Navigation

Inhaltsbereich

Incumbensa Loi concernent la publicaziun da las averturas da las offertas e communicaziun dals criteris d'agiudicaziun tar incumbensas dal chantun

Sessiun: 15.06.2023

Il chantun Grischun surdat mintga onn incumbensas en la valur da plirs tschient milliuns francs. Per l'economia da construcziun grischuna e per ses furniturs directs èn questas incumbensas da fitg gronda impurtanza.

Las incumbensas vegnan publitgadas sin www.simap.ch. Fin ussa vegnivan las averturas da las offertas publitgadas mintgamai sin www.submission.gr.ch e pudevan uschia vegnir consultadas da mintgin, cunzunt er da las interpresas che na fan betg sezzas offertas. Dapi la participaziun dal chantun Grischun a la CIAP (Cunvegna interchantunala davart las acquisiziuns publicas) na vegn quai betg pli fatg. Quai, cumbain ch'il chantun Grischun ha empermess dapli transparenza en las proceduras da surdada cun sia participaziun a la CIAP.

Questa transparenza mancanta è in grond problem per las interpresas che na fan betg sezzas offertas. Ellas n'han nagina pussaivladad da s'infurmar da vart uffiziala, tge offertas ch'èn vegnidas inoltradas da tge interpresas. In furnitur da glera u da betun, in furnitur d'atschal, in montader da puntanadas, in interprendider da transport ed ulteriurs manaschis da furniziun che survegnan incumbensas sco subinterpresas, pon mo pli far in'offerta sin dumonda directa d'in offerent direct ubain far in'offerta spontana a tut ils offerents directs che vegnan en dumonda.

Las lavurs vegnan surdadas tenor novs criteris. Ils detagls da quests criteris restan intransparents per ils offerents. Quai è en quest senn deplorabel, perquai ch'ils offerents pudessan s'orientar a quests criteris tar publicaziuns futuras, per cuntanscher uschia spezialmain in effect en il sectur da la persistenza e da l'ecologia.

La concepziun transparenta e plausibla dals pass da la procedura cun la publicaziun da las averturas da las offertas e cun la communicaziun dals criteris d'agiudicaziun en connex cun surdadas da lavurs èn da gronda impurtanza. Quai stgaffescha confidenza ed è da gronda impurtanza existenziala per tut ils offerents.

Las sutsegnadras ed ils sutsegnaders incumbenseschan la Regenza da concepir las disposiziuns executivas chantunalas tar la CIAP uschia che:

  1. tut las averturas da las offertas ston vegnir publitgadas uffizialmain;
  2. ils criteris d'agiudicaziun vegnan preschentads en moda transparenta e plausibla a tut las interpresas che fan sezzas offertas;
  3. i vegnia communitgà generalmain en moda transparenta e plausibla suenter l'entrada da las offertas e tar la surdada d'incumbensas.

Claustra, ils 15 da zercladur 2023

Loi, Rüegg, Della Cà, Adank, Altmann, Bavier, Berther, Berweger, Brandenburger, Bundi, Censi, Claus, Cola Casaulta, Cortesi, Crameri, Derungs, Furger, Gansner, Grass, Hartmann, Hefti, Heini, Hohl, Holzinger-Loretz, Hug, Jochum, Koch, Kocher, Lamprecht, Luzio, Menghini-Inauen, Michael Beni (Donat), Michael (Castasegna), Mittner, Morf, Natter, Rauch, Righetti, Roffler, Saratz Cazin, Sax, Schutz, Sgier, Stiffler, Stocker, Thür-Suter, von Tscharner, Wieland

