Sco ch'i vegn constatà correctamain en l'incumbensa, pretenda la cumplexitad per realisar ils plans e las prescripziuns dal dretg federal bler da tut las partidas participadas al process da planisaziun. Quai sa mussa en spezial en il fatg, ch'in grond dumber da vischnancas na vegn probablamain betg a pudair observar il termin ch'è fixà en il Plan directiv chantunal per la realisaziun da l'emprima etappa da la revisiun da la Lescha federala davart la planisaziun dal territori (LPT 1). La durada da las proceduras per l'examinaziun preliminara chantunala resp. per l'approvaziun da las planisaziuns d'utilisaziun dependa da differents facturs (cf. resposta da la Regenza a la dumonda Gort dals 17 d'october 2022; protocol nr. 800/2022). L'emprim ston ins sa render conscient, ch'il chantun è lià a las disposiziuns da procedura generalas e da dretg spezial. Perquai ch'i sto vegnir concedì l'attenziun giuridica a las partidas participadas a la procedura e perquai ch'i suondan lura savens lungas correspundenzas (che na vegnan betg influenzadas dal chantun), sa prolunghescha la procedura d'approvaziun correspundentamain. Questa circumstanza sa mussa cunzunt, perquai ch'i vegnan inoltrads regularmain numerus recurs cunter las revisiuns totalas da las planisaziuns localas, nua ch'i vegnan concludidas dezonaziuns. Plinavant resorta la norma d'examinaziun che l'autoritad d'approvaziun sto applitgar, da las prescripziuns legalas (cf. art. 26 da la Lescha davart la planisaziun dal territori, LTP; CS 700). Las planisaziuns localas ston correspunder a las prescripziuns da la LTP ch'èn vegnidas extendidas tras la LPT 1, al dretg da la planisaziun dal territori funcziunal sco er a la Lescha davart la planisaziun dal territori per il chantun Grischun (LPTGR; DG 801.100). Gia en il rom da l'examinaziun preliminara sto vegnir fatga in'examinaziun correspundenta da l'approvabladad. In'approvaziun en etappas da parts d'ina planisaziun locala (en il senn da l'art. 49 al. 4 LPTGR) è la finala admissibla mo, sch'i na sa laschan spetgar naginas consequenzas pregiuditgantas per l'ulteriura procedura d'approvaziun e sch'il princip da l'examinaziun cumplessiva na vegn betg violà. En cas da revisiuns totalas pervia da la LPT 1 na po quai regularmain betg vegnir presumà. En vista a questas prescripziuns legalas èsi pussaivel mo limitadamain da simplifitgar e da scursanir las proceduras. Dapi il relasch dal Plan directiv chantunal Abitadi e dapi la revisiun da la LPTGR l'onn 2018 ha il chantun tuttina elavurà differents instruments ed agids da lavur per mussar las cundiziuns generalas giuridicas e per facilitar uschia la planisaziun a las vischnancas. L'Uffizi per il svilup dal territori (UST) sviluppa e realisescha cuntinuadamain standardisaziuns ed automatisaziuns, per exempel en furma d'examinaziuns automatisadas da las datas digitalas sco er dals texts da model. La vischnanca sto però motivar suffizientamain la confurmitad legala da la planisaziun ch'ella ha preschentà (particularmain areguard las novas prescripziuns da la LPT 1 concernent dimensiunar, mobilisar e densifitgar las zonas da construcziun), quai per ch'ina examinaziun possia insumma vegnir fatga. Sch'ils documents da planisaziun na vegnan betg inoltrads cun la motivaziun necessaria, dovri savens scleriments intensivs e lungas audiziuns da las vischnancas. La durada da la procedura dependa pia directamain da la qualitad da la planisaziun. Il chantun n'è pia betg il punct da contact decisiv en connex cun la dumonda pertutgant eventualas mesiras per accelerar la procedura. Quai na duai dentant betg snegar il fatg, che l'actuala «unda da planisaziun» ha purtà er il persunal dals posts chantunals cumpetents al cunfin da sias capacitads. Plinavant èsi da far quint che la chargia vegnia a s'augmentar vinavant ils proxims onns. Quai en spezial pervia da las incumbensas supplementaras en connex cun ils implants autalpins sin surfatschas libras (Solarexpress) sco er pervia d'eventualas lavurs supplementaras en connex cun la segunda etappa previsa da la revisiun da la LPT concernent construir ordaifer las zonas da construcziun (LPT 2). Sut quest aspect examinescha il UST d'augmentar ses persunal – ulteriuramain al process ordinari d'acquisiziun da plazzas – en il rom da las prescripziuns dal preventiv. Ils augments da persunal vegnan suttamess al Cussegl grond durant la sessiun da december en il rom da la debatta davart il preventiv 2024. Da remartgar èsi er, ch'il martgà da plazzas è difficil e ch'ins sto far quint cun in temp d'introducziun dad 1 onn per novas emploiadas e novs emploiads. Las mesiras ch'èn pussaivlas sin plaun chantunal vegnan uschia gia realisadas e vegnan suttamessas la fin da l'onn 2023 al Cussegl grond. Sa basond sin quests fatgs propona la Regenza al Cussegl grond d'acceptar questa incumbensa e da la stritgar sco liquidada.

16 da favrer 2023