Navigation

Inhaltsbereich

Dumonda Perl concernent las indemnisaziuns da las perditas en la cultura

Sessiun: 22.10.2020

Per mitigiar il donn finanzial pervia da la pandemia ha la Confederaziun decretà il mars 2020 l'Ordinaziun davart COVID-19 cultura e stgaffì uschia la basa per pajar indemnisaziuns da las perditas en il sectur da la cultura. Interpresas culturalas sco er persunas che lavuran sin il champ cultural survegnan damai – sin dumonda – agids finanzials per il donn finanzial ch'è resultà en spezial pervia da l'annullaziun u pervia dal spustament d'occurrenzas e da projects ubain pervia da serradas da manaschis, premess che quest donn saja vegnì chaschunà tras mesiras statalas per cumbatter cunter il coronavirus (COVID-19). Davart las dumondas decidan ils chantuns. La Confederaziun surpiglia la mesadad da las indemnisaziuns concedidas. L'indemnisaziun da las perditas cuvra maximalmain 80 pertschient dal donn finanzial. La regulaziun vegn remplazzada l'atun 2020 tras mesiras da la Lescha COVID-19 per il sectur da la cultura. En la pratica han manaschis culturals rendì attent als problems cun l'indemni­saziun da las perditas, en spezial a la durada da l'elavuraziun da las dumondas sco er a l'autezza dal grad da cuvrida dal donn finanzial.

Las sutsegnadras ed ils sutsegnaders tschentan perquai las suandantas dumondas:

  1. Quantas dumondas per indemnisar las perditas èn vegnidas inoltradas al chantun?
  2. Quantas indemnisaziuns da las perditas èn vegnidas pajadas e quant auta è la summa totala da questas indemnisaziuns?
  3. Co ha il chantun applitgà l'autezza da la cuvrida da las singulas indemnisaziuns da las perditas?
  4. Quant svelt ha il chantun pudì elavurar las dumondas correspundentas e pajar las indemnisaziuns?
  5. Co applitgescha il chantun las indemnisaziuns da las perditas tenor la nova Lescha COVID-19?

Cuira, ils 22 d'october 2020

Perl, Brunold, Thomann-Frank, Baselgia-Brunner, Cahenzli-Philipp, Caviezel (Cuira), Deplazes (Rabius), Derungs, Gartmann-Albin, Hofmann, Horrer, Märchy-Caduff, Müller (Favugn), Preisig, Rettich, Rutishauser, Schwärzel, von Ballmoos, Widmer-Spreiter (Cuira), Wilhelm, Brändli Capaul, Bürgi-Büchel, Giudicetti, Spadarotto, Tomaschett (Cuira)

Resposta da la regenza

Las dumondas 1 fin 4 sa refereschan a las indemnisaziuns da las perditas en la cul­tura sin basa da l'Ordinaziun davart la mitigiaziun da las consequenzas economicas dal coronavirus (COVID-19) en il sectur da la cultura (Ordinaziun davart COVID-19 cultura; CS 442.15) ch'è stada en vigur fin ils 20 da settember 2020; la dumonda 5 sa referescha a la Lescha federala davart la basas legalas da las ordinaziuns dal Cus­segl federal per superar l'epidemia da COVID-19 (Lescha COVID-19; CS 818.102) sco er a l'Ordinaziun davart las mesiras en il sectur da la cultura tenor la Lescha COVID-19 (Ordinaziun COVID-19 cultura; CS 442.15).

Tar la dumonda 1: Tar la Promoziun da la cultura da l'Uffizi da cultura èn entradas fin a l'ultim termin d'inoltraziun, vul dir fin ils 20 da settember 2020, tut en tut 113 du­mondas per indemnisaziuns da las perditas. Questas dumondas èn vegnidas sutta­messas da 50 persunas che lavuran sin il champ cultural e da 63 interpresas cultu­ra­las.

