Navigation

Inhaltsbereich

Dumonda urgenta Horrer concernent la realisaziun da las sancziuns cunter la Russia

Sessiun: 21.04.2022

L'offensiva da la Russia cunter l'Ucraina violescha il dretg internaziunal. Per consequenza han ils pajais dal vest reagì cun vastas sancziuns economicas. Las sancziuns tutgan fermamain la Russia e pon perquai gidar ad influenzar la guerra e procurar che l'agressur daventa inabel d'agir en reguard finanzial.

En sia sesida extraordinaria dals 28 da favrer 2022 ha il Cussegl federal decidì da surpigliar las sancziuns da la UE cunter la Russia. Il Cussegl federal ha incumbensà il Departament federal d'economia, furmaziun e retschertga (DEFR) cun la realisaziun da las sancziuns.

Avant il conclus dal Cussegl federal hai dà dis da spetga e d'entardament. En vista a l'offensiva russa che violescha il dretg internaziunal, è il targlinim dal Cussegl federal stà nunchapibel. Uschia è il Cussegl federal alura er vegnì crititgà da tut las partidas che stiman ils dretgs umans ed il dretg internaziunal.

Sut quest aspect fai smirvegliar in pau da vesair ch'i dat difficultads da realisaziun e da coordinaziun en connex cun l'execuziun da las sancziuns. Numerusas medias (tranter auter la «Republik», il «Tages Anzeiger» u «SRF Reporter») han rapportà pir dacurt davart il fatg che las sancziuns vegnian realisadas mo plaun. En la SonntagsZeitung dal Tages Anzeiger dals 9 d'avrigl 2022 ha plinavant er l'ambassadur da l'Ucraina en Svizra, Artem Rybchenko, pretendì dapli engaschament da la Svizra en connex cun il sancziunament da facultads russas en Svizra.

Las sutsegnadras ed ils sutsegnaders supplitgeschan perquai gentilmain la Regenza da respunder las suandantas dumondas:

  1. Quant bain funcziuna la collavuraziun cun il Secretariat da stadi per l'economia (SECO) areguard la realisaziun da las sancziuns?
  2. Èn scleridas (en il fratemp) las cumpetenzas tranter la Confederaziun ed ils chantuns en connex cun l'execuziun da las sancziuns? Co sa preschentan quellas da princip?
  3. Èsi sclerì en il fratemp (en spezial en reguard giuridic) ch'il secret fiscal n'ha betg l'intent d'engrevgiar l'execuziun da las sancziuns?
  4. Tge ha il chantun fatg per segirar valurs da facultad da burgaisas e burgais russ sancziunads che stattan datiers dal reschim?
  5. È la Regenza grischuna pronta da s'engaschar tar la Confederaziun per in'execuziun effizienta da las sancziuns e – sche necessari – d'intervegnir correspundentamain?

Cuira, ils 19 d'avrigl 2022

Horrer, Bettinaglio, Bigliel, Atanes, Baselgia-Brunner, Buchli-Mannhart, Cahenzli-Philipp (Vaz Sut), Cantieni, Casutt-Derungs, Caviezel (Cuira), Degiacomi, Deplazes (Rabius), Ellemunter, Gartmann-Albin, Gugelmann, Hardegger, Hofmann, Kunfermann, Lamprecht, Loepfe, Maissen, Märchy-Caduff, Müller (Susch), Niggli-Mathis (Grüsch), Noi-Togni, Perl, Pfäffli, Preisig, Rettich, Rutishauser, Sax, Tanner, Ulber, Widmer-Spreiter (Cuira), Wilhelm, Zanetti (Landquart), Bürgi-Büchel, Costa, Tomaschett (Cuira), van Kleef

Resposta da la regenza

Tar la dumonda 1: Sur l'Inspecturat dal register funsil ha l'Uffizi federal da giustia (UFG) – suenter avair consultà il SECO – incumbensà ils uffizis dal register funsil gia ils 2 da mars 2022 da remartgar ina bloccada dal dretg da disponer da bains immo­bi­gliars, e quai per las proprietarias ed ils proprietaris che figureschan sin la glista dal SECO sco er da far in'annunzia al SECO. Questa collavuraziun funcziuna bain. Per­cunter n'è l'Administraziun da taglia (ATa) – cun excepziun dal fegl d'infurmaziun dal 1. d'avrigl 2022 – mai vegnida contactada dal SECO, ni directamain ni indirectamain sur l'Administraziun federala da taglia (AFT). Anc avant che pajataglias cun domicil en il Grischun figuravan sin la glista dal SECO, ha la ATa – avant tut ils auters chan­tuns – dumandà il SECO, sche las administraziuns chantunalas da taglia sajan per­tutgadas da la Lescha federala davart l'applicaziun da sancziuns internaziunalas (Lescha d'embargo, LEmb; CS 946.231) resp. da l'Ordinaziun davart las mesiras en connex cun la situaziun en l'Ucraina (O Ucraina; CS 946.231.176.72). Il SECO ha renvià la ATa ad in fegl d'infurmaziun che vegnia tramess a tut ils chantuns a temp util (cf. resposta a la dumonda 3). Ord vista da la ATa è la collavuraziun cun il SECO perquai stada ditg nuncuntentaivla. I po pia vegnir constatà che la collavuraziun è per part stada nuncuntentaivla.

