessari. Quella resta en la procedura da meds legals. Ina represchentanza per l'uffant vegn nominada da la Dretgira chantunala ed ha lieu mo en proceduras tenor l'art. 302 al. 1 lit. a dal Cudesch da procedura civila svizzer Cudesch da procedura civila, CPC; SR 272) (repatriaziuns d'uffants), per las qualas èn – tenor il dretg federal – unicamain cumpetentas las dretgiras chantunalas superiuras.

Tar la dumonda 2: Uffants sut 6 onns na vegnan per regla betg tadlads. La dumonda, sch'ils uffants duain vegnir tadlads, giuditgeschan las APUC mintgamai da cas a cas. I vegn tschernì in proceder che serva al bainstar da l'uffant. Uffants pli giuvens respectivamain uffants che han in impediment diagnostitgà (p.ex. disturbis dal spectrum da l'autissem) vegnan per regla tadlads da persunas dal fatg consultadas. Adina pli savens vegnan talas tadladas er fatgas da commembras e commembers da las APUC versads, perquai ch'il contact direct cun ils uffants è fitg prezius per in giudicament cumplessiv e per il process da decisiun. 

Tar la dumonda 3: Tar las dretgiras vegnan tadladas d'uffants per regla fatgas da l'emprima instanza. En las proceduras da meds legals vegnan ellas ordinadas mo en cas excepziunals. Derschadras e derschaders taidlan per regla sezs ils uffants. Mo en cas excepziunals vegn quai fatg da persunas spezialisadas. La gronda part da las derschadras e dals derschaders ha experientscha pratica da blers onns. Intginas u intgins han ultra da quai frequentà curs specifics u furmaziuns supplementaras specificas.

Tar la dumonda 4: Pervia da lur scolaziun, da lur experientscha e/u dal barat interdisciplinar èn las collavuraturas ed ils collavuraturs da las APUC e da las curatellas professiunalas fitg sensibilisads. Geniturs e giuvenils sco er – tut tenor la situaziun e la vegliadetgna – ils uffants pertutgads directamain vegnan sensibilisads da las APUC en discurs per la Convenziun dals dretgs da l'uffant e per sia realisaziun. Regularmain vegnan consegnadas la broschura "Juris erklärt dir deine Rechte" u la broschura da la UNICEF "Es geht um dich – deine Meinung ist gefragt." Las curatellas professiunalas, las dretgiras e las advocatas ed ils advocats na fan betg part dal champ da cumpetenza da la Regenza.

Tar la dumonda 5: Sin plaun naziunal surpiglian il KESCHA (Center da tadlada e d'assistenza da l'uffant e dal creschi) e l'uniun «Kinderanwaltschaft Schweiz» ina part da las incumbensas d'in servetsch da mediaziun per ils dretgs da l'uffant. La purschida locala e nunbirocratica d'infurmaziun e da cussegliaziun da la Pro Juventute – telefon 147 – stat a disposiziun als uffants ed als giuvenils durant 24 uras.

7 da settember 2020