Tar la dumonda 2: A totalmain 76 persunas che lavuran sin il champ cultural ed in­terpresas culturalas èn vegnidas concedidas indemnisaziuns da las perditas en l'au­tezza da 2 591 815.90 francs (397 240.50 francs a 32 persunas che lavuran sin il champ cultural; 2 194 575.40 francs a 44 interpresas culturalas). 10 dumondas èn vegnidas retratgas, e 27 dumondas èn vegnidas refusadas, perquai ch'ellas n'adem­plivan betg ils criteris tenor l'Ordinaziun davart COVID-19 cultura resp. perquai ch'ellas avevan gia survegnì autras indemnisaziuns.

Tar la dumonda 3: Las indemnisaziuns da las perditas èn vegnidas calculadas sin basa dal model da calculaziun 2 da la Confederaziun e sin fundament da l'urden da prioritads dal chantun. Tar il model 2 vegnan scuntradas las entradas effectivamain budgetadas e persas cun ils custs budgetads betg resultads e cun las indemnisa­ziuns effectivamain survegnidas. L'applicaziun da quest model è vegnida concludida ensemen cun la Confederaziun. Tenor la directiva da la Confederaziun stuevan las perditas da persunas che lavuran sin il champ cultural vegnir indemnisadas en tut ils chantuns sin basa dal model 2. L'urden da prioritads preveseva da resguardar en emprima lingia projects, persunas che lavuran sin il champ cultural ed interpresas culturalas che vegnivan gia sustegnidas fin lura da la Promoziun da la cultura. La finamira era quella da pajar da princip l'import maximal pussaivel prescrit da la Con­federaziun, vul dir 80 pertschient dal donn finanzial.

Tar la dumonda 4: En in'emprima fasa èsi vegnì pajà – a partir da mez fanadur 2020 – tar numerusas dumondas 70 pertschient dal donn finanzial cun agid da disposi­ziuns provisoricas. Perquai che l'indemnisaziun da las perditas era subsidiara ad autras mesiras (indemnisaziun per lavur reducida, indemnisaziun da la perdita da gudogn, agids immediats), han questas decisiuns stuì vegnir spetgadas per giuditgar definitivamain l'indemnisaziun. Il chantun ha prendì tut las decisiuns definitivas fin ils 21 da december 2020 ed ha infurmà las petentas ed ils petents tras disposiziuns da l'uffizi resp. dal departament.
Tut las indemnisaziuns da las perditas èn vegnidas pajadas en il rom da l'onn da gestiun 2020. Uschia èn vegnids observads ils termins prescrits da la Confederaziun. Tut las petentas e tut ils petents che vegnivan sustegnids fin lura da la Promoziun da la cultura han survegnì ina indemnisaziun da las perditas definitivas en l'autezza ma­ximala pussaivla dad 80 pertschient dal donn finanzial. L'elavuraziun da las dumon­das ha custà bler temp a l'Uffizi da cultura, perquai ch'i mancavan savens ils docu­ments pretendids sin ils fegls d'infurmaziun u perquai ch'igl ha duvrà scleriments pretensius tar las petentas ed ils petents.

Tar la dumonda 5: Er vinavant èn previs agids finanzials betg restituibels en furma d'indemnisaziuns da las perditas. Per il donn finanzial che resulta tras l'annullaziun, tras il spustament u tras la restricziun da la realisaziun d'occurrenzas e da projects u tras restricziuns dal manaschi en consequenza da mesiras statalas, pon las per­sunas che lavuran sin il champ cultural e las interpresas culturalas dumandar ina indemnisaziun da las perditas. L'indemnisaziun da las perditas tenor la Lescha COVID‑19 e tenor la nova Ordinaziun COVID-19 cultura ha da princip lieu ana­lo­ga­main a l'indemnisaziun tenor la veglia Ordinaziun davart COVID-19 cultura (guardar resposta a la dumonda 3). Tenor l'urden da prioritads actual èn per entant previsas indemnisaziuns da las perditas en l'autezza da maximalmain 60 pertschient dal donn finanzial. Sch'i duessan vegnir tratgs a niz damain meds finanzials che supponì, èsi pussaivel che questa procentuala vegn auzada.

13 da schaner 2021