Navigation

Inhaltsbereich

Dumonda Preisig concernent il SCI da l'Administraziun chantunala da taglia

Sessiun: 22.10.2020

En l'Engiadin'Ota s'accumuleschan ils cas da disposiziuns da taxaziun divergentas (u uscheditg curregidas). Pertutgadas èn principalmain persunas estras che vivan gia dapi blers onns cun lur famiglias en l'Engiadin'Ota e che lavuran savens en il segment da salari bass. Il muster sa sumeglia en singuls cas:

Las persunas estras inoltreschan a temp lur decleraziun da taglia e survegnan lura ina disposiziun da taxaziun che divergescha fermamain da quella e che chaschuna imports da taglia massivamain pli auts. Las persunas pertutgadas intervegnan mintgamai per il pli sezzas, ma savens senza success, tar la cumissaria u il cumissari da taglia taxant, cumbain ch'il sbagl da la correctura è evident. Sco exempels pon vegnir enumeradas las suandantas correcturas da sbagls:

  • quintar vitiers il gudogn accessoric ch'era gia vegnì suttamess a la taglia a la funtauna;
  • betg renconuscher ils custs da viadi (particularmain en cas da lavur da squadra);
  • renconuscher mo ils custs da viadi per il traffic public e betg quels per l'auto privat;
  • stritgar senza motiv la dimora durant l'emna;
  • betg renconuscher la deducziun per uffants;
  • quintar massivamain memia fitg in'abitaziun a l'exteriur;
  • e.u.v.

Las persunas pertutgadas han survegnì raschun mintgamai pir cun agid professiunal, cumbain che las cumprovas existivan gia ordavant. Ils custs da l'agid professiunal han las persunas pertutgadas stuì surpigliar sezzas. Per tut quests motivs sa tschentan intginas dumondas fundamentalas davart il sistem da controlla intern (SCI) da l'Administraziun chantunala da taglia en cas da disposiziuns da taxaziun divergentas ed en cas da recurs.

Nus supplitgain perquai la Regenza da respunder las suandantas dumondas:

  1. Quant aut è stà il dumber da disposiziuns da taxaziun divergentas – repartidas tenor regiun e/u vischnanca – per onn durant ils ultims diesch onns?
  2. Quant auta è stada mintgamai la part da las disposiziuns da taxaziun divergentas da persunas estras – repartidas tenor regiun e/u vischnanca – dal total da las disposiziuns da taxaziun divergentas per onn durant ils ultims diesch onns?
  3. Relascha ina disposiziun da taxaziun divergenta mo ina cumissaria u in cumissari da taglia sulet u vala il princip da quatter egls?
  4. Pertge vegn in recurs respundì da la medema cumissaria resp. dal medem cumissari da taglia? Vala il princip da quatter egls per recurs?
  5. Co sa preschenta il SCI dals Cumissariats regiunals da taglia en general?

Cuira, ils 22 d'october 2020

Preisig, Hohl, Weidmann, Baselgia-Brunner, Berweger, Brandenburger, Cahenzli-Philipp, Cantieni, Caviezel (Cuira), Clalüna, Della Cà, Felix, Gartmann-Albin, Hardegger, Hofmann, Horrer, Koch, Lamprecht, Maissen, Müller (Favugn), Natter, Niggli-Mathis (Grüsch), Perl, Pfäffli, Rettich, Ruckstuhl, Rutishauser, Schwärzel, von Ballmoos, Wilhelm, Brändli Capaul, Bürgi-Büchel, Giudicetti, Pajic, Spadarotto, Tomaschett (Cuira), Tscholl

Resposta da la regenza

Al cumenzament da la dumonda vegni menziunà ch'ils cas da "disposiziuns da taxa­ziun divergentas (u uscheditg curregidas) s'accumuleschian".

