La Cumissiun dal Cussegl grond per giustia e segirezza (CGS) ha predeliberà la missiva da la Regenza tar la revisiun totala da la Lescha chantunala davart la protecziun da datas per mauns dal Cussegl grond. La cumissiun propona d'approvar la missiva.

Sut la direcziun dal president da la cumissiun Bruno W. Claus ed en preschientscha dal cusseglier guvernativ Peter Peyer, schef dal Departament da giustia, segirezza e sanadad, ha la CGS predeliberà la missiva da la Regenza tar la revisiun totala da la Lescha chantunala davart la protecziun da datas. La Lescha chantunala davart la protecziun da datas datescha da l'onn 2002. Pervia dals progress tecnologics dals ultims onns sco er causa il svilup dal dretg davart la protecziun da datas sin plaun europeic ha la Confederaziun suttamess dacurt la Lescha federala davart la protecziun da datas ad ina revisiun totala. Er ils chantuns ston ussa agir e realisar il nov dretg davart la protecziun da datas sin plaun chantunal. Sch'els na fan betg quai, vegn applitgà automaticamain il dretg federal. Cunquai che la Confederaziun ha reglamentà en sia legislaziun dapli che quai ch'il dretg internaziunal prescriva, po il chantun Grischun sa restrenscher – en la Lescha chantunala davart la protecziun da datas – a las prescripziuns dal dretg internaziunal ch'èn absolutamain necessarias, uschia ch'el sto reglar mo il minimum en quest sectur. La missiva da la Regenza suonda questa idea directiva – in fatg che vegn beneventà zunt fitg da la CGS. La cumissiun è entrada unanimamain en il project.

La revisiun totala da la Lescha chantunala davart la protecziun da datas pertutga mo il dretg davart la protecziun da datas formal. Ils organs publics ch'èn suttamess a la lescha ston applitgar in pèr novs instruments ed ademplir in pèr novas obligaziuns che rinforzan ils dretgs da las persunas pertutgadas. Plinavant pretenda il dretg surordinà in rinforzament da la surveglianza da la protecziun da datas. Midadas materialas sin il stgalim da las leschas spezialas na datti naginas.

Paucas propostas da midadas
La CGS ha discutà intensivamain il project da la Regenza a chaschun d'ina sesida d'in di. Resultadas èn mo paucas propostas da midadas, per exempel l'integraziun d'ina limitaziun dal temp d'uffizi per l'incumbensada u l'incumbensà per la protecziun da datas, la stritgada da la pussaivladad da communitgar datas persunalas principalas u l'excepziun da la surveglianza per il Cussegl grond e per sias cumissiuns sin fundament da la separaziun da las pussanzas.

Il Cussegl grond vegn a tractar il project en la sessiun da favrer 2025.

Infurmaziun en atgna chaussa
En la sessiun d'avust 2024 ha il Cussegl grond acceptà l'iniziativa parlamentara da la CGS concernent la correspundenza giuridica electronica en la procedura giudiziala administrativa ed ha pia approvà ina revisiun parziala da la Lescha davart la giurisdicziun administrativa. La Regenza ha ussa mess en vigur questa revisiun parziala per il 1. da schaner 2025, cunquai ch'il termin da referendum è scadì senza ch'i saja vegnì fatg in referendum. A partir da quest onn pon las persunas che tschertgan dretg pia suttametter lur inoltraziuns en furma electronica en tut las proceduras giudizialas da la giurisdicziun civila, penala ed administrativa.

Infurmaziuns:

President da la cumissiun Bruno W. Claus, tel. +41 81 300 33 70