La Regenza ha approvà la concessiun dal dretg da las auas per la «ovra electrica pitschna Rinerhorn» da las Telefericas Rinerhorn SA en la vischnanca da Tavau ed ha concedì la permissiun da realisar il project.

Sin il territori communal da Tavau possedan las Telefericas Rinerhorn SA dapi l'onn 1991 in sistem d'ennavada e d'aua da baiver per ennavar il territori da skis. L'aua necessaria vegn deviada dal Rieberbach sco er dal Leidbach. L'onn 2021 è il sistem d'ennavada vegnì amplifitgà correspundentamain cun prender en funcziun il lai d'accumulaziun. Questa infrastructura vulessan las Telefericas Rinerhorn SA utilisar ussa er per la producziun d'electricitad ord forza idraulica. L'intent principal resta l'ennavada che serva a garantir il basegn da naiv durant l'enviern. Perquai vegn interrutta durant quest temp la producziun d'electricitad. L'energia che vegn producida en la stagiun bassa duai en emprima lingia vegnir duvrada da las Telefericas Rinerhorn SA per lur agen consum ed il surpli vegnir alimentà en la rait e vendì.

Ils 29 da november 2020 han las votantas ed ils votants da Tavau dà a las Telefericas Rinerhorn SA la concessiun per utilisar il Rieberbach circa davent da la cota da 1878 m s.m. ed il Leidbach circa davent da la cota da 1865 m s.m. fin circa la cota da 1455 m s.m., per producir energia electrica. L'aua vegn restituida en la Landwasser tar la staziun da val da las Telefericas Rinerhorn. Il project prevesa tranter auter da construir da nov la chasa da turbina Glaris sper la staziun da val da las Telefericas Rinerhorn, d'exchavar in tumbin da pumpa en vischinanza da la tschiffada Rieberbach sco er d'adattar la sablunera Rieberbach.

La Regenza ha approvà in project da sanaziun da canera en la vischnanca da Panaduz. Quest project cumpiglia la Via taliana H13 davent dal cunfin Panaduz/Rehanau fin al cunfin Panaduz/Razén e la via da colliaziun Via sursilvana da la vart dretga dal Rain (Via da Versomi) en il territori communal da Panaduz. Pervia dal surpassament da la limita d'immissiuns en il stadi da giudicament decisiv 2035, ston omaduas vias chantunalas vegnir sanadas. Il chantun sco proprietari da las vias respectivas è obligà da realisar la sanaziun da canera. En il rom dal project da sanaziun da canera ha la Regenza concedì la permissiun da reducir la sveltezza maximala generala da 50 km/h a 30 km/h respectivamain dad 80 km/h a 50 km/h.

La revisiun parziala da la Lescha davart las scolas popularas ch'è vegnida concludida dal Cussegl grond ils 5 da december 2024, entra en vigur il 1. d'avust 2025. Il termin da referendum è scadì ils 11 da mars 2025. Entaifer quest termin n'èn vegnids inoltrads nagins referendums. A medem temp cun l'entrada en vigur da la Lescha davart las scolas popularas ha la Regenza approvà la revisiun da l'Ordinaziun da scola. La revisiun parziala adattescha basas legalas centralas a las pretensiuns pedagogicas, organisatoricas e finanzialas dad oz. En spezial vegn il stgalim da scolina adattà al stgalim primar e la scolina tutga da nov tar il temp da scola obligatoric. Per las persunas d'instrucziun da tut ils stgalims vegn plinavant auzada la salarisaziun minimala ed introducida la facilitaziun da vegliadetgna per las persunas cun in'activitad da gudogn a temp parzial a partir d'in pensum d'almain 65pertschient. Da nov po il chantun dar ina incarica da prestaziun a las scolas en ils ospitals e promover la realisaziun da champs da classa da plirs dis, d'emnas da project e d'excursiuns cun contribuziuns pauschalas als purtaders da scola. Las novas regulaziuns entran en vigur per l'onn da scola 2025/26.

Sin il 1. da matg 2025 ha la Regenza elegì Sandra Brunold sco nova commembra da la Cumissiun chantunala da chatscha per la perioda d'uffizi dal 1. da fanadur 2022 fin ils 30 da zercladur 2026. Ella suonda Agnes Brunold ch'è sortida da la Cumissiun da chatscha la fin da december2024 pervia da la vertenta limitaziun dal temp d'uffizi.

La Cumissiun da chatscha sa cumpona da set fin nov commembras e commembers e vegn elegida da la Regenza. Il temp d'uffizi da las commembras e dals commembers da la cumissiun dura maximalmain 12 onns.