Navigation

Inhaltsbereich

Dumonda da la fracziun da l'Allianza dal Center concernent las consequenzas da la pandemia da COVID-19 per la sanadad psichica d'uffants e da giuvenils (emprim sutsegnader Widmer [Favugn])

Sessiun: 16.02.2022

A chaschun da la sessiun da zercladur 2021 dal Cussegl grond èn vegnids tematisads – sin basa da la dumonda Tomaschett (Cuira) – ils temps da spetga memia lungs en connex cun il tractament psichiatric d'uffants e da giuvenils.

En sia resposta en scrit explitgescha la Regenza tranter auter: «L'augment considerabel d'annunzias, respectivamain d'attribuziuns d'uffants e da giuvenils en la dimensiun da 20 fin 30 pertschient (cifras exactas en chaussa na datti betg) dapi l'erupziun da la pandemia dal coronavirus èn ina gronda sfida per la psichiatria d'uffants e da giuvenils dals Servetschs psichiatrics dal Grischun (SPGR), ma er per las persunas spezialisadas che lavuran independentamain en il sectur da la psicologia, da la psicoterapia sco er da la psichiatria d'uffants e da giuvenils. [...] Per reducir ils temps da spetga per giuvenils en il sectur staziunar han ils SPGR decidì d'installar ina staziun serrada cun tschintg letgs per giuvenils en la chasa da persunal da la clinica Waldhaus, fin che l'edifizi nov da la clinica per psichiatria d'uffants e da giuvenils dals SPGR vegn avert (previsiblamain il segund quartal da l'onn 2025). [...] L'onn current paja il chantun als SPGR ina contribuziun da 3,1 milliuns francs per prestaziuns d'utilitad publica, dals quals 1,35 milliuns francs èn per la psichiatria d'uffants e da giuvenils. La Regenza è pronta d'examinar l'augment da questa contribuziun, sche quest import n'avess betg da bastar per cuvrir ils custs dals SPGR per las prestaziuns d'utilitad publica ch'èn necessarias en la psichiatria d'uffants e da giuvenils.»

Tenor il cusseglier guvernativ responsabel existan gia passa 1000 studis internaziunals davart il tema COVID-19 e sanadad psichica d'uffants e da giuvenils. Quai ch'ins possia dir latiers: «Las experientschas ch'èn avant maun permettan da constatar, che disturbis, depressiuns, temas, malsognas psicosomaticas, anorexia e chaussas sumegliantas cumparan pli savens en cumparegliaziun cun ils temps d'avant COVID-19.»

Sut l'aspect da las explicaziuns qua survart supplitgeschan las sutsegnadras ed ils sutsegnaders la Regenza da respunder las suandantas dumondas:

  1. Ils 13 da december 2021 han ils SPGR prendì en funcziun la nova staziun da giuvenils «P1 ACUT» cun tschintg plazzas cumplainamain staziunaras en la clinica Waldhaus. Questa staziun duai servir sco mesira transitorica fin il cumenzament dal manaschi en l'edifizi nov da la Clinica per psichiatria d'uffants e da giuvenils.
    Tge facit vegn tratg suenter las emprimas emnas?
  2. Quant enavant è terminada l'examinaziun da la Regenza, tenor la quala i fiss eventualmain d'augmentar l'import per cuvrir ils custs ch'ils SPGR dovran per las prestaziuns necessarias d'utilitad publica en la psichiatria d'uffants e da giuvenils?
  3. Parta la Regenza dal fatg, che la planisaziun chantunala dal futur, ch'è vegnida communitgada (particularmain l'edifizi nov da la Clinica per la psichiatria d'uffants e da giuvenils) tanschia per reducir ils temps da spetga e per pussibilitar la terapia la pli svelta ed optimala?
  4. Ils problems psichics dals uffants e dals giuvenils na vegnan betg ad esser terminads automaticamain, sche la situaziun da COVID-19 sa normalisescha speranza bainprest. Las consequenzas a lunga durada vegnan ad occupar vinavant tut las parts che porschan agid. Ha la Regenza ina strategia accumpagnanta a lunga vista per mitigiar ils resultats numnads qua survart (disturbis, depressiuns, temas, malsognas psicosomaticas, anorexia e chaussas sumegliantas) u è ella pronta da sviluppar ina tala?
  5. Tenor il cusseglier guvernativ responsabel sa mussi, «ch'il martgà da plazzas da lavur en il sectur da la psichiatria d'uffants e da giuvenils è extremamain exaurì, e quai en l'entira Svizra.» Co sa preschenta la strategia respectiva da la Regenza a curta ed a media vista per il chantun Grischun, respectivamain sa fidan ins cunzunt da la realisaziun da l'Iniziativa da tgira da vart da la Confederaziun?
  6. Ina tgira psichiatrica ambulanta visita las persunas a chasa, promova la chapientscha per l'atgna malsogna e tschertga vias – ensemen cun las persunas pertutgadas – per pudair tractar lur difficultads en il mintgadi. Las purschidas staziunaras èn occupadas fitg bain u schizunt suroccupadas. È la Regenza pronta d'examinar er purschidas ambulantas en il sectur simpel e/u pretensius?

