Tenor la nova Cunvegna interchantunala davart las acquisiziuns publicas (CIAP; DG 803.710) po la Dretgira administrativa – sco tenor il dretg vertent – conceder sin dumonda l'effect suspensiv ad in recurs, sch'il recurs para dad esser motivà suffizientamain e sche nagins interess publics predominants na s'opponan a quai. Per giuditgar la motivaziun d'in recurs sto la derschadra u il derschader d'instrucziun preparar il causal relevant per la decisiun sco er far ina emprima consideraziun giuridica sin basa da las actas voluminusas. Quai pretenda in tschert temp minimal. Cun prender la decisiun davart l'effect suspensiv, vegn anticipada en ina dimensiun considerabla la decisiun principala che vegn tratga da la dretgira collectiva en ina furmaziun da 3 u da 5 derschadras e derschaders. In termin regular spezial per la decisiun davart l'effect suspensiv na prevesan ni la revisiun da la CIAP ni la Lescha federala davart las acquisiziuns publicas (LAP; CS 172.056.1) ch'è vegnida armonisada cun ils chantuns. Sco ch'i para vegn mo il chantun Son Gagl ad enconuscher ina tala prescripziun en l'avegnir. L'effect suspensiv permetta a la recurrenta da mantegnair sias atgnas schanzas da survegnir l'agiudicaziun. In effect suspensiv concedì da la dretgira po percunter retardar sut tschertas circumstanzas projects d'acquisiziun impurtants ed urgents. Ma sche la dumonda da conceder l'effect suspensiv na vegn percunter betg acceptada, sa restrenscha la protecziun giuridica da la recurrenta sin la constataziun da l'illegalitad, vul dir che la recurrenta na po betg pli obtegnair l'agiudicaziun sco tala. La decisiun davart la concessiun u davart la refusa da l'effect suspensiv dovra pia ina consideraziun premurusa e na dastga betg vegnir prendida memia svelt.

Tar la dumonda 1: La Regenza è er da l'avis, che la decisiun davart l'effect suspensiv, però er la decisiun en la chaussa principala, na dastga betg esser d'ina durada smesirada. Quai n'è però er betg il cas. Tenor la pratica conceda la Dretgira administrativa dal Grischun ad in recurs – sco las ulteriuras dretgiras chantunalas – immediatamain ed en moda superprovisorica l'effect suspensiv, fraina uschia l'effect da l'agiudicaziun ed envida a medem temp las partidas da prender posiziun. Sch'i sa mussa en il rom d'ina correspundenza, ch'igl exista in interess public predominant da betg conceder l'effect suspensiv (p.ex. traject da via pertutgà, nua ch'i capitan blers accidents), retira la Dretgira administrativa – cun agid d'ina decisiun intermediara dal recurs, che vegn communitgada baud – al recurs l'effect suspensiv e pussibilitescha da suttascriver il contract. En ils ulteriurs cas lascha ella pendent il stadi da procedura superprovisoric e prenda – suenter la terminaziun da la correspundenza – immediatamain la decisiun davart la chaussa principala. En cas d'in recurs normal vegn la sentenzia communitgada a las partidas – tenor l'infurmaziun da la Dretgira administrativa – en media entaifer var 3 mais suenter l'entrada dal recurs. En cumparegliaziun cun ils ulteriurs chantuns e particularmain en cumparegliaziun cun la Confederaziun pon ins designar quest termin sco fitg curt.

Tar la dumonda 2: La Regenza è da l'opiniun che la pratica da la Dretgira administrativa haja ina procedura economica e saja speditiva. Ina decisiun separada davart l'effect suspensiv na gida betg adina ad accelerar las proceduras, perquai ch'igl exista in med legal er cunter questa decisiun intermediara. Sche quel vegn prendì, sa prolunghescha la procedura. Ad ina decisiun svelta pon dentant contribuir er las partidas. Per regla èsi pli cunvegnent, sch'ils posts d'acquisiziun s'opponan mo en cas d'ina urgenza cumprovada a la concessiun da l'effect suspensiv per lur projects planisads gia daditg e sch'els pretendan percunter ch'i vegnia prendida uschè svelt sco pussaivel ina decisiun en la chaussa principala. Ils recurrents pon vegnir disciplinads da sa retegnair, sch'ils incumbensaders publics ed ils offerents resguardads fan valair lur dretgs d'indemnisaziun tenor la CIAP en cas da dumondas giuridicamain abusivas u cuntrarias a la buna fai.

Tar la dumonda 3: La Regenza giuditgescha che las disposiziuns pertutgant la protecziun giuridica – ch'èn vegnidas elavuradas dals chantuns e da la Confederaziun en la CIAP ed en la LAP – sajan fitg equilibradas, ed ella na vesa nagin basegn da suttametter propostas da revisiun per mauns da la legislativa. Quai er sut l'aspect che l'armonisaziun dal dretg da surdada, che la Confederaziun ed ils chantuns han cuntanschì, è stada ina da las finamiras principalas e che mintga soluziun individuala u mintga regulaziun chantunala divergenta sto vegnir giuditgada criticamain.

1. da mars 2023