En quest connex renviescha la Regenza al fatg ch'i na sa tracta qua betg da disposi­ziuns da taxaziun, che han stuì vegnir curregidas, mabain da disposiziuns da taxa­ziun che divergeschan da las valurs decleradas. I vegnan numnadas differentas con­stellaziuns, nua ch'ils sbagls duain s'accumular. En quest connex constatescha la Regenza il suandant:

  • Davart gudogn accessoric ch'era gia vegnì suttamess a la taglia a la funtauna: En quest connex sa tracti d'entradas accessoricas ch'èn vegnidas quintadas giu cun l'Institut d'assicuranza sociala (IAS) en la procedura da rendaquint simplifitgada. Sche questas entradas vegnan decleradas en la decleraziun da taglia e sch'i na vegn betg agiuntà in rendaquint dal IAS, na po l'Administraziun da taglia (ATa) betg identifitgar l'imposiziun a la funtauna.
  • Davart betg renconuscher ils custs da viadi u reconuscher mo ils custs dal traffic public: Tenor la giurisdicziun clera dal Tribunal federal pon vegnir deducids mo ils custs da viadi necessaris, e l'Administraziun da taglia ha l'incumbensa d'examinar questa necessitad.
  • Davart stritgar senza motiv la dimora durant l'emna: Qua sa tracti d'in fatg che reducescha la grevezza fiscala, che la persuna obligada da pajar taglia sto cum­provar e che na vegn betg resguardà, sche las cumprovas èn insuffizientas.
  • Davart betg renconuscher la deducziun per uffants: Probablamain sa tracti da cas internaziunals, nua ch'i sto vegnir sclerì, sch'il conjugal en Svizra u il conjugal a l'exteriur po far valair ina deducziun per uffants. L'Administraziun da taglia s'orien­tescha en quest connex tenor ils supplements per uffants che vegnan pajads or.
  • Davart quintar massivamain memia fitg in'abitaziun a l'exteriur: En quest connex sa tracti da la dumonda da las entradas e da la facultad ch'èn decisivas per fixar la tariffa. Las valurs da l'abitaziun a l'exteriur ston savens vegnir stimadas, perquai che las valurs correspundentas na stattan betg a disposiziun (p.ex. valur da l'atgna locaziun).

L'enumeraziun mussa ch'i va per gronda part per fixar ils fatgs decisivs che n'han betg pudì vegnir sclerids suffizientamain en la procedura da taxaziun. Exactamain per talas dumondas datti la procedura da protesta, en la quala var 65 % da las pro­testas vegnan approvadas dal tuttafatg e var 15 % per part. L'inculpaziun che persu­nas estras vegnian tractadas en moda discriminanta, vegn refusada en tutta furma. I po dentant esser che las enconuschientschas linguisticas manglusas da las persu­nas pertutgadas èn in dischavantatg en la procedura da protesta.

La taxaziun da la taglia sin las entradas e da la taglia sin la facultad vegn fatga da las collavuraturas e dals collavuraturs da l'Administraziun chantunala da taglia sco er dals uffizis da taglia communals e da las allianzas da taglia. En il sectur da las persu­nas cun activitad da gudogn dependenta vegnan circa 75 % da las taxaziuns fatgas da las collavuraturas e dals collavuraturs dals uffizis da taglia communals. Per quai paja il chantun ina indemnisaziun da var 7 milliuns francs.

Tar las dumondas 1 e 2: L'Administraziun da taglia na fa betg ina statistica da las disposiziuns da taxaziun divergentas resp. ina statistica tenor la naziunalitad da las persunas obligadas da pajar taglia. L'applicaziun TI na permetta betg evaluaziuns correspundentas.

Tar la dumonda 3: La disposiziun da taxaziun vegn relaschada da la collavuratura u dal collavuratur cumpetent singul; i na dat nagin princip da quatter egls per la dispo­siziun da taxaziun. La qualitad vegn garantida tras differentas mesiras (guardar latiers la resposta a la dumonda 5).

Tar la dumonda 4: La protesta vegn decidida da la persuna che fa la taxaziun, sch'i sa tracta d'ina collavuratura u d'in collavuratur chantunal. Quai è giuridicamain ad­missibel e materialmain cunvegnent, perquai che la protesta è ina part da la proce­dura da taxaziun. Sche la taxaziun vegn fatga d'ina collavuratura u d'in collavuratur da la vischnanca, vegn la protesta elavurada da la cumissaria u dal cumissari da taglia chantunal. En quests cas datti in princip da quatter egls.

Tar la dumonda 5: En ils posts externs da l'Administraziun chantunala da taglia vala il medem SCI sco a Cuira. Las finamiras da qualitad en la taxaziun vegnan cuntanschi­das cunzunt tras furmaziuns supplementaras permanentas e tras fixaziuns cumples­sivas da la pratica. Las collavuraturas ed ils collavuraturs dals posts externs vegnan assistids da lur manadras e manaders da team tuttina sco a Cuira. Tematicas diffici­las, protestas u dumondas pli cumplexas pon vegnir giuditgadas cuminaivlamain.

21 da december 2020