Tar il punct 1: Ils resultats dal giudicament annual da l'influenza da la selvaschina vegnan mintgamai evaluads fin mez matg da l'Uffizi da guaud e privels da la natira (UGP) e preschentads en in curt rapport ("Situaziun dals donns da selvaschina d'ungla en il guaud"). Quest curt rapport cuntegna ils resultats dal giudicament da l'influenza da la selvaschina, ils donns da scursada e da sgarada constatads, ils custs per mesiras da prevenziun cunter donns da selvaschina, ils custs ed ils re­sultats da las retschertgas da donns da selvaschina fatgas l'onn precedent sco er ulteriuras infurmaziuns. A l'Uffizi da chatscha e pestga (UCP) serva el sco basa per planisar la chatscha. El vegn er mess a disposiziun a las commembras ed als com­members da la Cumissiun da chatscha. Per garantir che la publicitad vegnia infur­mada da maniera transparenta e moderna, duai il curt rapport annual vegnir publitgà en l'avegnir – per l'emprima giada il matg 2021 – sin la pagina d'internet dal UGP e vegnir cumplettà cun infurmaziuns ed illustraziuns supplementaras.

Dapi l'onn 2017 vegn giuditgada en l'entir chantun l'influenza da la selvaschina. Las enconuschientschas or da quest giudicament vegnan preschentadas sin ina charta interactiva. Questa charta serviva fin ussa sco instrument da lavur per las persunas participadas a l'elavuraziun da la tematica dal guaud e da la selvaschina (collavura­turas e collavuraturs dal UGP e dal UCP, selviculturs da revier sco represchentants da las proprietarias e dals proprietaris da guaud). La charta davart l'influenza da la selvaschina vegn actualisada en l'avegnir en in ritmus da 2 onns. La preschentaziun è vegnida optimada per pudair render accessibla la charta a la publicitad (cf. latiers la resposta da la Regenza a la dumonda Gasser concernent la charta davart l'influ­enza da la selvaschina e la scolaziun e furmaziun supplementara, PCG 2/2020-2021, p. 223 s.). A partir dal matg 2021 duai la charta interactiva esser disponibla er sin la pagina d'internet dal UGP.

Tar il punct 2: Las consequenzas finanzialas a curta vista per il maun public sco er per las proprietarias ed ils proprietaris da guaud pervia da l'influenza da la selva­schina èn preschentadas en il curt rapport annual dal UGP menziunà qua survart (cf. punct 1). En la media dals ultims 10 onns èn vegnids impundids circa 1 milliun francs per onn per mesiras da prevenziun cunter donns da selvaschina.

Las consequenzas finanzialas a media fin a lunga vista na pon percunter – pervia da las bleras malsegirezzas – betg vegnir eruidas e stimadas per gronds territoris: Las malsegirezzas pertutgan d'ina vart il svilup spetgà dal guaud. Quel po sa differenziar fermamain d'in lieu a l'auter pervia da la midada cuntinuanta dal clima, ed el dependa per in bun pau dal stadi actual. Actualmain vegnan realisads differents projects, er en collavuraziun cun l'Uffizi federal d'ambient (UFAM) e cun auters chantuns, per pudair valitar meglier las consequenzas ed elavurar recumandaziuns d'agir. Las mesiras d'adattaziun enconuschentas, sco p.ex. il mantegniment e la garanzia da la diversi­tad da las spezias da bostgs, vegnan resguardadas gia oz ed integradas cuntinuada­main en il rom da la cultivaziun dal guaud. Da l'autra vart èsi dentant er fitg difficil da prevair il svilup e la repartiziun da las populaziuns da selvaschina d'ungla a lunga vista e l'influenza che resorta qua tras da la selvaschina e che ha consequenzas per il guaud. En il rom da la revisiun dals rapports davart il guaud e davart la selva­schina, che vegn fatga dapi l'onn 2018, lascha il UGP mintgamai elavurar exempels concrets specifics en las regiuns elavuradas. Cun quests exempels vegnan eruidas – per tscherts territoris – las consequenzas finanzialas per ina perioda da 50 onns. Ils resultats da quests exempels vegnan preschentads a las proprietarias ed als proprie­taris dals guauds pertutgads ed integrads en ils rapports davart il guaud e davart la selvaschina. L'elavuraziun e la terminaziun dals rapports davart il guaud e davart la selvaschina vegnan accumpagnadas da mesiras da communicaziun. Ils rapports èn accessibels en l'internet. Tegnend quint da la finamira da questa incumbensa duain er ils resultats da tut ils exempels concrets elavurads vegnir rendids accessibels sin la pagina d'internet dal UGP. Ina rapportaziun periodica pli extendida n'è dentant betg cunvegnenta resp. betg expressiva tenor l'avis da la Regenza pervia da la situaziun da datas.

Sin basa da questas explicaziuns propona la Regenza al Cussegl grond d'acceptar l'incumbensa qua avant maun concernent il punct 1 e da la midar sco suonda con­cernent il punct 2: Las datas disponiblas davart las consequenzas finanzialas per il maun public tras l'influenza da la selvaschina e tras las midadas climaticas en il guaud ston vegnir rendidas accessiblas a la publicitad en ina furma adequata (curts rapports, rapports davart il guaud e davart la selvaschina, pagina d'internet dal UGP).

10 da favrer 2021