En il sectur da sanadad e dals fatgs socials dal chantun Grischun vegnan applitgads differents sistems da salarisaziun tar la premissa da finanziaziun. Las instituziuns commembras da la Federaziun grischuna Chasas ed ospitals sco er da la Spitex applitgeschan dapi il 1. da schaner 2013 la valitaziun da la funcziun analitica ch'era vegnida elavurada da nov da ses temp e ch'è vegnida actualisada e tgirada sur onns. En quest sistem vegnan las funcziuns manaschialas registradas, valitadas e classifitgadas sco en il sistem da salarisaziun chantunal.
En il sectur da las instituziuns da la scola speziala na vegn quest sistem da salarisaziun dal chantun Grischun dentant betg renconuschì per la finanziaziun. Sco motiv èsi vegnì numnà pli baud, che las collavuraturas ed ils collavuraturs da questas instituziuns duessan avair il medem status sco las persunas emploiadas dal chantun. Quai na correspunda oz dentant betg pli a la realitad, perquai ch'il chantun dovra per sias persunas emploiadas il model dal spectrum da variaziun. Per las collavuraturas ed ils collavuraturs da las instituziuns da la scola speziala vala dentant, cun excepziun da las persunas d'instrucziun, anc adina il plan da classificaziun chantunal da l'onn 1995, respectivamain 2004. Dapi passa 20 onns n'è quel betg pli vegnì actualisà e tgirà. Plinavant na tegna quest plan da classificaziun betg quint da las funcziuns ch'èn vegnidas stgaffidas da nov.
Collavuraturas e collavuraturs cun la medema scolaziun e funcziun vegnan salarisads en moda differenta, tut tenor il sectur dals fatgs socials ed en cumparegliaziun cun l'administraziun chantunala. Quai frunta sin nunchapientscha. Ultra da quai han las instituziuns da la scola speziala uschia in cler dischavantatg, cura ch'i va per recrutar persunal spezialisà. En instituziuns cun purschidas tant per uffants e giuvenils sco er en il sectur da las persunas creschidas, resulta ina inegualitad da las pajas malonesta.
Las sutsegnadras ed ils sutsegnaders èn da l'opiniun, che quest tractament inegual che sa basa sin las «Disposiziuns davart la finanziaziun d'instituziuns da la scolaziun speziala dal chantun Grischun», stoppia vegnir curregì, per che las instituziuns da la scolaziun speziala hajan las medemas schanzas per recrutar persunal spezialisà e per che questas discriminaziuns da paja nungiustifitgadas vegnian eliminadas. Pervia da la mancanza da persunas spezialisadas er en questa branscha è quai urgentamain necessari.
Las sutsegnadras ed ils sutsegnaders incumbenseschan la Regenza d'adattar las «Disposiziuns davart la finanziaziun d'instituziuns da la scolaziun speziala dal chantun Grischun», uschia che l'inegualitad da paja vegnia curregida.
Cuira, ils 19 d'october 2022
Cahenzli-Philipp (Vaz Sut), Loepfe, Holzinger-Loretz, Atanes, Bardill, Baselgia, Beeli, Biert, Binkert, Bischof, Bisculm Jörg, Bleuler-Jenny, Collenberg, Danuser (Cazas), Derungs, Dietrich, Furger, Gansner, Gartmann-Albin, Gredig, Hoch, Kaiser, Kocher, Kohler, Kreiliger, Maissen, Mani, Mazzetta, Messmer-Blumer, Müller, Nicolay, Oesch, Perl, Preisig, Rageth, Rettich, Righetti, Rusch Nigg, Rutishauser, Said Bucher, Spagnolatti, Ulber, von Ballmoos, Walser, Widmer, Wilhelm, Zanetti (Sent)