La Regenza ha approvà il project per construir rempars en il torrent Aua da Vau en la vischnanca da Val Müstair ed ha deliberà ina contribuziun chantunala da 235 000 francs per quai. Supplementarmain sa participescha la Confederaziun cun ina contribuziun da 336 000 francs a quest Project.
La funtauna da l'Aua da Vau sa chatta sin la chadaina da muntognas tranter il Monte Forcola ed il Piz Umbrail. Suenter l'aua gronda d'impurtanza istorica l'onn 1987, nua che l'aual ha chaschunà donns materials considerabels, è el vegnì segirà en il rom d'in project da rempars. Quests rempars han ademplì lur funcziun fin oz, mussan ussa però deficits architectonics che duain vegnir eliminads en il rom dal project. Per quest intent vegn sanà in rempar existent dal torrent, il letg da l'aual vegn schlargià sin ina lunghezza da 250 meters da 7 fin 8 a circa 10 meters e la riva vegn rinforzada en quest sectur. Ultra da quai vegnan construidas duas pistas d'access tar la punt da la via chantunala. En cas d'ina aua gronda pussibiliteschan quests access da transportar nà maschinas da construcziun per preservar en il rom d'ina intervenziun immediata ch'il sutpassadi da la punt vegnia stuppà.

 

Tranter Rueun e Tavanasa croda adina puspè giu crappa en ils secturs Uaul da Munt e Crap Leller, uschia che la via sursilvana vegn periclitada. Perquai ha la Regenza approvà il project "Protecziun cunter crudada da crappa Munt / Leller" da las vischnancas da Glion e da Breil. Ils custs da project importan circa 1,87 milliuns francs. Per proteger la via chantunala duai il territori vegnir segirà cun raits cunter crudada da crappa sin ina lunghezza totala da 585 meters.

La vischnanca da Scuol ha survegnì glisch verda da la Regenza per construir ina nova staziun da mesiraziun per constatar a temp il privel da lavinas per lung da la via da S-charl sco er en la part sid da l'Engiadina Bassa. Ultra da quai ha la Regenza garantì a la vischnanca ina contribuziun chantunala da maximalmain 204 000 francs per quai.
La staziun da mesiraziun vegn ad esser ina part integrala dal sistem interchantunal da mesiraziun e d'infurmaziun (IMIS) che vegn coordinà e surveglià dal WSL Institut per la perscrutaziun da la naiv e da las lavinas (SLF). Las datas che vegnan evaluadas tras quests indrizs da mesiraziun servan ad elavurar ils bulletins da lavinas naziunals e regiunals. Ultra da quai vegnan questas datas duvradas per avertiments locals da lavinas. Oravant tut per las vischnancas, per la Viafier retica, per l'Uffizi da guaud e privels da la natira (UGP) e per l'Uffizi da construcziun bassa (UCB) furman ellas basas da decisiun relevantas.
Cun manar ina nova staziun IMIS en il territori dals Lais da Trigl èsi pussaivel da serrar las largias da savida ch'existan oz en il territori tranter la via dal pass dal Fuorn e la part nord da l'Engiadina Bassa e d'augmentar considerablamain la qualitad da las datas da basa per far giudicaments da la situaziun.

L'administraziun chantunala sa participescha l'onn 2020 danovamain a l'acziun "bike to work" da la Pro velo Svizra. La Regenza ha surdà l'organisaziun a l'Uffizi per la natira e l'ambient, a l'Uffizi da sanadad, a l'Uffizi da persunal ed a l'Uffizi da construcziun bassa sco post spezialisà per il traffic betg motorisà. En il rom da questa acziun vegnan las collavuraturas ed ils collavuraturs envidads da sa participar ad in'equipa da quatter e da prender il velo per ir a lavurar, e quai durant almain la mesadad dals dis da lavur dals mais d'acziun. Quest onn ha l'acziun stuì vegnir spustada – pervia da las mesiras da pandemia – dals mais matg e zercladur al settember ed october. Dapi l'onn 2010 è l'administraziun chantunala dal Grischun sa participada mintga onn a questa acziun. L'onn 2020 è quai pia la 11avla participaziun. Il dumber creschent da participantas e participants ed il dumber da kilometers fatgs mussan ch'il velo daventa adina pli bainvis er tar las collavuraturas ed ils collavuraturs chantunals. Sin Facebook e sin Instagram mussa l'administraziun regularmain ils puncts culminants da l'acziun.