La regenza grischuna ha lantschà la consultaziun tar ina revisiun parziala da la lescha per promover la tgira da persunas malsaunas e da la lescha chantunala davart las prestaziuns supplementaras. La finamira da la revisiun parziala è quella da porscher in'alternativa tar la chasa da tgira a persunas attempadas che na pon betg pli viver a chasa, ma che basegnan mo pauca tgira. Uschia vegn realisà il princip da la politica da sanadad "ambulant avant staziunar".

En il chantun Grischun exista ina buna purschida staziunara per persunas attempadas e per persunas che basegnan tgira. Er datti en il Grischun ina rait fitg buna da servetschs da la tgira ed assistenza a chasa. In basegn d'agir datti però tar las furmas d'abitar alternativas, sco en spezial tar l'abitar assistì. Persunas attempadas che na pon betg pli viver a chasa malgrà lur pitschen basegn da tgira n'han oz savens nagina alternativa che d'entrar en ina chasa da tgira. Per che talas alternativas sajan avant maun pli savens en l'avegnir, duain vegnir meglieradas las cundiziuns generalas per purschidas da l'abitar assistì. Persunas attempadas duain pudair decider libramain en l'avegnir – independentamain da lur relaziuns economicas – co ch'ellas vulan abitar.

L'abitar assistì cumbinescha abitaziuns da locaziun construidas uschia, ch'ellas n'han nagins obstachels, cun prestaziuns da sustegn e da tgira. La construcziun d'abitaziuns che tegnan quint da la vegliadetgna è colliada cun custs supplementars. Tenor la proposta fatga en la lescha duain las instituziuns renconuschidas dal chantun pudair metter a quint quests custs supplementars a las abitantas ed als abitants sur ina taxa da di (da maximalmain 10 francs). Ina particularitad da l'abitar assistì è ultra da quai il fatg ch'in persunal d'assistenza è disponibel durant il di e ch'in servetsch d'urgenza stat a disposiziun durant la notg. Finanzià vegn quest servetsch da pichet er da las abitantas e dals abitants sur ina taxa da di (er da maximalmain 10 francs).
Sche quai avess dad esser necessari, pon las taxas da di vegnir indemnisadas tras las prestaziuns supplementaras sco custs che vegnan chaschunads da malsognas e d'impediments. Uschia èsi pussaivel er per persunas attempadas che basegnan tgira da profitar da l'abitar assistì. L'obligaziun dal chantun e da las vischnancas da pajar contribuziuns d'investiziun per crear letgs da tgira en chasas da tgira ed en gruppas da tgira duai percunter vegnir abolida. La favurisaziun da las plazzas en chasas da tgira envers las ulteriuras furmas d'abitar vegn eliminada uschia. 
 

Remartga:
La consultaziun dura fin ils 31 da schaner 2015. Ils documents da consultaziun stattan a disposiziun sin www.gr.ch (publicaziuns / consultaziuns). 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Gremi: regenza
Funtauna: rg chanzlia chantunala dal Grischun