Cuira, ils 16 da favrer 2022

Widmer (Favugn), Ruckstuhl, Hardegger, Berther, Bettinaglio, Bondolfi, Brunold, Buchli-Mannhart, Caluori, Casutt-Derungs, Clalüna, Crameri, Danuser, Della Vedova, Deplazes (Rabius), Derungs, Ellemunter, Epp, Florin-Caluori, Föhn, Geisseler, Kohler, Kunfermann, Lamprecht, Loepfe, Maissen, Märchy-Caduff, Michael (Donat), Müller (Susch), Niggli-Mathis (Grüsch), Sax, Schmid, Schneider, Tanner, Tomaschett (Breil), Ulber, Widmer-Spreiter (Cuira), Zanetti (Landquart), Bürgi-Büchel, Collenberg, Gujan-Dönier, Heini

Resposta da la regenza

En cumparegliaziun cun il tractament da la dumonda Tomaschett (Cuira) en la sessiun da zercladur 2021 n'è la situaziun dals studis betg sa midada considerablamain, perquai che la gronda part dals studis è concepida per ina perioda pli lunga (durant e suenter la pandemia).

Tar la dumonda 1: La staziun da giuvenils P1 ACUT ch'ils Servetschs psichiatrics dal Grischun (SPGR) han avert da nov, gida cleramain a meglierar la situaziun en connex cun cas d'urgenza. La separaziun dals giuvenils da las persunas creschidas e la pussaivladad da pudair recepir giuvenils directamain en il sectur da la psichiatria d'uffants e giuvenils han in effect extraordinariamain positiv per ils andaments dal tractament dals giuvenils. Ultra da quai han pudì vegnir evitadas intginas assegnaziuns directas a la Clinica Littenheid e dischlocaziuns dals SPGR en quella n'èn betg pli stadas necessarias. Cun extender la purschida staziunara, cun concepir uras da consultaziun spezialas e cun stgaffir novas plazzas tras ils SPGR è vegnì reducì il temp da spetga en il sectur ambulant per 3 fin 4 emnas. Ils termins da spetga per plazzas da terapia staziunaras na vegnan betg reducids tras la nova staziun da giuvenils P1 ACUT, perquai che questa staziun è ina staziun d'urgenza.

Tar la dumonda 2: En il sectur dals tractaments ambulants da la psichiatria d'uffants e giuvenils è – tenor ils SPGR – resultà l'onn 2021 in import dad 1,2 milliuns francs, che n'è betg cuvrì tras las tariffas e tras la contribuziun dal chantun per prestaziuns d'utilitad publica. Ils SPGR han annunzià d'inoltrar ina dumonda al chantun da surpigliar ils custs, cur che la clusiun dal quint annual revedida è avant maun.

Tar la dumonda 3: Cun la nova clinica per la psichiatria d'uffants e giuvenils vegni ad esser pussaivel a partir da l'onn 2025 da reducir cleramain ils temps da spetga per ils tractaments staziunars e parzialmain staziunars. Pia èsi da recrutar il persunal necessari per tractar ed assister ils giuvenils en moda che satisfa a las pretensiuns da qualitad. Per la nova clinica da psichiatria e psicoterapia d'uffants e giuvenils dovri ca. 10 plazzas a temp cumplain da medias e medis sco er da psicologas e psicologs, 30 spezialistas e spezialists da tgira e da pedagogia sociala sco er pliras persunas d'instrucziun.

Tar la dumonda 4: La planisaziun successiva dal provediment, che vegn fatga dal chantun, sa basa sin l'occupaziun actuala dals letgs da la psichiatria d'uffants e giuvenils tras persunas minorennas dal Grischun e sin il basegn prognostitgà tendenzialmain en Europa. Ella duess permetter da far frunt a las consequenzas da disturbis sco depressiuns, temas, malsognas psicosomaticas, anorexias ed autras chaussas che cumparan pli savens en cumparegliaziun cun ils temps d'avant COVID-19.

Tar la dumonda 5: Ad eliminar la mancanza da las persunas spezialisadas necessarias per in tractament e per in'assistenza d'auta qualitad dals uffants e dals giuvenils, po la Regenza gidar mo indirectamain. Uschespert che las prescripziuns federalas concernent la realisaziun da l'Iniziativa da tgira èn avant maun, vegn il chantun – en il rom da sias pussaivladads – a sustegnair ils SPGR. Ils SPGR da lur vart ston – sco patrun – gidar ad augmentar l'attractivitad da lavurar en la psichiatria d'uffants e giuvenils, quai cun porscher cundiziuns d'engaschament e da lavur attractivas.

Tar la dumonda 6: La Regenza è pronta d'examinar – en cooperaziun cun ils furniturs da prestaziun respectivs – purschidas ambulantas supplementaras en il sectur simpel e/u pretensius, uschia er en il sectur da la psicologia da scola e da la pedagogia sociala. Actualmain existan purschidas ambulantas dals SPGR, che pertutgan la psichiatria d'uffants e giuvenils, a Cuira, Cazas, Glion, Mustér, Tavau, Samedan, Scuol, Santa Maria, Poschiavo e Grono. 

8 d'avrigl 2022