La Regenza ha approvà il project da la Viafier retica SA «Rempar cunter crudadas da crappa Cruschetta Viafier retica». Ils custs da quest project vegnan budgetads cun 8,65 milliuns francs. Ultra da quai ha la Regenza permess ina contribuziun tenor la cunvegna da program da la NGF en il sectur «Ovras da protecziun e basas davart ils privels» e deliberà ina contribuziun chantunala da var 3 milliuns francs tenor la Lescha chantunala davart il guaud. Sch'i avess dad esser necessari da realisar ulteriuras mesiras da protecziun cunter corrusiun, vegn la contribuziun chantunala auzada per maximalmain 658 350 francs. Il project vegn realisà en 4 onns da construcziun e duai vegnir terminà l'onn 2028.

La lingia da la Viafier retica SA da Rehanau a San Murezzan è construida sin in traject da var 1500 meters tranter Filisur e Stugl sin spundas stippas e grippusas. Per lung da quest traject hai gia dà diversas crudadas da crappa ch'èn documentadas. Ils scleriments geologics e differentas simulaziuns da crudadas da crappa mussan plinavant, ch'i dat per lung da l'entir traject in privel da crudadas da crappa. Las quatter zonas da rempars ch'existan gia sin quest traject, «Greifenstein», «Falainerweg», «Cruschetta» e «Sut Surmin», vegnan resumadas per quest project d'approvaziun sut il num «Rempar cunter crudadas da crappa Cruschetta Viafier retica». Per proteger la lingia da viafier e la via chantunala sutvart èsi previs da construir sin l'entir traject raits cunter crudadas da crappa. Sur quatter secziuns vegnan montadas raits cunter crudadas da crappa da tut en tut var 1000 meters lunghezza cun classas d'energia da 1000 fin 5000 kilojoule. Ultra da quai vegn in rempar existent auzà e rinforzà. Sur il portal sid dal grond tunnel da Cruschetta vegn er anc montà in paralavinas per impedir che lavinas sa distatgian.

© Viafier retica SA

La Regenza ha garantì a l'uniun PSR Cadi ina contribuziun chantunala da 52 571 francs per extender il project per il svilup regiunal (PSR) da la Cadi cun il project parzial «Stizun dal vitg Surrein». Questa contribuziun premetta ina contribuziun federala da 65 714 francs. Ils custs subvenziunabels importan 164 285 francs.

Il matg 2022 (cf. communicaziun da la Regenza dals 5 da matg 2022) ha la Regenza deliberà – en il rom dal svilup regiunal – ina contribuziun chantunala da maximalmain var 2,2 milliuns francs, quai sut la premissa che la Confederaziun paja ina contribuziun da maximalmain var 2,4 milliuns francs. Il project cuminaivel PSR Cadi ha cumpiglià fin qua sis projects parzials en la regiun tranter Breil ed il Pass da l'Alpsu e duai ussa vegnir extendì cun il project parzial «Stizun dal vitg Surrein». La stizun vegn manada en l'avegnir sco stizun ibrida – durant tschertas uras cun persunal ed uschiglio sco stizun d'autoservetsch. La stizun vegn ad esser averta 7 dis l'emna. En l'avegnir vegn mess il focus sin products regiunals e sin la digitalisaziun. Surrein è situà amez la Cadi ed è perquai adattà fitg bain sco lieu per in partenari da distribuziun dal PSR Cadi. Ultra da quai serva la stizun sco vitrina per ils products regiunals. La sensibilisaziun e la commerzialisaziun èn numnadamain finamiras impurtantas dal PSR.

© uniun PSR Cadi

Per l'onn 2025 ha la Regenza concedì contribuziuns chantunalas da maximalmain 325 000 francs per renovar mirs sitgs. En connex cun las cunvegnas da program «cuntrada» e «protecziun da la natira» sa participescha er la Confederaziun cun sias cumparts definidas da 325 000 francs a la finanziaziun. Per la renovaziun da mirs sitgs, che na fan betg part d'ina cunvegna da program cun la Confederaziun u che na vegnan betg renovads sco prestaziuns da cumpensaziun per intervenziuns en territoris da protecziun da la cuntrada, paja il chantun ultra da quai contribuziuns da maximalmain 677 500 francs. 1,17 milliuns francs dals custs totals da 2,5 milliuns francs per il project vegnan plinavant finanziads tras atgnas prestaziuns e tras terzs.

L'onn 2025 duain vegnir renovads tut en tut var 3,7 kilometers mirs sitgs cun ina surfatscha visibla da var 4565 meters quadrat en las vischnancas d'Alvra, Andeer, Avras, Bever, Bravuogn Filisur, Brusio, Calanca, Cuira, Farera, Giuvaulta, Grono, Landquart, Lantsch, Luzein, Medel (Lucmagn), Mesocco, Muntogna da Schons, Mustér, Poschiavo, Rossa, Roveredo, Santa Maria en Calanca, Schluein, Scuol, Soazza, Surses, Trimmis, Trun, Tujetsch, Tumleastga, Val Müstair, Valragn, Val S. Pieder, Valsot, Val Stussavgia, Zernez sco er Zizers.

Sco mirs da cunfin e da sustegn èn ils mirs sitgs en bleras regiuns dal Grischun perditgas impurtantas d'ina cultivaziun tradiziunala. Plinavant furman els savens spazis da viver impurtants per reptils, per mammals pitschens e per insects ed han savens ina flora interessanta (litgens, mistgels, ervas). Els n'han uschia betg mo ina gronda impurtanza per l'istorgia culturala, mabain er per l'ecologia e per la cuntrada. Sch'els na vegnan betg mantegnids, van dentant blers da quests mirs en decadenza.