Il chantun Grischun introducescha il ePortal e facilitescha uschia a la populaziun ed a l'economia l'interacziun digitala cun l'administraziun. I daventa pli simpel, pli effizient e pli lev d'acceder als servetschs digitals da las autoritads. Il ePortal è ina contribuziun essenziala a la digitalisaziun ed è pia in term impurtant per in'administraziun moderna.

Il basegn da la populaziun e da l'economia da pudair far diever da servetschs da l'administraziun chantunala independentamain dal lieu e da las uras d'avertura è fitg derasà. Il chantun Grischun reagescha e lantscha ina nova plattafurma digitala. Il ePortal (eportal.gr.ch) porscha tant a la populaziun sco er a l'economia in access simpel e segir als servetschs digitals da las autoritads. Il support per il ePortal è cuntanschibel da tuttas uras, durant 7 dis l'emna. Uschia han las utilisadras ed ils utilisaders adina in sustegn.

La purschida digitala vegn extendida pass per pass
La purschida da prestaziuns dal chantun Grischun per la populaziun e per l'economia cumpiglia oz plirs tschient servetschs, blers da quels anc sin palpiri. Els vegnan digitalisads pass per pass e purschids sin il ePortal. Uschia pon vegnir fatgas cuntinuadamain experientschas preziusas che pon vegnir resguardadas per sviluppar vinavant la purschida. En il futur duain ils servetschs da las autoritads pudair vegnir duvrads pli e pli savens davent chasa u en biro, senza ch'ins saja lià vi da las uras da spurtegl.

Conto d'utilisaziun gratuit e gronda segirezza
Tscherts servetschs digitals da las autoritads dovran in conto d'utilisaziun gratuit. La registraziun per l'uschenumnà eConto ha per exempel l'avantatg, che datas depositadas pon vegnir surpigliadas per utilisar servetschs. Ultra da quai è in eConto pli tard la basa per ina identitad electronica. Per ch'ina communicaziun da l'administraziun possia vegnir tramessa er senza palpiri, stat a disposiziun ina chascha da brevs digitala. Quai ch'è fitg impurtant: Sch'ina autoritad introducescha in nov servetsch digital, controlleschan expertas ed experts interns ed externs per la segirezza d'informatica, sche quest servetsch ha eventualas largias da segirezza.

La transfurmaziun digitala da l'administraziun chantunala vegn accelerada
L'introducziun dal ePortal è in term impurtant en la realisaziun da la strategia «Administraziun digitala Grischun 2024–2028». Ella è la basa per la transfurmaziun digitala da l'administraziun chantunala ed ha la finamira da metter a disposiziun ina purschida da servetschs cumplessiva e digitala a favur da la populaziun e da l'economia. Cun 31 mesiras vegn la transfurmaziun digitala accelerada fermamain ils proxims onns. Latiers tutga er ina collavuraziun pli stretga cun las vischnancas.

Ulteriuras infurmaziuns davart il ePortal dal chantun Grischun pon vegnir consultadas sut https://eportal.gr.ch.

Fotografias agiuntadas:

Da sanestra: Lorenz Tanner (manader da l'Uffizi d'informatica), cusseglier guvernativ Martin Bühler (schef dal Departament da finanzas e vischnancas) e Marc Heuberger (manader dal Post da stab Administraziun digitala).

Foto 2

Infurmaziuns:

• Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 12.00 fin las 13.00), e‑mail Martin.Buehler@dfg.gr.ch
• Marc Heuberger, manader dal Post da stab Administraziun digitala, tel. +41 81 257 32 02 (cuntanschibel da las 13.00 fin las 13.45), e‑mail Marc.Heuberger@dfg.gr.ch

Responsabladad: Departament da finanzas e vischnancas / Post da stab Administraziun digitala

Tschintg dumondas e respostas davart il nov ePortal

• Tge avantatgs ha il ePortal per mai sco utilisadra u utilisader?
  Il ePortal (eportal.gr.ch) è ina plattafurma digitala centrala per la populaziun e per l'economia. Ella pussibilitescha in access simpel e segir a servetschs digitals da las autoritads.
• Tge servetschs chat jau sin il ePortal?
  La purschida da prestaziuns dal chantun Grischun per la populaziun e per l'economia cumpiglia oz plirs tschient servetschs, blers da quels anc sin palpiri. Els vegnan digitalisads pass per pass ed adempleschan las autas pretensiuns da segirezza e da la protecziun da datas. La purschida da servetschs sin il ePortal vegn cumplettada pass per pass.
• Tge avantatgs hai jau, sche jau avrel in eConto?
  Sche Vus avris in eConto, pudais Vus utilisar servetschs che premettan tschertas indicaziuns persunalas u che pretendan in stgalim da confidenza pli aut. Las indicaziuns arcunadas en Voss profil vegnan surpigliadas per utilisar ils servetschs. Cun il eConto survegnis Vus ultra da quai ina chascha da brevs digitala. Las funcziunalitads vegnan extendidas cuntinuadamain.
• È il eConto gratuit?
  Gea, Vus pudais avrir gratuitamain in eConto. Tscherts servetschs pudais Vus dentant utilisar – sco gia oz al spurtegl – er en il spazi digital mo cun pajar ina taxa.
• Tge fa l'administraziun chantunala, per che mias datas sajan segiras e protegidas?
  Mintga nov servetsch administrativ digital vegn examinà tenor auts standards da segirezza. Quai èn: in'analisa dal basegn da protecziun, sche necessari in concept davart la segirezza da las infurmaziuns e davart la protecziun da datas (concept ISDS) ed ina controlla tras expertas ed experts da segirezza.

Qua vai al ePortal: eportal.gr.ch. Dumondas e respostas detagliadas davart il ePortal chattais Vus sut digitaleverwaltung.gr.ch.