Navigation

Inhaltsbereich

Dumonda Tomaschett (Breil) concernent la cunvegna da prestaziun tranter il chantun Grischun e la Pro Natura Grischun

Sessiun: 18.02.2021

Per ils onns 2020-2024 ha la Regenza approvà – tenor la communicaziun da la Regenza dals 10 da december 2020 – ina cunvegna da prestaziun tranter il chantun e la Pro Natura Grischun. La cunvegna duai reglar resp. indemnisar la tgira da territoris da protecziun cun ina contribuziun chantunala annuala dad 800 000 francs e cun ina contribuziun federala da la medema autezza.

Pro Natura Grischun protegia mintga onn surfatschas da biotops da var 120 hectaras. Bundant la mesadad da quai èn biotops d'impurtanza naziunala. L'organisaziun per la protecziun da la natira Pro Natura Grischun è però er enconuschenta per il fatg ch'ella s'exprima en moda critica u negativa envers quasi tut ils projects da svilup ordaifer la zona da construcziun e ch'ella emprova uschia d'evitar, da retardar e da render pli chars tals. Projects ed infrastructuras ch'èn per gronda part ina premissa fundamentala per il surviver en il territori da muntogna vegnan uschia adina puspè impedids. Daners publics dal svilup economic na cuntanschan nagin effect, perquai che l'applicaziun excessiva dal dretg da recurs da las associaziuns da vart da Pro Natura e d'autras NGOs enchareschescha u impedescha sistematicamain ils projects da svilup.

La Regenza vegn supplitgada da respunder las suandantas dumondas:

  1. È la cunvegna da prestaziun en la dimensiun da totalmain 1,6 milliuns francs vegnida publitgada uffizialmain tenor la Lescha da submissiun? Sche na, pertge betg?
  2. Èn vegnidas dumandadas «offertas da concurrenza» u fatgas cumparegliaziuns cun autras prestaziuns (p.ex. tariffas per ura) che giustifitgeschan da giuditgar la relaziun tranter il pretsch e la prestaziun (indemnisaziun da 13 333 francs per ha u dad 1.33 francs per m2)?
  3. Na pudess – ord vista da la Regenza – l'incumbensa da tgirar territoris da protecziun betg er esser interessanta per interpresas privatas u per l'agricultura e co vegni impedì che la tgira da las surfatschas da biotops na vegn betg subvenziunada duas giadas cun pajar er pajaments directs a las puras ed als purs per las medemas surfatschas?
  4. Tenor la communicaziun a las medias è la cunvegna da prestaziun vegnida fatga per la perioda dals onns 2020 fin 2024. È questa cunvegna da prestaziun entrada en vigur retroactivamain?
  5. Giuditgescha la Regenza quai sco raschunaivel da far ina cunvegna da prestaziun cun ina NGO (probablamain senza submissiun) che fa – cun contribuziuns da sustegn, cun daners da donaziuns e cun meds finanzials gudagnads sezs sco p.ex. or da questa cunvegna da prestaziun – protestas e campagnas da votaziun cunter ils interess da la Regenza resp. dal chantun e co garantescha la Regenza che las contribuziuns na vegnian betg duvradas per proceduras da protesta e da recurs charas cunter projects chantunals?

Tavau, ils 18 da favrer 2021

Tomaschett (Breil), Engler, Grass, Berther, Berweger, Brandenburger, Brunold, Casty, Casutt-Derungs, Crameri, Danuser, Della Cà, Della Vedova, Deplazes (Rabius), Derungs, Dürler, Epp, Felix, Flütsch, Föhn, Giacomelli, Gugelmann, Hardegger, Hefti, Kasper, Kienz, Kohler, Kunfermann, Lamprecht, Loepfe, Mittner, Müller (Susch), Natter, Niggli (Samedan), Niggli-Mathis (Grüsch), Papa, Paterlini, Ruckstuhl, Sax, Schmid, Schutz, Stiffler, Thomann-Frank, Ulber, Weber, Zanetti (Landquart), Bürgi-Büchel, Collenberg, Heini

Resposta da la regenza

Tenor l'art. 18a e l'art. 18b da la Lescha federala davart la protecziun da la natira e da la patria (LPNP; CS 451) sto il chantun procurar per la protecziun e per il mantegniment dals biotops d'impurtanza naziunala, regiunala e locala. La protecziun ed il mantegniment duain sche pussaivel vegnir cuntanschids a norma da l'art. 18c al. 1 LPNP sur cunvegnas cun ils proprietaris e cun ils administraturs d'in bain immobigliar. Tenor l'art. 18c al. 2 LPNP han quels en quest connex il dretg d'ina indemnisaziun adequata resp. da contribuziuns adequatas. Las premissas per conceder contribuziuns èn regladas en ils art. 37 e 40 da la Lescha davart la protecziun da la natira e da la patria en il chantun Grischun (Lescha chantunala davart la protecziun da la natira e da la patria, LNPGR; DG 496.000). Tenor l'art. 37 al. 2 LNPGR sa drizza lur autezza tenor la part da la Confederaziun, tenor l'impurtanza da l'object sco er tenor l'efficacitad da las mesiras. La Confederaziun ed ils chantuns fixeschan da lur vart en ina cunvegna da program da plirs onns las prestaziuns finanzialas da la Confederaziun e las prestaziuns che ston vegnir furnidas en il chantun.