Resposta da la regenza

Il dretg d'acquisiziun armonisà tranter la Confederaziun ed ils chantuns ha en mira – ultra dal diever duraivel da meds finanzials publics, da la transparenza da las proce­du­­ras da surdada, dal tractament egual e da la nundiscriminaziun dals offerents – er la promoziun da la concurrenza efficazia tranter ils offerents, en spezial tras mesiras cunter cunvegnas da concurrenza inadmissiblas e cunter la corrupziun. En il rom da la participaziun a la nova Cunvegna interchantunala davart las acquisiziuns publicas (CIAP; DG 803.710) ha il chantun decidì, per motivs da transparenza da la procedu­ra, da mantegnair – sco in dals paucs chantuns – l'avertura publica da las offertas cun la pussaivladad da sa participar dals offerents participads a la procedura. Dapi l'introducziun dal nov dretg d'acquisiziun vegni percunter desistì da publitgar ils pro­tocols da las averturas da las offertas en l'internet cun numnar ils offerents e lur pretschs d'offerta sco part da las mesiras da compliance introducidas cunter cunve­gnas cun la totalitad dals chantuns. Il princip da transparenza procura dentant, che proceduras d'acquisiziun ston esser chapaivlas per tut ils offerents. Tenor la CIAP ston perquai ils criteris d'agiudicaziun decisivs vegnir communitgads vinavant en la publicaziun sezza u en ils documents da submissiun – da nov cun lur valitaziun. Per fixar ils criteris respectivs ston ultra da quai vegnir resguardads pli fitg ils criteris da qualitad e da persistenza sco er ils custs dal ciclus da vita da las acquisiziuns. Ultra da quai ston decisiuns d'agiudicaziun en la procedura averta e selectiva sco er en la procedura directa, sch'i vegn applitgà in fatg excepziunal, vegnir publitgadas da nov en mintga cas sin la plattafurma d'internet Simap.ch che vegn manada cuminaivla­main da la Confederaziun e dals chantuns. La Regenza è conscienta dal fatg, che que­sta midada da paradigma tar las acquisiziuns publicas chaschuna custs supple­men­tars durant la fasa iniziala. Perquai vegn il chantun ad intensivar il barat specific periodic cun las represchentantas ed ils represchentants da las branschas. Quel pre­sta ina contribuziun impurtanta per stabilir process d'acquisiziun plausibels e concis sco er per cuntanscher ina nova cultura da surdada.

Tar il punct 1: Tenor la veglia Ordinaziun da submissiun dal Grischun eran ils posts da surdada anc autorisads, da publitgar il protocol da las averturas da las offertas cun ils nums dals offerents ed ils pretschs d'offerta en l'internet. Pervia dal privel pli grond, che las subinterpresas potenzialas fetschian cunvegnas, sco er pervia da las finamiras ch'ins vul cuntanscher cun l'armonisaziun dal dretg, ha il chantun renunzià a questa publicaziun dal circul d'offerents e dals pretschs en la procedura d'acquisi­ziun currenta. Nagin chantun na conceda ozendi – ultra a las partidas da procedura – a terzas persunas, sco furniturs u interpresas da transport, invista dals protocols da las averturas da las offertas.

Tar il punct 2: La CIAP fixescha per gronda part las prescripziuns da publicaziun per las acquisiziuns publicas, uschia ch'i na resta strusch pli spazi per regulaziuns spe­zia­­las chantunalas en quest sectur. Uschia ston ils criteris d'agiudicaziun e lur valita­ziun vegnir publitgads en la submissiun u en ils documents da submissiun tenor l'art. 29 al. 2 CIAP. Tut las submissiuns publicas ston vegnir publitgadas sin Simap.ch sco er supplementarmain en il Fegl uffizial chantunal. Ils posts d'acquisiziun chantunals adem­pleschan questas prescripziuns da publicaziun ed inditgeschan – ultra dals cri­teris d'agiudicaziun – per il solit schizunt ils subcriteris e las cumprovas decisivas en moda transparenta. Uschia è la pretensiun da l'incumbensa sut la cifra 2 gia adempli­da. Per ulteriuras prescripziuns na datti nagin motiv ord vista da la Regenza.

Tar il punct 3: Quest giavisch è garantì suffizientamain cun las novas prescripziuns d'acquisiziun. En il chantun Grischun pon ils offerents participar a l'avertura da las of­fer­tas e survegnan per regla gia immediatamain suenter l'avertura il protocol da las averturas da las offertas sin via electronica. Las agiudicaziuns che ston da nov vegnir publitgadas sin Simap.ch e che pon uschia vegnir consultadas da la publicitad, ston vegnir motivadas en moda summarica e ston en spezial cuntegnair las caracteristi­cas decisivas sco er ils avantatgs da l'offerta resguardada. Ils offerents che n'èn betg vegnids resguardads han en il Grischun ultra da quai il dretg d'in debriefing, en il qual il post d'acquisiziun als sto preschentar ils motivs principals, per ils quals lur offerta n'è betg vegnida resguardada. En auters chantuns vegnan ils offerents renviads – senza questa pussaivladad da l'attenziun giuridica – directamain a la Dretgira admini­strati­va chantunala.

Sa basond sin questas explicaziuns propona la Regenza al Cussegl grond da refusar questa incumbensa.

31 d'avust 2023