La Regenza ha prendì enconuschientscha dal studi da realisabladad «Agricultura biologica per il bain puril dal Stabiliment giudizial Realta».

Il studi che ha examinà pli detagliadamain quatter differents scenaris, cumprova che la moda da producziun è gia ussa fitg ecologica. A medem temp mussa el, ch'ina midada a l'agricultura biologica fiss bain interessanta economicamain, ma na sa laschass strusch realisar concernent la lavur. Ultra da quai stuess vegnir restrenschida la circulaziun cun l'implant da biogas affilià, en spezial pudess il bain puril mo pli prender enavos las atgnas substanzas nutritivas ch'el ha furnì a l'implant. Resguardond la grondezza e cunzunt l'incumbensa centrala dal bain puril sco plazza da lavur per umens en l'execuziun averta, èsi ina fitg gronda exigenza d'ademplir las pretensiuns biologicas. Plinavant dumonda la realisaziun d'in project per midar a l'agricultura biologica resursas persunalas che n'existan betg sut las cundiziuns generalas actualas. Per rinforzar ulteriuramain la persistenza dal bain puril n'èsi betg obligatoricamain necessari da midar a l'agricultura biologica. Perquai recumonda il studi da rinforzar la producziun persistenta e d'examinar pli tard anc ina giada da midar il manaschi a l'agricultura biologica. La Regenza ha perquai incumbensà l'Uffizi per l'execuziun giudiziala da sviluppar vinavant il bain puril en direcziun da la persistenza.

L'administraziun chantunala sa participescha l'onn 2023 danovamain a l'acziun «bike to work» da la Pro velo Svizra. La Regenza ha surdà l'organisaziun a l'Uffizi per la natira e l'ambient, a l'Uffizi da sanadad, a l'Uffizi da persunal ed a l'Uffizi da construcziun bassa sco post spezialisà per il traffic betg motorisà. En il rom da questa acziun vegnan las collavuraturas ed ils collavuraturs envidads da sa participar ad in'equipa da quatter e da prender il velo per ir a lavurar, e quai durant almain la mesadad dals dis da lavur d'in mais.

Dapi l'onn 2010 è l'administraziun chantunala dal Grischun sa participada mintga onn a questa acziun. Il dumber creschent da participantas e participants ed il dumber da kilometers fatgs mussan, ch'il velo daventa adina pli bainvis er tar las collavuraturas ed ils collavuraturs chantunals.

La Regenza ha approvà parzialmain la revisiun totala da la planisaziun locala da Schmitten, che la vischnanca aveva concludì ils 28 da matg 2021.

Las reducziuns da la zona da construcziun, fatgas da la vischnanca da Schmitten, correspundan tut en tut al princip dal svilup dals abitadis vers anen tenor la Lescha federala davart la planisaziun dal territori. Però ha la vischnanca laschà star en la zona da construcziun differentas parcellas a l'ur da l'abitadi, senza preschentar ina motivaziun cumprovada suffizientamain per questa decisiun. Per quest motiv è la revisiun vegnida refusada parzialmain e returnada a la vischnanca per laschar repassar.

Tras l'approvaziun parziala contribuescha il chantun a la segirezza giuridica en vista ad eventualas proceduras per permissiuns da construcziun, perquai che la zona da planisaziun che sto vegnir relaschada da la vischnanca, sa restrenscha a las surfatschas refusadas. Uschia vegn debloccada la situaziun entaifer l'abitadi coerent existent e la vischnanca po cuntinuar cun sia finamira da mobilisar terren da construcziun e da densifitgar l'abitadi vers anen.