Ils 13 da favrer 2022 han las votantas ed ils votants da Cuira approvà cun ina maioritad da 67% da las vuschs ina cuntraproposta dal Cussegl da citad tar l'iniziativa da la PS per canortas d'uffants pajablas. Cun quai augmenta la citad da Cuira sias contribuziuns a la tgira d'uffants cumplementara a la famiglia per 50 pertschient a partir da l'onn 2023. En quest connex èsi remartgabel che tut las partidas han sustegnì quest augment.
Ina tala soluziun n'è betg giavischabla mo per Cuira, mabain per l'entir chantun. Canortas pajablas en l'entir chantun distgargian numnadamain las famiglias, promovan l'egualitad, cumbattan la mancanza da persunas spezialisadas e rendan il chantun Grischun pli attractiv sco chantun d'abitar. Supplementarmain a la soluziun da Cuira sto il chantun garantir – cun contribuziuns da manaschi –ina purschida da basa en tut il chantun.
Las sutsegnadras ed ils sutsegnaders incumbenseschan perquai la Regenza da preschentar al Cussegl grond – en il rom da la revisiun totala da la Lescha davart la promoziun da la tgira d'uffants cumplementara a la famiglia – ina varianta,
- cun la quala vegnan augmentadas las contribuziuns a la tgira d'uffants cumplementara a la famiglia per almain 50 pertschient (quai duai vegnir da bun a las persunas responsablas per l'educaziun);
- cun la quala vegn garantida – cun agid da contribuziuns dals manaschis – ina purschida da la tgira d'uffants cumplementara a la famiglia per l'entir chantun e per tut las famiglias.
Cuira, ils 16 da favrer 2022
Perl, Müller (Favugn), Horrer, Atanes, Baselgia-Brunner, Cahenzli-Philipp, Cantieni, Caviezel (Cuira), Degiacomi, Gartmann-Albin, Hofmann, Noi-Togni, Preisig, Rettich, Rutishauser, Wilhelm, Pajic, Spadarotto, Tomaschett (Cuira)