Tar la dumonda 2: Avant ch'il fegl d'infurmaziun menziunà è stà avant maun, n'eri betg cler per las administraziuns da taglia, sch'ellas hajan in'obligaziun d'annunzia u betg. Las incumbensas da las administraziuns da taglia èn vegnidas scleridas pir cun il fegl d'infurmaziun che ha precisà che las administraziuns da taglia sajan sutta­mes­sas a l'obligaziun d'annunzia. Areguard las sancziuns dals uffizis dal register funsil cf. resposta a la dumonda 1.

Tar la dumonda 3: Gia avant l'intervista dal substitut dal manader da la ATa dals 15 da mars 2022 per l'emissiun «DOK Reporter» dad SRF (emessa ils 23 da mars 2022) era la ATa sa fatschentada intensivamain cun la O Ucraina ed aveva contactà il SECO. Il SECO è stà ditg da l'avis che las administraziuns da taglia na sajan insumma gnanc pertutgadas da la O Ucraina e na stoppian perquai far naginas annunzias. Quest punct da vista n'ha betg persvadì la ATa. Sin basa d'ina interpretaziun actuala da la LEmb e da la O Ucraina sco er tenor il senn e tenor l'intent da quests decrets èsi svelt stà cler per la ATa ch'er las administraziuns da taglia stoppian annunziar al SECO valurs da facultad da persunas che figureschan sin la glista dal SECO. Ultra da quai è la ATa stada da l'avis che la O Ucraina e la LEmb hajan la precedenza envers il secret fiscal. Perquai ha la ATa contactà auters chantuns, la Conferenza svizra da taglia ed il SECO. Sin quai ha la ATa vulì far las annunzias. Il SECO ha supplitgà la ATa da desister da quai e da spetgar il fegl d'infurmaziun. Il 1. d'avrigl ha il SECO tramess a tut ils chantuns il fegl d'infurmaziun menziunà ed ha precisà en quel per l'emprima giada uffizialmain che l'obligaziun d'annunzia valia er per las administraziuns da taglia. Gia avant che la ATa ha survegnì il fegl d'infurmaziun, aveva ella fatg tut ils scleriments necessaris per far las annunzias. Las annunzias èn lura vegnidas fatgas gist suenter ch'il fegl d'infurmaziun era arrivà. Sco ch'i sa mussa è la ATa stada l'em­prima administraziun da taglia che ha fatg annunzias al SECO. Dal rest ha il schef dal Departament da finanzas e vischnancas (DFV) infurmà las medias ils 5 d'avrigl 2022 davart las annunzias da la ATa al SECO.

Tar la dumonda 4: Dapi ch'il Cussegl federal ha decidì ils 28 da favrer 2022 da sur­pi­gliar las sancziuns da la UE cunter la Russia, han las autoritads chantunalas pertu­tgadas persequità quest affar cun emprima prioritad e fatg scleriments en chaussa. La ATa n'ha betg spetgà l'emprim, fin che las glistas da sancziuns dal SECO eran avant maun, mabain ha gia cumpareglià las glistas da sancziuns da la UE cun il regi­ster da taglia. Quai vegn ella a far er vinavant immediatamain. Sco emprim chantun ha la ATa er tramess al SECO las annunzias preparadas davart valurs da facultad da persunas sancziunadas, directamain suenter ch'ella aveva survegnì il fegl d'infur­ma­ziun (cf. er resposta a la dumonda 3). Per las proprietarias ed ils proprietaris che fi­gu­ravan sin la glista dal SECO han ils uffizis dal register funsil remartgà immediatamain ina bloccada dal dretg da disponer dals bains immobigliars ed han annunzià quai al SECO.

Tar la dumonda 5: Las autoritads chantunalas èn s'occupadas immediatamain da lur obligaziuns en connex cun l'execuziun da las sancziuns ed han agì svelt. Sco expli­tgà en la resposta a la dumonda 3, ha la ATa contactà fitg svelt il SECO, è s'expri­mi­da envers auters chantuns a favur d'ina annunzia ed ha annunzià las valurs da facul­tad correspundentas, gist suenter ch'ella aveva survegnì il fegl d'infurmaziun. Ils uffi­zis dal register funsil n'han gì nagin motiv d'intervegnir tar il SECO. Cuntrari a la ATa èn els numnadamain vegnids incumbensads gia fitg baud da remartgar bloccadas dal dretg da disponer da bains immobigliars. Da quai resorti ch'il chantun n'è betg stà inactiv envers il SECO. Anzi, il chantun è s'engaschà per ina clera execuziun da las sancziuns. Quai vegn el a far er en l'avegnir.

21 d'avrigl 2022