La Pro natura dal Grischun (en quai che suonda PNG) procura sco proprietaria d'in bain immobigliar u sco possessura dal dretg da servitut per il mantegniment da la cuntrada e da la natira sin ina surfatscha da circa 5590 ha en il chantun Grischun. Da quella sa chattan 267 ha en territoris da protecziun da la natira, 2440 ha en reservats da guaud natiral, 590 ha en cuntradas da palì e 2375 ha en territoris da protecziun da la cuntrada, var 152 ha en la surfatscha utilisada da l'agricultura e 157 ha en territoris d'alpegiada. Il chantun cumpiglia las dumondas da contribuziun da la PNG per la tgira da ses var 90 territoris protegids mintgamai en in conclus collectiv e fixescha l'autezza da las subvenziuns sco er las prestaziuns che ston vegnir furnidas en quest reguard da nov en ina cunvegna da prestaziun da 4 onns.

Tar la dumonda 1: Na. Sin basa da las directivas da las leschas spezialas da la legislaziun federala davart la protecziun da la natira e da la patria ston las contribuziuns vegnir pajadas da princip als proprietaris d'in bain immobigliar u als administraturs petents. Il pajament da questas contribuziuns ad ina persuna che ha il dretg da survegnir las contribuziuns n'è betg in causal cumpiglià dal dretg da submissiun. Percunter po quest proceder chaschunar da vart dal retschavider da subvenziuns – tut tenor l'autezza da la contribuziun – ch'el vegn suttamess a la Lescha chantunala da submissiun (Lsub; DG 803.300).

Il chantun da sia vart po surdar las prestaziuns da tgira correspundentas ad ina terza persuna mo, sch'il proprietari d'in bain immobigliar u l'administratur tralascha l'utilisaziun ch'è necessaria per cuntanscher las finamiras da protecziun (execuziun d'uffizi tenor l'art. 18c al. 3 LPNP). Quai n'è qua betg il cas.

Tar la dumonda 2: Na, las contribuziuns vegnan pajadas tenor las prescripziuns da la LPNP directamain a la petenta. Per prestaziuns da tgira furnidas da terzas persunas en singuls territoris protegids dumonda quella da sia vart offertas da concurrenza, schebain che las valurs minimalas cuntanschidas uschia na pretendessan betg in procedura da concurrenza.

L'Uffizi per la natira e l'ambient (UNA) controlla tar tut las dumondas da contribuziun cun tge tariffas ch'i vegn calculà. Tar l'examinaziun da la rentabilitad sa basa il UNA sin las recumandaziuns da la Conferenza da coordinaziun dals organs da construcziun e d'immobiglias dals patruns da construcziun publics sco er sin las basas respectivas da l'Agroscope u dal Rintg da maschinas. L'onn 2020 ha la PNG mess a quint lavurs en 265 ha (senza reservats da guaud) sur la cunvegna da prestaziun cun il chantun. Quai ha deliberà ina contribuziun da var 273 000 francs, finanziada mintgamai per la mesadad da la Confederaziun e dal chantun. Quai dat ina contribuziun da var 1030 francs per ha, quai ch'è cleramain sut las contribuziuns da biodiversitad da l'agricultura tenor ils art. 55–62 da l'Ordinaziun davart ils pajaments directs a l'agricultura (Ordinaziun davart ils pajaments directs, OPD; CS 910.13).

Tar la dumonda 3: Dal rendaquint detaglià 2020 da la PNG, che ha furmà la basa per il pajament da la transcha annuala 2020, resorta che 96 pertschient da la contribuziun totala èn vegnids pajads per incumbensas a biros ecologics ed a firmas da la tgira da la cuntrada, a singuls servetschs forestals e tecnics communals, a firmas da construcziun sco er a singuls purs per acziuns da lavur spezialas en zonas umidas. Mo 4 pertschient èn vegnids mess a quint per la direcziun e per l'administraziun dals projects. Cun las cundiziuns da pajament e cun il controlling en il UNA pon finanziaziuns dublas u l'utilisaziun da contribuziuns per in auter intent vegnir exclusas.

Tar la dumonda 4: Gea. Per motivs da l'economia da procedura entran cunvegnas da prestaziun da plirs onns normalmain retroactivamain en vigur sin il cumenzament da l'onn, en il qual la dumonda è vegnida inoltrada.

Tar la dumonda 5: Sin basa da princips dal stadi da dretg na dastga la direcziun politica dals petents da princip betg esser la basa da decisiun per il pajament da contribuziuns, er sch'i po per part dar collisiuns d'interess. Contribuziuns vegnan garantidas al petent mo per ils custs imputabels e pajadas a quel suenter che las lavurs èn vegnidas controlladas. Las controllas mussan che la PNG ha impundì en il passà las contribuziuns adina en moda correcta e ch'ella ha furnì las prestaziuns da tgira en moda professiunala. 

30 d'avrigl 2021